Read gen 1Yòhanɛ̀s 3 Bible Online

1Yòhanɛ̀s 3 - gen bible

1Yòhanɛ̀s 3

¹Mì kpɔ àlekè Àta lɔ̃ mi ɖo! Yebe lɔ̃lɔ̃ na be wo le yɔ mi be Mawu be èviwo. Eye mi nyi ì nyàwo. Ekèa ŋuti xixea mu jèsi mi ò, ɖo mu jèsi Mawu ò.

²Àmè ɖèvewo, fifìa, mi nyi Mawu be èviwo. Ènu kè mi la va nyia, mu kpɔ ze hàɖe ò. Vɔ̀ mi nya be wàlɛbɛ kè Kristò la vaa, mi la nɔ̀ sìgbè àlekè be lèa nène, ɖo mi la kpɔ àleke ye be lè nyàwo a.

³Àmè ɖekpekpe kè si ŋùɖo kèa lè lè Kristò mèa ɖona ye ɖokoe kɔ̀kɔ̀ɛ, sìgbè àlekè Kristò kɔ̀a nène.

⁴Àmè ɖekpekpe kè wɔ̀nà èvuɛ̃a, dànà Mawu be èsea ji. Èvuɛ̃ wɔ̀wɔ ye nyi be woa dà Mawu be èse ji.

⁵Mi nya be Kristò va ne bèa ɖè àgbètɔwo be èvuɛ̃wo jo, ɖo èvuɛ̃ mu lè e mè ò.

⁶Àmè ɖekpekpe kè lè àgbè lè Kristò mèa, mu teŋu kpɔ̀tɔ̀ nɔ wɔ̀ èvuɛ̃ ò. Vɔ̀ àmè kè kpɔ̀tɔ̀ le wɔ̀ èvuɛ̃a, mu kpɔ ɛ̀ kpɔ àlo jèsi ì ò.

⁷Èviwo, mì mu gbà na àmè ɖe ne blè mì ò. Àmè kè lè wɔ̀ ènu kè jɔ̀ a nyi àmè jɔ̀jɔɛ, sìgbè àlekè Kristò nyi àmè jɔ̀jɔɛa nène.

⁸Àmè kè kpɔ̀tɔ̀ lè wɔ̀ èvuɛ̃a, Àbòsam tɔ̀ ye be nyi, ɖo Àbòsam le wɔ̀ èvuɛ̃ so gɔ̃mèjèje a. Vɔ̀a *Àgbètɔ be Èvia va ne bèa crɔ̃ Àbòsam be èdɔwo.

⁹Àmè ɖekpekpe kè nyi Mawu be èvia, mu teŋu kpɔ̀tɔ̀ nɔ wɔ̀ èvuɛ̃ ò, ɖo Mawu be nɔ̀nɔmè lè e mè, eye Mawu nyi Ètɔa, eye mu teŋu kpɔ̀tɔ̀ nɔ wɔ̀ èvuɛ̃ ò.

¹⁰Fikèa ye vòvòtoto lè Mawu be èviwo ku Àbòsam be èviwo dòmè lè: àmè ɖekpekpe kè mu le wɔ̀ ènu kè jɔ̀ òa, àlo mu lɔ̃ yebe èhavi òa, mu nyi Mawu be èvi ò.

¹¹Àŋɛ̃ kè mì sè so kaka gɔ̃mèjèje a, ye nyi ekèa be mia lɔ̃ mia nɔ̀nɔwo.

¹²Mi mu la nɔ̀ sìgbè Kaɛ̃ nène, ekè so Èvuɛ̃a mè, eye be wù nɔ̀via ò. Nukɛ ŋuti Kaɛ̃ wù ì ɖo ò? Đo èdɔ kèwo be wɔ̀awo nyrã, eye ekèwo nɔ̀via wɔ̀awo nyɔ.

¹³Nɔ̀viwo, ne xixea crì mìa, mu gbà wɔ̀ ŋùdã do mì ò.

¹⁴Mi nya be mi to lè èku mè va ɖo àgbè mè. Mi nya ekèa, ɖo mi lɔ̃ mia nɔ̀viwo. Àmè kè mu lɔ̃ àmè òa, lè èku mè.

¹⁵Àmè kè crì nɔ̀viaa nyi èhlɔ̃dãtɔ, eye mì nya be èhlɔ̃dãtɔ mu ɖo àgbè lè ye ɖokoe mè ò.

¹⁶Ekèa mè, mi nya ènu kè lɔ̃lɔ̃ nyia: Kristò sɔ yebe àgbè na ɖo mia ta, miawo cã, e lè be mia sɔ miabe àgbè na ɖo nɔ̀viwo ta.

¹⁷Ne àmè ɖe jè àdɔ̀kù, eye be kpɔ nɔ̀via lè èhiã mè, eye mu kɔ̀ àdɔ̀mè ne bèa na ɛ̀ ènu òa, àleke ye be la teŋu gblɔ̃ be Mawu be lɔ̃lɔ̃ lè yèbe èjì mè ò?

¹⁸Èvi nyèwo, mì mu gbà na, mia sɔ ènyà ku nupo pòpo sɔ lɔ̃ àmè ò; vɔ̀ bòhũa mia lɔ̃ àmè lè nyàwo ku wɔ̀na mè.

¹⁹Ekèa mè mi nya lè be mi lè nyàwo mè, eye miabe èjìwo la kã ɖo e ji lè Mawu be ŋùkɔ̀.

²⁰Ne miabe èjìwo dohùɛ do mia, mi nya be Mawu wu miabe èjì, eye e nya ènu sia ènu.

²¹Nène a, èxlɔ̃ nyè ɖèvewo, ne miabe èjì mu dohùɛ do mi ò a, mi ɖo èjìɖèɖe lè Mawu be ŋùmè.

²²Mi la xɔ̀ ènu kè mi biɔ so e gbɔ, ɖo mi wɔ̀nà ɖo yebe èsea ji, eye mi wɔ̀nà ènu kè jè ŋùmè na ɛ̀a.

²³Ègbè kè be ɖè na mia ye nyi èkea: mia xɔ̀ Èvia Yesù Kristò ji sè, ne mia lɔ̃ mia nɔ̀nɔwo, sìgbè àlekè ye Kristò ɖègbè na mia nène.

²⁴Àmè ɖekpekpe kè wɔ̀nà ɖo Mawu be èse jia lè àgbè lè Mawu mè, eye Mawu cã lè e mè. Ekèa mè mi la nya lè be e lè mia mè, to Gbɔ̃gbɔ̃ kè be na mia ji.