Read gen 1Petrò 5 Bible Online

1Petrò 5 - gen bible

1Petrò 5

¹Fifìa, ènyè, àmè kè ŋutɔ cã nyi èhamèmègãa, mù jro be ma pò fiɔ èhamèmègã kèwo lè mìa dòmèawo. Nyè ŋutɔ mù kpɔ àlekè Kristò ɖù àyàa tèpe, eye ne wo ɖè è fiɔa, mù la kpɔ gomè lè yebe gogoa cã mè. Ènyè ye le pò fiɔ mì be:

²mì nyì Mawu be àlɛ̃ha kè wo do àsi na mìa. Mu nyi kudo èji zĩzĩ ò. Vɔ̀ bòhũa, kudo èjro fàa, sìgbè lekè Mawu ji so mìa sia nène. Mì mu gbà wɔ̀ èdɔ kèa be yèwoa kpɔ àlè kè mu jè òa so e mè ò. Vɔ̀a mì kɔ̀ èjì mè ne mìa wɔ̀ ɛ̀ fàa.

³Mì mu gbà wɔ̀ ènu sìgbè mì le ɖù àpetɔ ɖo àmè kèwo wo sɔ do àsi na mìawo ji nène ò. Vɔ̀ bòhũa mì nyi kpɔwɔɛ na àlɛ̃haa.

⁴Nène a, ne Àlɛ̃kplɔ̀tɔ gãa vaa, mì la xɔ̀ gogo be jègbà kè mu gblena òa.

⁵Nène a kea, mìa ɖèkajɛwo cã, mì bɔ̀bɔ̀ mìa ɖokoewo ɖo èhamèmègãwo gɔ̃mè. Mìa kpata, mì bɔ̀bɔ̀ mìa ɖokoewo na mìa nɔ̀nɔwo, lè mìabe wɔ̀na ɖe sia ɖe mè kudo mìa nɔ̀nɔwo, ɖo Ŋɔ̀ŋlɔ̃awo gblɔ̃ be: “Mawu sinatè ɖo ègòyitɔwo ŋuti, vɔ̀a e kpɔna ɖo e mè na àmè kèwo bɔ̀bɔ̀nà woa ɖokoea.”

⁶Ye ŋutia mì bɔ̀bɔ̀ mìa ɖokoewo ɖo Mawu be ŋusɛ̃ bɔa gɔ̃mè, ne bèa kɔ mì yì èji lè hùenu kè be ɖo ɖɛa mè.

⁷Mì sɔ ènu kèwo keŋu le do nupo na mìabe susuawo dà ɖo Mawu ji, ɖo ye ŋutɔ ye lenabè na mì.

⁸Mì le mìa ɖokoewo nyuɛ̃ ɖe. Mì nɔ̀ àlɔ̀ ji! Mìabe kɛ̃tɔ, Àbòsam, le dã sìgbè jãŋùta kè le ɖè ègbè, eye be le ji àmè kè be la vũvũa nène.

⁹Mì likè lè xɔ̀sè mè. Mì sitè sɛ̃sɛ̃ ɖe ɖo Àbòsam ŋuti. Mì ɖoŋù be mìa nɔ̀vi xɔ̀sètɔ kèwo lè xixea mè gòdòawo cã le to àyàɖùɖu ŋuawo ke mè.

¹⁰Vɔ̀ mìabe àyà ɖùɖuwo la nɔ kpòe ɖe. Màje keŋu be Mawu, kè yɔ mì ne mìa va kpɔ gomè lè gogo màvɔ kè lè ɖèkawɔ̀wɔ mè kudo Kristò ŋutɔ la gbìgbɔ̀ le mì ɖotè. E la na, mìa likè goŋu-goŋu, la do mì ŋusɛ̃, eye e la na mì tùjèanyi.

¹¹Ye tɔ̀ ye nyi ŋusɛ̃, kaka sɔ yì. * Àmèn.

¹²Silvanɔ̀ kè mù bùnà nɔ̀vi ànùkuamea, ji mù to le ŋlɔ̀ xoma kèawo ɖoɖa mì. Mù jro be ma do mì ŋusɛ̃ kudo ènu kè be tèpe nyè ŋutɔ mù kpɔa, be Mawu be màje àdodoe ye nyi ekèa. Mì le è ɖo àsi goŋu-goŋu.

¹³Àmè cãcãwo be èhabɔ̀bɔ kè lè Babɛ̀l-a, do ègbè ɖoɖa mì. Èvi nyè Markò cã do ègbè ɖoɖa mì.

¹⁴Mì do ègbè na mìa nɔ̀nɔwo, eye àmè sia àmè lè mìa dòmè ne kpla àsì èkɔ̀ na nɔ̀via lè lɔ̃lɔ̃ mè[2]. Fàfa ne nɔ̀ ku mì, àmè kèwo keŋu lè èkàdodo mè ku Kristò!