Read gen Kòjoɖotɔwo 10 Bible Online

Kòjoɖotɔwo 10 - gen bible

Kòjoɖotɔwo 10

¹Kè Abimèlɛk ku vɔ̀a, Puà be èvi Tolà kè nyi Dodò be tɔgbeyɔvia, ye hlùɛ̃ Izràɛl gã. Tolà so Isakàr be kɔ̀taa mè. E nɔ̀nà Camìr be èdùa mè lè Efràyim nyigbã ji.

²E kplɔ̀ Izràɛlviwo èpè èwì vɔ ètɔ̃ sɔ̃ŋu. E yomè a e ku eye wo ɖì ì ɖo Camìr.

³Kè Tolà kua, Gilead-vi jìji Yàir ye kplɔ̀ Izràɛlviwo èpè èwì vɔ èvè.

⁴E jì èvi ŋusù ègbã eye woa kpata wo liana èsɔ àkɛtɛ ègbã. Wo ɖo kɔpe ègbã lè Gilead-nyigbã ji. Kaka va na egbèa, wo gbà yɔna kɔpe kèawo be Yàir be èviwo be kɔpewo.

⁵Yàir va ku eye wo ɖì ì ɖo Kamɔ̀n.

⁶Izràɛlviwo gbà le wɔ̀ ènu kè mu jɔ̀nàjì na Tɔhonɔ̀ òa: wo yì le sɛ̃ vòdu Baal ku Àstartè. Wo gbà sumɔna Sirìa, Sidɔ̀n, Mòab, Amɔ̀n kudo Filistì be vòduwo cã. Wo gbe Tɔhonɔ̀ eye wo mu gbà sɛ̃nà ɛ̀ cã ò.

⁷Eye Tɔhonɔ̀ do àdɔ̀mèze ɖo Izràɛlviwo ŋuti kaka be èsɔ wo do àsi na Filistì kudo Amɔ̀n-tɔwo.

⁸Sɔ so gà ŋua mèa, àmè kèawo tɛ Izràɛlvi kèwo lè Gilead nyigbã kudo Yɔrdàn-tɔ̀ be èwèzɛ̃pea ɖo èto, do fùnya-fùnya na wo xɔ̀ èpè ènyi sɔ̃ŋu.

⁹Eji-ejia, Amɔ̀n-tɔwo sònà ètɔ̀a, yì wɔ̀nà àhùa kudo Yudà, Bɛnyamìn kudo Efràyim be kɔ̀tawo ɖùnà woa ji. Eye Izràɛlviwo gɛ̃ ɖo ènuxàxa gãaɖe mè.

¹⁰Ekèa na be Izràɛlviwo do àpa biɔ Tɔhonɔ̀ be àlɔ̀do gblɔ̃ be: “Mi wɔ̀ ènuvuɛ̃ ɖo ŋuti wò, ɖo mi gbe èwò kè nyi miabe Mawu a, yì le sɛ̃ Baal vòduwo.”

¹¹Tɔhonɔ̀ ɖo e ŋuti na wo be: “Wàlɛbɛ kè ye Ejiptè-tɔwo, Amɔrì-tɔwo, Amɔ̀n-tɔwo, Filistìtɔwo,

¹²Sidɔ̀n-tɔwo, Amàlɛk-viwo kudo Maɔnì-tɔwo tɛ mì ɖo ànyi eye mì biɔ àpe àlɔ̀doa ɖe, nyè mu hlùɛ̃ mì lè woa sia?

¹³Vɔ̀ mì va gbe mù, yì le sɛ̃ vòduwo. Ekèa ŋuti ye nyè mu gbà le ji la hlùɛ̃ mì ɖe ò.

¹⁴Fifìa, mì biɔ àlɔ̀do so vòdu kèwo mì le sɛ̃a si. Woawo ye ɖo la hlùɛ̃ mì lè mìabe vevesèsea mè.”

¹⁵Izràɛlviwo trɔ gblɔ̃ na Tɔhonɔ̀ be: “Ɛ̃ɛ, mi wɔ̀ ènuvuɛ̃! Wɔ̀ ènu kè jro wòa kudo mi, vɔ̀ to kuku ɖèɖe mèa, hlùɛ̃ mi fifì jro.”

¹⁶Eye wo ɖè vòdu kèawo keŋu jo lè woabe dòdòmè, trɔ le sɛ̃ Tɔhonɔ̀. Ɖo Tɔhonɔ̀ ŋutɔ cã mu teŋu le dojì lè woabe tɛtɛ ɖo ànyi a be ŋùkɔ̀ ò.

¹⁷Nène a, Amɔ̀n-tɔwo bɔ̀, bla àhùakpa eye wo yì sò kɔpe ɖo Gilead nyigbã ji. Izràɛlviwo cã bla àhùakpa lè Mispà.

¹⁸Eye Izràɛl be kɔ̀ta kèwo lè Gilead nyigbã jia kudo woabe àmègãwo le gblɔ̃ na woa nɔ̀nɔwo be: “Àmè kɛ ye la kpe àhùa kudo Amɔ̀n-tɔwo na mi ò? Àmè kè la teŋu wɔ̀ ɛ̀a, la trɔ zũ kplɔ̀tɔ na Gilead be dùkɔ̃a kpata.”