Read gen 1Yòhanɛ̀s 2 Bible Online

1Yòhanɛ̀s 2 - gen bible

1Yòhanɛ̀s 2

¹Èvi nyèwo, mù le ŋlɔ̀ xoma kèa ɖoɖa mì, ne mì mu gbà wɔ̀ èvuɛ̃ ò. Vɔ̀ ne e va e mè be àmè ɖe wɔ̀ èvuɛ̃a, mi ɖo xɔ̀namètɔ lè Àta gbɔ: Yesù Kristò, àmè jɔ̀jɔɛa.

²E ye sɔ ye ɖokoe savɔ eye Mawu sɔ miabe ènuvuɛ̃wo kè mi, mu nyi miawo tɔ̀ ɖèɖe kpò ò, vɔ̀a xixea kpata tɔ̀.

³Ne mi wɔ̀ ɖo Mawu be èsewo jia, eŋuã mi kã ɖo e ji be, mi jèsi ì.

⁴Ne àmè ɖe gblɔ̃ be: “Mù jèsi ì”, vɔ̀ mu wɔ̀nà ɖo yebe èseawo ji ò a, àjèɖàtɔ ye be nyi, eye nyàwo mu lè nène mea mè ò.

⁵Vɔ̀ àmè kè wɔ̀nà ɖo yebe ènyàa jia, yebe lɔ̃lɔ̃ na Mawu a, nyi blibo. Nène a ye mi la kã ɖo e ji be mi lè e mè.

⁶Àmè kè gblɔ̃ be yè lè àgbè lè Mawu mèa, ɖo la nɔ̀ àgbè sìgbè àlekè ye Kristò nɔ̀ àgbèa nène.

⁷Nɔ̀vi nyè ɖèvewo, *èse kè mù le ŋlɔ̀ ɖoɖa kèa, mu nyi ènu yeye ò. E nyi *èse xoxo, ekè lè mìa si so gɔ̃mèjèje a. Èse xoxo kèa nyi àŋɛ̀ kè mì sè va yìa.

⁸Gãkea èse yeye be nyi. Wo ɖè yebe nyàwo a fiɔ lè Kristò mè, nènea ke e ze lè mìa cã mìa mè. Đo vìvìti le yì vɔ̀, eye kɛ̃klɛ̃ àdodoe le kɔ̀ xoxo.

⁹Àmè kè be yè lè kɔ̀kɔ̀ɛ mè, vɔ̀ crì nɔ̀viaa, kpɔ̀tɔ̀ lè vìvìti mè, va na hùenu kèa.

¹⁰Àmè kè lɔ̃ nɔ̀viaa, lè kɔ̀kɔ̀ɛ mè, eye àfɔ̀klɛ̃nu ɖe mu lè ye mè ò.

¹¹Vɔ̀ àmè kè crì nɔ̀viaa, lè vìvìti mè, le zɔ̃ lè e mè, eye mu nya fikè be le yì ò, ɖo vìvìtia gbã ŋùkuvi na ɛ̀.

¹²Mù ŋlɔ̀ ɛ̀ ɖoɖa mì èvi nyèwo, ɖo Mawu sɔ mìabe èvuɛ̃wo kè mì lè Yesù Kristò be nyikɔ mè.

¹³Mù ŋlɔ̀ ɛ̀ ɖoɖa mì, mì, àjìtɔwo, ɖo mì nya àmè kè lè so gɔ̃mèjèje a. Mù ŋlɔ̀ ɛ̀ ɖoɖa mì, ɖèkajɛwo, ɖo mì ɖù Àmè Vuɛ̃ a ji.

¹⁴Mù ŋlɔ̀ ɛ̀ ɖoɖa mì, ɖèviwo, ɖo mì nya Àta. Mù ŋlɔ̀ ɛ̀ ɖoɖa mì, àjìtɔwo, ɖo mì nya àmè kè lè so gɔ̃mèjèje a. Mù ŋlɔ̀ ɛ̀ ɖoɖa mì, ɖèkajɛwo, ɖo mì sɛ̃ŋu, Mawu be ènyà lè àgbè lè mìa mè, eye mì ɖù Àmè Vuɛ̃ a ji.

¹⁵Mì mu gbà lɔ̃ xixea ò, eye mì mu gbà lɔ̃ ènu kèwo ye lè e mèa cã ò. Ne àmè ɖe lɔ̃ xixea, Àta be lɔ̃lɔ̃ mu lè e mè ò.

¹⁶Đo ènu kèwo keŋu lè xixea mè sìgbè, ŋutilã be ènu jro àmè, ŋùkuvi be ènu lɔ̃ɛwo, ègòyiyi kè ànyigbã ji be ènuwo hɔ̃nà lè àmè mèawo, ènu kèawo keŋu mu so Àta gbɔ ò, vɔ̀a wo so xixea mè.

¹⁷Xixea va le yì, eye ènu kèwo keŋu jènà àgbètɔwo be ŋùmè lè e mèawo cã va le yì. Vɔ̀ àmè kè wɔ̀nà ènu kè Mawu jro a, nɔ̀nà ànyi kaka yì.

¹⁸Èvi nyèwo, ènuwuwua ɖo vɔ̀! Sìgbè àlekè mì sè be Kristò be kɛ̃tɔa gbãnà a, Kristò be kɛ̃tɔ sùgbɔ sitè fifì ŋutɔ cã vɔ̀. Ekèa na, mì nya be ènuwuwua gogo.

¹⁹Àmè kèawo mu nyi mia dòmètɔwo ò, ye ŋuti wo jo lè mia gbɔ ɖo. Ne mia tɔ̀wo ye wo nyia, wo la kè nɔ̀ mia dòmè. Vɔ̀a wo jo, ekèa mè kɔ̀ be woa dòmètɔ ɖekpe mu lè ku mi ò.

²⁰Vɔ̀ mìa yaa, mì xɔ̀ Gbɔ̃gbɔ̃ Kɔ̀kɔ̀ɛ kè Kristò hlɛ̃ ɖo mìa ji, eye mìa kpata mì nya nyàwo a.

²¹Ne mù ŋlɔ̀ xoma ɖoɖa mìa, mu nyi be mì mu nya nyàwo a ò. Vɔ̀a, mì nya ɛ̀, eye mì nya cã be àjèɖàɖa ɖekpe mu lè nyàwo a mè ò.

²²Fifìa, àmè kɛ ye nyi àjèɖàtɔ ò, ne mu nyi àmè kè gblɔ̃ be Yesù mu nyi Kristò ò? Àmè kèa ye nyi Kristò be kɛ̃tɔ. E gbe Àta ku Èvia ɖodu.

²³Đo àmè kè gbe Èvia a, gbe Àta cã. Àmè kè hũ Èvia mèa, ɖo Àta cã.

²⁴Ye ŋutia mì le ènyà kè mì sè so gɔ̃mèjèje a ɖo mìabe èjìwo mè. Ne mì le ènu kè mì sè so gɔ̃mèjèje a ɖo mìabe èjìwo mèa, mì la wɔ̀ ɖèka ku Èvia kudo Ètɔa.

²⁵Ènu kè be àjɔ̀gbè Kristò ŋutɔ fìã na mia, ye nyi àgbè màvɔ.

²⁶Mù ŋlɔ̀ ekèa ɖoɖa mì, ɖo àmè kèwo le ji la flù mìawo ŋuti.

²⁷Ne mìawo yaa, Kristò kɔ̀ yebe Gbɔ̃gbɔ̃ ɖo mìa mè, kaka kè yebe Gbɔ̃gbɔ̃ lè mìa mèa, mì mu hiã be àmè ɖe ne fiɔ mì ènu ò. Đo yebe Gbɔ̃gbɔ̃ le fiɔ mì ènu, so ènu ɖekpekpe ŋuti, eye ènu kè be le fiɔa nyi nyàwo, mu nyi àjè ò. Ye ŋutia, mì ɖo èto ènu kè Gbɔ̃gbɔ̃ a lè fiɔa, eye mìa nɔ̀ Kristò mè.

²⁸Èvi nyèwo, mì nɔ̀ Kristò mè, ne wàlɛbɛ kè be la vaa, mia ɖo èjì ɖèɖe, àlekè be èŋù mu gbà kpɛ̃ mi, lè yebe vava gbè ò.

²⁹Mì nya be Kristò nyi àmè jɔ̀jɔɛ, ye ŋutia àmè sia àmè kè le wɔ̀ ènu jɔ̀jɔɛa nyi Mawu be èvi.