Read gen 1Yòhanɛ̀s 4 Bible Online

1Yòhanɛ̀s 4 - gen bible

1Yòhanɛ̀s 4

¹Àmè ɖèvewo, mì mu gbà xɔ̀ àmè kèwo kpata gblɔ̃nà be gbɔ̃gbɔ̃ kɔ̀kɔ̀ɛ lè yèwo siawo ji sè ò. Vɔ̀a mìa do wo kpɔ, ne mìa kpɔ be gbɔ̃gbɔ̃ kè lè woa mèa so Mawu gbɔ mà a. Đo àjè gblɔ̃ɖɛtɔwo bɔ lè xixea mè.

²Àlekè mì la kpɔ Mawu be Gbɔ̃gbɔ̃ a la jèsìa ye nyi ekè: àmè ɖekpekpe àmè kè hũ e mè be Yesù Kristò va trɔ zũ àgbètɔ nyàwo a, e ɖo Mawu be Gbɔ̃gbɔ̃.

³Eŋuã, àmè kè mu hũ e mè òa, mu ɖo Mawu be Gbɔ̃gbɔ̃ ò. Ekèa ye nyi Kristò be kɛ̃tɔa be gbɔ̃gbɔ̃. Mì sè be e gbãnà; fifìa, e lè xixea mè vɔ̀.

⁴Èvi nyèwo, Mawu tɔ̀ ye mì nyi, eye mì ɖù àjè gblɔ̃ɖɛtɔwo ji; ɖo, àmè kè lè mìa mèa wu àmè kè lè xixea mèa.

⁵Àjè gblɔ̃ɖɛtɔwoa, xixea tɔ̀ ye wo nyi. Wo pònà nupo sìgbè xixea mè tɔwo nène, eye xixea ɖona èto wo.

⁶Miawo ya, Mawu tɔ̀ mi nyi. Àmè ɖekpekpe kè jèsi Mawu a, ɖona èto mi. Àmè kè mu nyi Mawu tɔ̀ òa, mu ɖona èto mi ò. Ekèa ye mi kpɔna, sɔ jènàsi gbɔ̃gbɔ̃ kè nyi nyàwo be Gbɔ̃gbɔ̃ a, ku ekè nyi àjèɖàɖa be gbɔ̃gbɔ̃a.

⁷Àmè ɖèvewo, mì na mia lɔ̃ mia nɔ̀nɔwo, ɖo lɔ̃lɔ̃ a Mawu gbɔ be so. Eye àmè kè lɔ̃nà àmèa, nyi Mawu be èvi, eye e jèsi Mawu.

⁸Àmè ɖekpekpe kè mu lɔ̃nà àmè òa mu jèsi Mawu ò, ɖoa Mawu nyi lɔ̃lɔ̃.

⁹Àlekè Mawu ɖè yebe lɔ̃lɔ̃ fiɔ lè mia dòmèa ye nyi ekè: E dɔ̃ Èvia àkòŋùgòa ɖoɖa xixea mè, ne mia nɔ̀ àgbè to e ji.

¹⁰Ekèa mè ye, wo ɖè Mawu be lɔ̃lɔ̃ fiɔ lè be, mu nyi miawo ye lɔ̃ Mawu ò, vɔ̀, e ye jè ŋùkɔ̀ lɔ̃ mi, dɔ̃ Èvia ɖoɖa, ne bèa nyi hlɔ̃si na miabe èvuɛ̃wo.

¹¹Àmè ɖèvewo, ne Mawu lɔ̃ mi nènea, e lè be miawo cã mia lɔ̃ mia nɔ̀nɔwo.

¹²Àmè ɖekpe mu kpɔ Mawu kpɔ ò. Ne mi lɔ̃ mia nɔ̀nɔwoa, eŋuã, Mawu lè mia mè, eye yebe lɔ̃lɔ̃ a ɖù blibo lè mia mè.

¹³Yebe Gbɔ̃gbɔ̃ kè be na mia ye nyi jèsìdo be mi lè Mawu mè, eye Mawu cã lè mia mè.

¹⁴Eye mi kpɔ ɛ̀, le ɖù ɖase be, Àta ɖo Èvia a ɖoɖa, ne bèa nyi xixea be hlùɛ̃tɔ.

¹⁵Àmè kè hũ e mè be, Yesù nyi Mawu be Èvia, Mawu lè e mè, eye e cã lè Mawu mè.

¹⁶Mi nya, eye mi xɔ̀ lɔ̃lɔ̃ kè Mawu ɖo na mia ji sè. Mawu nyi lɔ̃lɔ̃, eye àmè kè lè lɔ̃lɔ̃ mèa, lè Mawu mè, eye Mawu cã lè e mè.

¹⁷Ne lɔ̃lɔ̃ ɖù blibo lè mia mèa, eŋuã mi la ɖo èjìɖèɖe lè kòjoɖo zãgbè. Đo miabe àgbè lè sìgbè Kristò tɔ̀ nène.

¹⁸Vɔ̃vɔ̃ mu lè lɔ̃lɔ̃ mè ò, vɔ̀a lɔ̃lɔ̃ àdodoe nyànà vɔ̃vɔ̃ jo. Đo vɔ̃vɔ̃ ɖona ètodɔ̃. Àmè kè le vɔ̃a, mu zɔ̃ sù lè lɔ̃lɔ̃ mè ò.

¹⁹Miawo yaa, mi lɔ̃nà àmè, ɖoa, e yaa, e jè ŋùkɔ̀, lɔ̃ mi.

²⁰Ne àmè ɖe gblɔ̃ be, ye lɔ̃ Mawu, eye e do èkɛ̃ nɔ̀viaa, àjèɖàtɔ ye be nyi. Đo àmè kè mu lɔ̃ nɔ̀via kè be le kpɔ òa, àleke be la teŋu lɔ̃ Mawu kè mu le kpɔa ò?

²¹Ekèa ye nyi *èse kè mi xɔ̀ so e gbɔa be, àmè kè lɔ̃ Mawu a, ne lɔ̃ nɔ̀via cã.