Read gen 1Yòhanɛ̀s 5 Bible Online

1Yòhanɛ̀s 5 - gen bible

1Yòhanɛ̀s 5

¹Àmè ɖekpekpe kè xɔ̀sè be Yesù ye nyi Kristò, nyi Mawu be èvi. Àmè kè lɔ̃ Àta, lɔ̃ Èvia cã.

²Ne mi lɔ̃ Mawu gbà wɔ̀ ɖo yebe èseawo jia, ekèa la ɖè è fiɔ be mi lɔ̃ Mawu be èviwo cã.

³Ekèa ye nyi lɔ̃lɔ̃ na Mawu, be mia wɔ̀ ɖo yebe èsewo ji, eye yebe èsewo mu sɛ̃ŋu na mi ò.

⁴Đo àmè sia àmè kè nyi Mawu be èvia ɖùnà xixea ji, eye ènu kè mi sɔ ɖùnà xixea jia ye nyi miabe xɔ̀sè.

⁵Àmè kɛ ye teŋu ɖù xixea ji ò? Àmè kè xɔ̀sè be Yesù ye nyi Mawu be Èvia kpò ye teŋu ɖù xixea ji.

⁶Yesù Kristò ye va ku yebe mawusilèle be èsì kudo yebe èku be èhũ. Mu va ku èsì ɖèɖe kpò ò, vɔ̀a, e va ku èsì kudo èhũ. Eye Gbɔ̃gbɔ̃ Kɔ̀kɔ̀ɛ a le ɖù ɖase be e nyi nyàwo, ɖo Gbɔ̃gbɔ̃ a nyi nyàwo.

⁷Đo ɖàsèfo ètɔ̃ ye lè.

⁸Gbɔ̃gbɔ̃, Èsì ku Èhũ. Ènu ètɔ̃ kèawo wɔ̀ ɖèka.

⁹Ne mì xɔ̀ àgbètɔ be ɖasea, Mawu be ɖasea wu, ɖo ekèa ye nyi ɖase kè Mawu ɖù: e ɖù ɖase so Èvia ŋuti.

¹⁰Àmè ɖekpekpe kè xɔ̀ Mawu be Èvia ji sè a, ɖo ɖase kèa lè yebe èjì mè. Vɔ̀ àmè kè mu xɔ̀ Mawu ji sè òa, kpɔ ɛ̀ be e nyi àjèɖàtɔ na ye ɖokoe, ɖo mu xɔ̀ ɖase kè Mawu ɖù so Èvia ŋutia ji sè ò.

¹¹Đase a ye nyi ekèa be Mawu na mi àgbè màvɔ, eye àgbè màvɔ kèa lè Èvia mè.

¹²Àmè kè ɖo Èvia, ɖo àgbè kèa. Àmè kè mu ɖo Mawu be Èvia òa, mu ɖo àgbè a ò.

¹³Mù ŋlɔ̀ ekèa ɖoɖa mì ne mìa nya be mì ɖo àgbè màvɔ, mì, àmè kèwo xɔ̀ Mawu be Èvia ji sè a.

¹⁴Kãkã ɖo e ji kè mi ɖo lè Mawu be ŋùmè a, ye nyi be, ne mi biɔ ènu ɖe kè zɔ̃ ɖo yebe èjro jia, mi nya be e la ɖo èto mi.

¹⁵Eye ekè mi nya be e la ɖo èto mi lè ènu ɖekpekpe kè mi le biɔ ɛ̀a mèa, mi gbà nya be e la na mi ènu kè mi le biɔ ɛ̀a.

¹⁶Ne àmè ɖe kpɔ nɔ̀via le wɔ̀ èvuɛ̃ kè mu kplɔ̀nà àmè yì èku mè òa, ne fãkue na Mawu ne bèa na àgbè àmèa; ekèa kù ɖo èvuɛ̃ kè mu kplɔ̀nà àmè yì èku mè òa ŋuti. Vɔ̀ èvuɛ̃ ɖe lè ekè kplɔ̀nà àmè yì èku mè. Nyè mu le gblɔ̃ be woa fãkue na Mawu ɖo ekèa ta ò.

¹⁷Ènu bàɖà wɔ̀wɔ ɖekpekpe nyi ènuvuɛ̃, vɔ̀ èvuɛ̃ ɖe lè ekè mu kplɔ̀nà àmè yì èku mè ò.

¹⁸Mi nya be àmè kè Mawu jìa, mu wɔ̀nà èvuɛ̃ ò, ɖo Mawu be Èvia kpɔna e ji, eye Àmè Vuɛ̃ a mu tɔna ɛ̀ àsi ò.

¹⁹Mi nya be mi nyi Mawu tɔ̀, eye xixea kpata lè Àmè Vuɛ̃ a gɔ̃mè.

²⁰Mi gbà nya be Mawu be Èvia va, eye e na mi ènunya, be mia jèsi ì be e nyi Mawu àdodoe a, eye mi lè àmè kè nyi Mawu àdodoe a mè, lè Èvia Yesù Kristò mè. Àmè kèa ye nyi Mawu àdodoe a ku àgbè màvɔa.

²¹Èvi nyèwo mì gbìgbɔ̀ lè vòduwo yomè.