Read gen Kòjoɖotɔwo 14 Bible Online

Kòjoɖotɔwo 14 - gen bible

Kòjoɖotɔwo 14

¹Gbè ɖèkaa, Samsɔ̀n ɖìsà yì Timnà eye e kè ɖo Filistì be tùgbɛ̀jɛvi ɖe kè jɔ̀jì na ɛ̀a ŋuti.

²Kè e trɔ gbɔ̀a, e gblɔ̃ na yebe àjìtɔwo be: “Kè mù yì Timnàa, mù kpɔ Filistì be tùgbɛ̀jɛvi ɖe kè be ènu jɔ̀jì na mù a. Mù ji fifì be mìa yì biɔ e ta na mù ne ma ɖè.”

³Yebe àjìtɔwo ɖo e ŋuti na ɛ̀ be: “Yɔ̀! Wò mu kpɔ tùgbɛ̀jɛvi ɖekpe lè miabe kɔ̀ta àlo miabe dùkɔ̃a mèa? Sɔ wu be Filitì-tɔ, èvo mà-sòtɔwo dòmè kpò wò la yìa?” Vɔ̀ Samsɔ̀n gblɔ̃ na ètɔa be: “Biɔ e ta na mù, ɖo yebe ènu ye jɔ̀jì na mù.”

⁴Àjìtɔawo mu nya be Tɔhonɔ̀ ŋutɔ be jro ye Samsɔ̀n le wɔ̀ ne bèa kpɔ mɔnu sɔ ji ènyà lè Filistìtɔwo ŋuti ò. Ɖo nyàwoa, Filistìtɔwo ɖo ŋusɛ̃ ɖo Izràɛlvi ji lè hùe ŋua nu.

⁵Eye Samsɔ̀n kudo yebe àjìtɔwo jè èmɔ̃ yì Timnà. Wàlɛbɛ kè wo ɖo èdùa be vɛ̃-gblèawo gbɔa, jãŋùtavi ɖe zɔ̃ ɖo Samsɔ̀n ji kudo àdã.

⁶Tɔhonɔ̀ be gbɔ̃gbɔ̃a ɖɔ Samsɔ̀n eye be trɛ̃ jãŋùtavia kudo àlɔ̀ gbalo sìgbè ègbɔnɔvi ɖe kpò nène. Eye mu gblɔ̃ ènu kè be wɔ̀a na yebe àjìtɔwo ò.

⁷E yì èmɔ̃zɔ̃zɔ̃a ji, yì pò nupo kudo Filistì be tùgbɛ̀jɛvia. Ɖo nyɔ̃nùvia be ènu jɔ̀jì na Samsɔ̀n ŋutɔ.

⁸Lè ŋùkèkè ɖewo yomè a, Samsɔ̀n trɔ yì Timnà ne bèa yì ɖè nyɔ̃nùa. Kè e lè èmɔ̃a ji le yìa, e va gàdà èmɔ̃ yì kpɔ jãŋùta kè be wùa be ŋutilã kukua. Eye e kpɔ be ànyiwo va wɔ̀ àgbà ɖo jãŋùta kukua mè. Ànyisì lè àgbàa mè.

⁹Samsɔ̀n xa ànyisì a ɖo yebe àlɔ̀wo mè eye be le ɖiɖɔ ɛ̀ lè èmɔ̃a ji le yì. E yomè kè be ɖo yebe àjìtɔawo gbɔa, e na woa cã wo ɖù. Vɔ̀a, mu gblɔ̃ na wo be jãŋùta kuku mè ye yè xa ànyisì a lè ò.

¹⁰E yomè a, Samsɔ̀n be ètɔa yì pò sè kudo tùgbɛ̀jɛvia so èsrɔ̃ɖèɖèa ŋuti eye Samsɔ̀n ɖo èsrɔ̃ɖèɖe be ènuɖùkplɔ̃ sìgbè àlekè ɖèkajɛwo wɔ̀nà ɛ̀ nène.

¹¹Kè Filistìtɔwo kè ɖo Samsɔ̀n ŋuti zè ɖèkaa, wo ɖo ɖèkajɛvi ègbã na ɛ̀ be woa nɔ̀ e ŋuti.

¹²Samsɔ̀n gblɔ̃ na wo be: “Mù ja do àlòbalò ɖe na mì eye ne mì teŋu ɖè e gɔ̃mè na mù lè ènuɖùkplɔ̃ ɖoɖo be ŋùkèkè adrɛ̃ kèawo mèa, mù la na mì àwù gɔ̃mètɔ̀ ègbã kudo àwù èjitɔ̀ ègbã.

¹³Vɔ̀ ne mì mu teŋu ɖo e ŋuti na mù òa, mì la na mù àwù gɔ̃mètɔ ègbã ku àwù èjitɔ̀ ègbã. Wo ɖo e ŋuti na ɛ̀ be: “Do àlòbalò wòa, mi le ɖo èto!”

¹⁴Eye Samsɔ̀n gblɔ̃ na wo be: “Ènu kè wo ɖùnàa to lè ènu kè ɖùnà àmè eye ènu kè vivia to le ènu kè ɖo ŋusɛ̃a mè.” Lè ŋùkèkè ètɔ̃ sɔ̃ŋu mèa, ɖèkajɛawo mu teŋu kpɔ àlòbalòa be gɔ̃mè ɖèɖe ò.

¹⁵Ŋùkèkè ènègɔ̃a gbèa, wo gblɔ̃ na Samsɔ̀n be èsrɔ̃a be: “Blè èsrɔ̃ wòa ɖo ŋuti ne bèa ɖè àlòbalòa be gɔ̃mè na wò ne wòa va gblɔ̃ ɛ̀ na mi, mu nyi nène òa mi la tɔzò èwò kudo ètɔ wò be àxuea. Àlo, mì kpe mi va be yèwoa va xɔ̀ miabe ènuwo lè mia sia?”

¹⁶Nyɔ̃nùa fã àvi yì Samsɔ̀n gbɔ gblɔ̃ na ɛ̀ be: “Wò mu lɔ̃ mù klua ò, ɖo wò crì mù. Mu nyi nène òa, wò kè ɖè àlòbalò kè wò do na tɔ̀ nyèwoa gɔ̃mè na mù.” Samsɔ̀n ɖo e ŋuti be: “Nyè mu ɖè e gɔ̃mè na àjìtɔ nyèwo ŋutɔ cã ò. Nukɛ ŋuti ma ɖè e gɔ̃mè na èwò ya ɖo ò?”

¹⁷Nyɔ̃nùa do nupo na Samsɔ̀n lè àzã be ŋùkèkèawo mè kudo ènyà ɖèka. Ŋùkèkè adrɛ̃gɔ̃ a gbèa, Samsɔ̀n va sɔ àlòbalòa be ɖoŋutia na nyɔ̃nùa, ɖo e va tìkɔ̀ na ɛ̀.

¹⁸Eye ŋùkèkè adrɛ̃gɔ̃ ŋua gbè gbɔ̀xue èwè la ɖo èxɔ̀a, èdùa mè be ɖèkajɛawo va gblɔ̃ na Samsɔ̀n be: “Nukɛ la teŋu vivi wu ànyisì ò, nukɛ la teŋu ɖo ŋusɛ̃ wu jãŋùta ò.” Samsɔ̀n ɖo e ŋuti be: “Ne mì mu kè sɔ ènyìvi nyèa ŋlɔ̀ àgblèa òa, mì mu la kpɔ àlòbalòa be ɖoŋuti ò.”

¹⁹Eye Tɔhonɔ̀ be gbɔ̃gbɔ̃a gɛ̃ ɖo Samsɔ̀n mè eye be yì Àskalɔ̀n be èdùa mè. E yì wù ŋusù ègbã (30) lè funu eye be ɖè woabe àwùwo va na ɖèkajɛvi kèwo ɖè àlòbalòa gɔ̃mè. E trɔ yì ètɔa be èdù mè e yomè kudo àdɔ̀mèze.

²⁰Wo sɔ nyɔ̃nùvia sɔ na ɖèkajɛvi kè nɔ̀ e ŋuti lè àzãa be gàmèa; ye be sɔ ɖè.