Read gen Kòjoɖotɔwo 15 Bible Online

Kòjoɖotɔwo 15 - gen bible

Kòjoɖotɔwo 15

¹Àzã ɖewo yomè, lè èlù ɖèɖe be hùenua, Samsɔ̀n yì ji èsrɔ̃a kpɔ. E hɛ̃ ègbɔnɔvi ɖèka ɖo àsi eye kè be ɖo funua, e gblɔ̃ be: “Mù ji la yì kpɔ èsrɔ̃ nyèa lè yebe èxɔ̀ mè”. Vɔ̀a èsrɔ̃a be ètɔ mu lɔ̃ be ne yì ò,

²eye e gblɔ̃ na ɛ̀ be: “Nyàwoa, mù susu be wò mu la sɔ ènu kè be wɔ̀a sɔ kè è gbèɖe ò, eye mù sɔ ɛ̀ sɔ na àmè kèwo nɔ̀ ŋuti woawo dòmètɔ ɖèka. Vɔ̀a ɖe, e yomètɔ̀a mu nya kpɔkpɔ wu ìa? Sɔ e ya sɔ ɖè ɖo dàdaa tèpe.”

³Samsɔ̀n gblɔ̃ na wo be: “Fifì ya ènu ɖekpe mu la gbà teŋu xe èmɔ̃ na mù be nyè mu gbà wɔ̀ ènu bàɖà kudo Filistìtɔwo ò.”

⁴Eye Samsɔ̀n jo yì le wɛ̀tɛ̀klɛ̀ àlɔ̀ ètɔ̃ (300). E le woabe àsikewo èvè-èvè sɔ bla ɖo èzòti ŋuti.

⁵E yomè a, e tɔzò èzòtiawo eye be tàsi wɛ̀tɛ̀klɛ̀awo ɖo Filistìtɔwo be àgblèwo mè. Nène a ye Samsɔ̀n wɔ̀ sɔ fiɔ̃ Filistìtɔwo be èlù babla kudo kèwo lè àti ŋuti kaka jè àmìti kudo vɛ̃-gblewo ŋutɔ cã ji.

⁶Filistìtɔwo biɔ sè be: “Àmè kɛ ye wɔ̀ ènu kèa ò?” Eye wo ɖo e ŋuti na wo be: “Samsɔ̀n kè nyi Timnà be ŋusù ɖe be ètoyɔvia ye, ɖo ètoa sɔ èsrɔ̃a sɔ na ɖèkajɛvi kèwo nɔ̀ e ŋuti lè nyɔ̃nù kpɔ̀kplɔ be gàmèa be dòmètɔ ɖèka.” Nène a, Filistìtɔwo yì tɔzò nyɔ̃nùa kudo ètɔa kpata.

⁷Eye Samsɔ̀n gblɔ̃ na wo be: “Kè e tɔ̀ be nène ye mì wɔ̀a, nyè cã mù la sɔ yebe èsìa sɔ pò mì gbɔ̀xue la gbɔ̃jɛ̃.”

⁸E kpe àhùa kudo wo eye e pò àmè gbogbo ɖewo wù. E yomè a, e yì ci Etàm be àkpãdo ɖe mè.

⁹Filistìtɔwo va yì dotò ɖo Yudà be ànyigbã ji eye so funua, wo le kãkã ɖo Lehì be àgowo ji.

¹⁰Yudà be ŋusùtiwo biɔ wo sè be: “Nukɛ ŋuti mì va xa mi ɖo ò?” Wo ɖo e ŋuti be: “Mi va be mia le Samsɔ̀n ne mia wɔ̀ kudo è sìgbè àlekè be wɔ̀ kudo mia tɔ̀woa nène.”

¹¹Yudà ŋusù àkpe ètɔ̃ (300) yì Etàm be àkpãdoa mè eye wo gblɔ̃ na Samsɔ̀n be: “Jɔ̀gbèvuɛ̃ kɛ ye wò ja hɛ̃ va mia ji leke ò! Wò mu nya be Filistì gɔ̃mè ye mi lèa?” E ɖo e ŋuti na wo be: “Ènu kè wo wɔ̀ kudo mù a be tèpe kpò ye mù ɖo na wo.”

¹²Wo gblɔ̃ na ɛ̀ be: “Mi va be mia kplɔ̀ wò yì do àsi na Filistìtɔwo.” Samsɔ̀n gblɔ̃ na wo be: “Mì fìã na mù be mìa ŋutɔ mì mu la wù mù ò.”

¹³Wo ɖo e ŋuti be: “Aò! Mi ji kpò la le wò yì do àsi na Filistìtɔwo. Mi mu ɖo susu be mia wù wò ò.” E na ye wo bla ɛ̀ kudo èkà yeye èvè eye wo kplɔ̀ ɛ̀ to lè àkpãdoa mè.

¹⁴Wàlɛbɛ kè wo va ɖo Lehìa, Filistìtɔwo va dogò wo kudo jìjɔɛ. Tɔhonɔ̀ be gbɔ̃gbɔ̃a ɖɔ Samsɔ̀n; èkà kè wo sɔ bla àbɔ kudo àlɔ̀wo na ɛ̀a sò sìgbè àlekè èzò fìɔ̃na nìlɔ̃ be èkàa nène.

¹⁵Samsɔ̀n kpɔ èsɔ-àkɛtɛ ɖe kè wo wù mu dìdì òa be àglã lè funu. Eye kè be sɔ àglãa, e wù àmè àkpe ɖèka (1000) kudo è.

¹⁶Eye Samsɔ̀n do àpa gblɔ̃ be: “Kudo èlã-glã ɖèkaa, mù crɔ̃ àmè fuu. Kudo àglã ɖèkaa, mù wù àmè àkpe ɖèka.

¹⁷Kè be gblɔ̃ ènyà kèa vɔ̀a, e dà èlã-glã ŋùgbe ɖo àzɔ̀ge boo. Ènu kèa ŋuti ye wo yɔna funua be Ramàt-Lehì.

¹⁸Eye kè sìkɔ le tì ì kakaa, e fã yɔ Tɔhonɔ̀ gblɔ̃ be: “Oò Mawu, èwò ye na sumɔ̃vi wòa ɖùji leke. Fifìa, wò la na sìkɔ la tì mù kaka ye mù la jè èvo mà-sòtɔ kèawo si mèa?”

¹⁹Mawu fɛ̃ àkpãdo kè lè Lehìa eye èsì to na Samsɔ̀n be nù gbà kpɔ ŋusɛ̃. Wo ɖo nyikɔ na èsìdo ŋua be “Eìn-Hakorè àlo Korè be sìdo”. E lè Lehì kaka na egbè.

²⁰Samsɔ̀n kplɔ̀ Izràɛlviwo lè Filistìtɔwo be hùenu èpè èwì sɔ̃ŋu.