Read gen 2Petrò 2 Bible Online

2Petrò 2 - gen bible

2Petrò 2

¹Sãa, àjè-gblɔ̃ɖɛtɔwo to ɖo Izràɛl dùkɔ̃a mè. Nènea ke ye àjè-nufiɔtɔwo cã la to ɖo mìa dòmè. Wo la to àyè be èmɔ̃wo nu, la sɔ àjè be ènufiɔfiɔ kè la gble ènua va mìa dòmè. Wo la gbe woabe Àpetɔ kè jo woa ŋutɔ cã. Woabe wɔ̀nawo la na be mu la dìdì gbɔ̀xue wo la crɔ̃ woa ɖokoewo ò.

²Àmè sùgbɔ la kpàsà woabe àgbè bàɖà nɔ̀nɔ do, àleke be, ɖo àjè-nufiɔtɔwo ŋutia, àmèwo la gblɔ̃ ènyà kpòtoewo ɖo nyàwo be èmɔa ŋuti.

³Ekè wo nyi ŋùbiatɔwo ŋutia, wo la kpà àjèɖàɖa be ènyàwo la sɔ ɖù àlè lè mìa ji. Àmè kèwo be hùɛgbledo kè lè, so blèmàa lili, eye woabe cɔ̃crɔ̃a mu le dɔ̃ kɔ̀lɔ̃ɛ̃ ò.

⁴Nyàwo, Mawu mu kpɔ ɖo e mè na àtikplɔtɔ kèwo wɔ̀ ènuvuɛ̃ ò, vɔ̀a, e sɔ wo dãŋùgbe ɖo èzò mà-vɔ mè, àfi kè wo do-gà wo lè, lè vìvìti mè, ne woa va ɖo kòjo na wo.

⁵Nène a ke ye Mawu mu kpɔ ɖo e mè na àmè kèwo nɔ̀ xixea mè lè Nɔa be hùenuawo cã ò. E na èsì ɖɔ, crɔ̃ àmè màvɔ̃ Mawu kèwo kpata nɔ̀ xixea mèa keŋu-keŋu, tovò na Nɔa, kè do jɔ̀jɔɛ nyinyi be àŋɛ̀a, ku àmè adrɛ̃ buwo kpò.

⁶E na èzò crɔ̃ Sodɔ̀m ku Gòmɔrà, trɔ wo zũ àfi ɖèɖe. E wɔ̀ ekèa ne woa nyi pòpòfiɔ na àmè màvɔ̃ Mawu bu kèwo la va nɔ̀ àgbèa.

⁷Mawu hlùɛ̃ Lɔt, àmè jɔ̀jɔɛ kè, àmè vuɛ̃wo be àgbè kpòtoe nɔ̀nɔ ɖè èfũ na a gã.

⁸Àmè jɔ̀jɔɛ kèa nɔ̀ àmèawo dòmè gbè sia gbè. E sè ènu kèwo keŋu le yì e jiawo, eye be kpɔ wo ku ŋùku cã, àleke be àmèawo be *èse ji ma wɔ̀a ɖè èfũ na yebe susu ŋutɔ.

⁹Ne Tɔhonɔ̀ wɔ̀ ekèa, eŋuã, ye ŋutɔ nya àlekè be la wɔ̀, la hlùɛ̃ àmè kèwo vɔ̃na ɛ̀awo gã so woabe tètèkpɔwo mè, eye be la jrà ènu màjɔ̀ màjɔ wɔ̀tɔwo ɖo kaka na kòjoɖoɖo zãgbèa, ne woa dɔ̃ èto na wo.

¹⁰E la dɔ̃ èto na àmè kèwo wɔ̀nà ɖo woabe ŋùtilã be èjro vuɛ̃wo ji, eye wo mu sina Mawu ò a. Àjè-nufiɔtɔ kèawo jrana eye wo jènà ŋùmè na woa ɖokoewo. Wo mu bùnà gogo be ènu ɖoɖo kèwo ye lè jiŋùkusiawo ò, eye wo mu vɔ̃na wo zũzũ cã ò.

¹¹Vɔ̀a Mawu be àtikplɔtɔ kèwo ɖo hɔ̃hlɔ̃ kudo ŋusɛ̃ wu àjè-nufiɔtɔ kèawoa, mu gblena hùɛ do jiŋùkusi be ènuɖoɖo ŋuawo lè Tɔhonɔ̀ be ŋùmè ò.

¹²Àmè kèawo lè sìgbè ègbemèlã màɖo susu, kèwo wo ɖo be àmèwo ne tre èmɔ̀ sɔ le, ne woa wùawo nène. Wo zũnà ènu kè gɔ̃mè wo mu ŋɔjè òa. Wo la crɔ̃ wo sìgbè àlekè wo crɔ̃na ègbemèlãwoa nène.

¹³Wo la ɖù àyà ɖo àyà kè wo dona na àmèwoa ŋuti. Woabe jìjɔɛ kpɔkpɔ ye nyi woa wɔ̀ ènu nyɔŋuwo lè ŋùkèkè mè. Wo nyi ŋùkpɛ̃nuwɔ̀tɔwo ku àmè pòɖiwo. Wo bɔ̀nà èha ku mì, ɖùnà àzã, vɔ̀a, woa ɖokoewo ye wo le flù be yèwo le ɖù àgbè.

¹⁴Wo jrona la wɔ̀ *àhasì ku nyɔ̃nù ɖe sia ɖe kèwo wo kpɔa, eye woabe èjro sɔ wɔ̀ èvuɛ̃a mu tìnà wo ò. Wo blènà àmè kèwo mu likè ò a. Wo kplana woabe èjì ɖo ŋùbia ŋuti. Mawu be kpɛ̃sɛ̃ lè àmè kèawo ji.

¹⁵Wo trã èmɔ, ɖo wo gbe èmɔ jɔ̀jɔɛa ji toto. Wo to Balam, Beɔ̀r be èvia be àfɔ̀ tope, àmè kè kpɔ jìjɔɛ ɖo àlè kè la so ènugbegble wɔ̀wɔ mèa ŋuti.

¹⁶Vɔ̀a wo kã ŋùmè na Balam, ɖo e dà Mawu be *èse ji. Nyàwo, èsɔ-àkɛtɛ kè mu pònà nupo òa, va pò nupo na ɛ̀ kudo àgbètɔ be ègbè, eye be tɔtè àɖàhùa-nu kè Mawu be gblɔ̃ɖɛtɔa le wɔ̀a.

¹⁷Àjè-nufiɔtɔ kèawo lè sìgbè vudo kèwo mu jina èsì ò, àlo sìgbè lilikpo kè àya sɔ sɛ̃sɛ̃ ɖe le yìa nène. Woawo ye Mawu jrà tèpe kè do vìvìti cicria ɖo ɖɛ na.

¹⁸Wo pònà nupo ègòyi tɔ̀ eye wo gblɔ̃nà yàkànyàwo. Wo sɔna ŋutilã be èjro pòɖiwo trena èmɔ̀ na àmè kèwo crì àgbènɔ̀nɔ vuɛ̃, kèwo nu wo si lè, ye tèpe mu dìdì ò a.

¹⁹Àmè kèawo fiãnà vòvo be àjɔ̀gbè na àmèwo, vɔ̀a woa ŋutɔwo nyi ènu kpòtoe kpòtoe wɔ̀wɔ be kluviwo, ɖo ènu sia ènu kè ɖù àmè jia, nana àmè zũnà yebe kluvi.

²⁰Ne àmè kèwo si lè ènu kèwo pònà ɖi àmè lè xixe kèa mèawo nu, to mia Tɔhonɔ̀ ku Hlùɛ̃tɔ Yesù Kristò be nyanya mè vɔ̀, gbà gbìgbɔ̀ tàsi woa ɖokoewo na ènu kèawo, eye wo gbà ɖù woa jia, àgbè kè ŋùkumè wo va nɔ̀nà lè vɔ̀vɔnua nyrànà wu ekè wo nɔ̀ sãa.

²¹Ne àmè kèawo mu nya ènu ɖekpe so jɔ̀jɔɛwɔ̀wɔ be èmɔa ŋuti klua òa, e la nyɔ na wo wu, be woa nya èmɔ kèa gbɔ̀xue, vɔ̀, co la gbìgbɔ̀ yì ŋùgbe lè èse kɔ̀kɔ̀ɛ kè Mawu do na woa gbɔ.

²²Ènu kè jɔ̀ ɖo woa jia, ɖè e fiɔ peŋu be èlododo kèawo nyi nyàwo: “Àvũ kè trua gbìgbɔ̀ yì ye ŋutɔ be tutrua gbɔ” kudo “Èhã kè wo lè èsì na nyuɛ̃ ɖe a ke ye gbà trɔ yì le mlì lè bàba mè.”