Read gen Kòjoɖotɔwo 16 Bible Online

Kòjoɖotɔwo 16 - gen bible

Kòjoɖotɔwo 16

¹Samsɔ̀n yì Gazà be èdùa mè gbè ɖèka. E yì dogò àhasìtɔ ɖe lè funu eye be yì dɔ̃ e gbɔ.

²Àmè sia àmè sè lè èdùa mè be Samsɔ̀n va. Èzã kpataa, wo ɖia àfi kèwo ye àmè la teŋu si toa eye wo do èxa ɖo èdùgboa nu. Wo mu teŋu wɔ̀ ènu ɖekpe kudo è lè èzã mè ò, ɖo wo le gblɔ̃ be èŋù ne kè gbɔ̀xue yèwoa wù ì.

³Vɔ̀ Samsɔ̀n mu ci àhasìtɔa gbɔ èŋù kè ò. Èzã dòmèa, e fɔ̃ to yì fo àgboa be hɔ̃trutiawo. E lɔ wo ɖo àbɔta kaka yì kɔ̀ wo ɖo èto ɖe ji lè Hebrɔ̀n be èdùa be ŋùkɔ̀ tututu.

⁴E yomè a, Samsɔ̀n jè àzìã nyɔ̃nù ɖe kè wo yɔna be Dàlilà lè Sorɛ̀k be bàlìa mè.

⁵Filistì be èfìɔviwo yì kpɔ Dàlilà gblɔ̃ na ɛ̀ be: “Jè àgbàgba ne wòa nya ŋusɛ̃ gã kè lè Samsɔ̀n sia be sope, bèa gbà gblɔ̃ àlekè wo la teŋu wɔ̀ ɖù e jia eye ne wò va gblɔ̃ ɛ̀ na mia, mi la na wò klòsalò-ga àlɔ̀ woeɖèka (1100).”

⁶Dàlilà yì gblɔ̃ na Samsɔ̀n be: “Gblɔ̃ àfi kè wò kpɔ ŋusɛ̃ gãa wòa soa, eye àlekè wo la bla wò ye wò mu la gbà hùã òa na mù.”

⁷Samsɔ̀n ɖo e ŋuti be: “Ne wo sɔ àŋùdàti be èkà mumu adrɛ̃ kèwo mu kpɔ pu òa sɔ bla mù a, mù la nɔ̀ kpò sìgbè ŋusù kpɔ̀tɛawo nène.”

⁸Èfìɔviawo yì ji àŋùdàti be èkà mumu kè mu kpɔ pu òa, adrɛ̃ va na Dàlilà ne bèa sɔ va bla Samsɔ̀n.

⁹Eye kè be wla àmèdɔ̃dɔ̃wo ɖo yebe àxuea mè, yì bla Samsɔ̀n vɔ̀a, Dàlilà do àpa be: “Samsɔ̀n Filistìtɔwo va la le wò!” Kè e sè ènyà kèa, Samsɔ̀n sò èkàawo sìgbè àlekè èzò bìnà ènu nène. Eye wo mu teŋu nya yebe ŋusɛ̃a be jɔ̀sope ò.

¹⁰Dàlilà gblɔ̃ na Samsɔ̀n be: “Ènyè ye wò blè, gblɔ̃ àjèɖà-nyawo na, àlo! Fifìa, gblɔ̃ ènu kè wo la sɔ bla wò ye wò mu la gbà hùã òa na mù.”

¹¹E ɖo e ŋuti na ɛ̀ be: “Ne wo bla mù kudo èkà yeye kè wo mu kpɔ sɔ wɔ̀ èdɔ ɖe òa, ma nɔ̀ kpò sìgbè ŋusù gbalo nène.”

¹²Dàlilà yì ji èkà yeyea sɔ va bla ɛ̀ e yomè a, e do àpa be: “Samsɔ̀n, Filistìtɔwo va le ja le wò!” Àmèawo kpɔ̀tɔ̀ wla ɖo àxuea mè eye Samsɔ̀n so èkàa kpò sìgbè èkà fàflaa ɖe nène.

¹³Dàlilà gblɔ̃ na Samsɔ̀n be: “Wò gbà blè mù ke, gblɔ̃ àjè be ènyà na mù. To nyàwo fifì, gblɔ̃ àlekè wo ɖo la bla wòa.” Samsɔ̀n gblɔ̃ be: “Ne wò yì lɔ̃ èɖà pòpo adrɛ̃ kèwo lè èta na mù a ɖo àvɔ-lɔ̃ti mè eye wò sɔ àbuyɛ a sɔ trɔ̃ e mèa, eŋuã mù la gbɔjɔ sìgbè ŋusù ɖe kpò nène.”

¹⁴Kè be cɔ̃ Samsɔ̀n eye be dɔ̃ àlɔ̃ vɔ̀a, e pò èɖà adrɛ̃ kèwo be lɔ̃ ɖo àvɔ-lɔ̃ti mèa eye e sɔ àbuyɛ a sɔ trɔ̃ e mè na ɛ̀. Ekèa yomè a, e do àpa be: “Samsɔ̀n, Filistìtɔwo va la le wò!” Kè e fɔ̃ so àlɔ̃ mèa, Samsɔ̀n ɖè àbuyɛ a, eye be ɖè yebe èɖàwo lè àvɔ-lɔ̃tia mè.

¹⁵Dàlilà gblɔ̃ na ɛ̀ be: “Leke wò la nɔ gblɔ̃ be yè lɔ̃ mù vɔ̀a ye wò mu teŋu gblɔ̃ àpo àdɔ̀mènyà na mù ò? Kpɔɖa zè ètɔ̃ sɔ̃ŋu ye wò blè mù so ŋusɛ̃ wòa be sope ŋuti.”

¹⁶Kè e tɔ̀ be gbè sia gbè ye Dàlilà le do nupo na ɛ̀ kudo ènyà ɖèkaa, e va tìkɔ̀ na Samsɔ̀n,

¹⁷eye e gblɔ̃ èjìmè-nyaa na ɛ̀ be: “Wo mu kpà èɖà na mù gbèɖe kpɔ ò, ɖo wo ɖè mù ɖovò na Mawu so kaka ènɔ̀ nyè be àdɔ̀mè ke. Ne wo kpà èɖà na mù a, mù la trɔ sìgbè ŋusù ɖekpekpe kpò nène.”

¹⁸Dàlilà nya fifìa be e to nyàwo na yè eye e do àŋɛ̀ ɖoɖa Filistì be èfìɔviawo gblɔ̃ be: “Fifìa mì teŋu va ɖo e gblɔ̃ yebe èjìmè-nyaa na mù vɔ̀.” Eye èfìɔviawo hɛ̃ ègà kè ji wo pò èse ɖoa, ɖo àsi yì Dàlilà gbɔ.

¹⁹Kè Dàlilà cɔ̃ Samsɔ̀n eye be dɔ̃ àlɔ̃a, e na eye wo kpà èɖà pòpo adrɛ̃ kèwo lè èta na ɛ̀a. Eye Dàlilà sɔ ɛ̀ ɖo yebe ŋusɛ̃ gɔ̃mè, ɖo mu gbà ɖo ŋusɛ̃ ò.

²⁰Dàlilà do àpa gblɔ̃ na ɛ̀ be: “Samsɔ̀n! Filistìtɔwo va la le wò!” E fɔ̃ kpàtà kudo susu be yè la to lè e mè sìgbè sãa nène. Vɔ̀a, mu nya be Tɔhonɔ̀ ɖè àsi lè yè ŋuti ò.

²¹Eye Filistìtɔwo le è eye wo gbã ŋùkuviwo na ɛ̀. Wo kplɔ̀ ɛ̀ yì Gazà be èdùa mè. Funu ye wo do gàjɛ̃ be kɔ̀sɔ̀-kɔsɔ àfɔ̀wo na ɛ̀ lè gàkpamè fikè be tùnà èlù na wo lèa.

²²Funu kpò be kpɔ̀tɔ̀ lè eye yebe èɖàwo va tɔ toto.

²³Filistì be èfìɔviawo bɔ̀ gbè ɖèka ne woa wɔ̀ vɔsa gãaɖe na woabe vòdu Dagɔ̀n lè jìjɔ̀jɔɛ gãaɖe mè. Wo le gblɔ̃ be: “Miabe vòdua ye ɖè miabe kɛ̃tɔ Samsɔ̀n do àsi na mi.”

²⁴Ekè dùkɔ̃a kpɔ Dagɔ̀n, yebe vòdua, e gblɔ̃ be: “Miabe vòdua ye ɖè Samsɔ̀n, miabe èkɛ̃tɔa do àsi na mi. Àmè kè nyi dùkɔ̃a be sukpa eye e crɔ̃ àmè sùgbɔ fuua.”

²⁵Lè jìjɔɛ kpɔkpɔ gãa ŋua mèa, wo biɔ be woa kplɔ̀ Samsɔ̀n va ne bèa va do nukòkoe na yèwo. Wo dɔ̃, wo va yìa kplɔ̀ Samsɔ̀n lè ègàkpamè va eye yebe wɔ̀na le ɖì kòkoe na wo. Eye wo sɔ ɛ̀ ɖo èxɔ̀ gãa be sɔtìwo dòmè.

²⁶Samsɔ̀n gblɔ̃ na ɖèkajɛ kè le kplɔ̀ ɛ̀a be: “Kplɔ̀ mù yì sɔtì kèwo ji wo li èxɔ̀a ɖoawo gbɔ ne ma tɔ àsi wo, ma gba ɖo woa ŋuti.”

²⁷Vɔ̀, èxɔ̀a ɖɔ kudo àgbètɔ fuu. Èfìɔviawo cã sɔ̀gbè keŋu eye àmè kèwo lè èxɔ̀a be àwamè le kpɔ Samsɔ̀n be wɔ̀na, lè sìgbè àmè àkpe ètɔ̃ (3000) nène.

²⁸Samsɔ̀n fã yɔ Tɔhonɔ̀ gblɔ̃ be: “Mù ɖè kuku na wò Tɔhonɔ̀ Mawu, ɖo ŋùku ji nyè jro ne wòa gbìgbɔ̀ na mù ŋusɛ̃ na hùenu kèa kpò. Oò! Mawu wɔ̀ ekèa, na ma teŋu crɔ̃ Filistìtɔwo ɖo ŋùkuvi nyèwo tèpe.”

²⁹Eye Samsɔ̀n zɔ̃ glãsã glãsã ji sɔtì èvè kèwo lè èxɔ̀a be dòdòmèa. E sɔ ɖùsilɔa ɖo sɔtì ɖèka ŋuti eye e sɔ èmìɔ̃lɔa ɖo sɔtì èvègɔ̃a ŋuti.

³⁰E do àpa sɛ̃sɛ̃ɖe gblɔ̃ be: “Ma ku kudo Filistìtɔwo zè ɖèka!” Eye kudo yebe ŋusɛ̃a kpataa, e tùtù sɔtì èvèawo eye èxɔ̀a kpata mù jè èfìɔviawo kudo àmè kèwo keŋu lè funua ji. Àmè kèwo ku kudo èa, wo sùgbɔ wu àmè kèwo kpata be wù lè yebe àgbè mèa.

³¹Yebe xòmèa kudo nɔ̀viawo va sɔ yebe àmèkpòtia yì ɖì ɖo ètɔa Manɔà be èyɔ̀do mè lè Sorà kudo Ɛstaɔ̀l dòmè. Samsɔ̀n kplɔ̀ Izràɛl èpè èwì (20) sɔ̃ŋu.