Read gen Kòjoɖotɔwo 12 Bible Online

Kòjoɖotɔwo 12 - gen bible

Kòjoɖotɔwo 12

¹Efràyim be kɔ̀ta be ŋusùwo cã bɔ̀, sò Yɔrdàn be ètɔ̀a yì Safɔ̀n lè Jɛftè gbɔ. Wo gblɔ̃ na ɛ̀ be: “Nukɛ ŋuti wò ɖèka, wò yì wɔ̀ àhùa kudo Amɔ̀n-viwo ye wò mu mì àsi na mi ò? Mi la tɔzò èwò kudo àxuedo wòa kpata.”

²Jɛftè ɖo e ŋuti na wo be: “Kè tùkaɖa jɔ̀ ɖo Amɔ̀n-viwo kudo dùkɔ̃ nyèa dòmèa, mù yɔ mì, co mì mu do ènu e mè ò.

³Ekè mù kpɔ be mì mu ji la va kpe ɖo ŋuti nyè òa, mù sɔ àgbè nyèa na èku eye mù yì wɔ̀ àhùa kudo Amɔ̀n-viwo kè Tɔhonɔ̀ ɖè wo do àsi na mù a. Eŋuã nukɛ ŋuti mì sitè ɖo ŋuti nyè fifì ɖo ò?”

⁴Jɛftè bɔ̀ Gilead be ŋusùtiwo kpata, yì wɔ̀ àhùa kudo Efràyim-viwo ɖù woa ji. Efràyim-tɔwo ye gblɔ̃nà be: “Gilead-tɔwo si lè Efràyim be kɔ̀ta mè va yì sò ci Manasè be kɔ̀ta mè.”

⁵Ekèa yomè a, Gilead-tɔwo yì sò èmɔ̃ na Efràyim-tɔwo lè Yɔrdàn be ètɔ̀a be sòpewo. Ne àmè ɖe va le sò ètɔ̀a, wo biɔna ɛ̀ be: “Efràyim-vi ye wò nyia?” Ne e ɖo e ŋuti be: “òa”,

⁶eŋuã wo gblɔ̃nà na ɛ̀ be, gblɔ̃: “Cìbòlɛt” ne mia sè. Ne àmèa gblɔ̃ be: “Sòbòlɛt” kpòa, wo nyana be Efràyim-vi be nyi, ɖo Efràyim-viwo mu teŋu gblɔ̃nà Cìbòlɛt àlo “Cì” ò. Eye wo lena àmèa la yì sò èkɔ̀ na ɛ̀ lè ètɔ̀a be sòpewo gbɔ. Nène a ye wo wù Efràyim-viwo sìgbè àmè àkpe èkà ci èvè (42000) sɔ̃ŋu nène lè hùe ŋua nu.

⁷Jɛftè kplɔ̀ Izràɛl be dùkɔ̃a xɔ̀ èpè àdɛ̃. E yomè a e ku eye wo yì ɖì ì ɖo Gilead fikè wo jì ì lèa.

⁸Kè ye Jɛftè ku vɔ̀a, Ibsàn ye kplɔ̀ Izràɛl be dùkɔ̃a. E so Bɛtlɛhɛ̀m lè Zabulɔ̀n be kɔ̀ta mè.

⁹E jì ŋusùvi ègbã, nyɔ̃nùvi ègbã. E sɔ nyɔ̃nùvi ègbãwo na àsu àmèjrowo eye be ɖè àmèjro-nyɔ̃nùvi ègbãwo na yebe èvi ŋusùwo. E kplɔ̀ Izràɛl be dùkɔ̃a èpè adrɛ̃.

¹⁰E yomè a, e ku eye wò ɖì ì ɖo Bɛtlɛhɛ̀m.

¹¹Kè ye Ibsàn kua, Elɔ̀n so Zabulɔ̀n ye kplɔ̀ Izràɛl be dùkɔ̃a èpè èwo.

¹²Zabulɔ̀nvi Elɔ̀n ku e yomè, eye wo ɖì ì ɖo Ayalɔ̀n lè Zabulɔ̀n be ànyigbã ji.

¹³Kè ye Elɔ̀n kua, Hilɛ̀l kudo Pireatɔ̀n be èvi Abdɔ̀n ye kplɔ̀ Izràɛl be dùkɔ̃a.

¹⁴E ɖo èvi ŋusù èkà kudo tɔgbeyɔvi ŋusù ègbã. Woa kpata wo dona èsɔ-àkɛtɛ èkà takpo ci èwo. Abdɔ̀n kplɔ̀ Izràɛl be dùkɔ̃a èpè ènyi.

¹⁵E yomè a, Abdɔ̀n ku eye wo ɖì ì ɖo Pireatɔ̀n lè Àmàlɛk be ètoa ji lè Efràyim be kɔ̀ta mè.