Read gen Kòjoɖotɔwo 17 Bible Online

Kòjoɖotɔwo 17 - gen bible

Kòjoɖotɔwo 17

¹Lè Efràyim be èto-nyigbã jia, àmè ɖe lè funu kè wo yɔna be Mikà.

²E gblɔ̃ na ènɔa gbè ɖèka be: “Wò ɖo ŋùku be wo fĩ klòsalò-ga àkpe ɖèka èkà èvè takpo na wò eye wò sɛ̃kpɛ̃ na àmèa lè àpe ŋùku mèa! Nyàwoa fifìa ègà kèa lè gbɔ nyè, ɖo ènyè ye sɔ ɛ̀.” Ènɔa gblɔ̃ zè ɖèka be: “Tɔhonɔ̀ ne tu sì na wò èvi nyè!”

³Mikà trɔ sɔ klòsalò-gaa na ènɔa, vɔ̀ ènɔa le gblɔ̃ na ɛ̀ be: “Lè nyàwo toto mèa, mù ɖè ègà kèa ɖovò na Tɔhonɔ̀ ɖo èwò ŋuti èvi nyè. Ne wò srèa, wò la sɔ wɔ̀ klòsalò vòdu tata. Eŋuã trɔ xɔ̀ ɛ̀.”

⁴Eye kè Mikà gbà trɔ sɔ ègàa sɔ na ɛ̀a, ènɔa ɖè klòsalò-ga èkà-àtɔ̃ lè e ŋuti sɔ na àmè kè srènà ègàa. Àmè kèa li vòdu gbà sɔ klòsalò sɔ jɔ̀ ènu tata kè wo sɔ yì dà ɖo Mikà be àxomèa.

⁵Kè Mikà ŋutɔ ɖo sɛ̃sɛ̃ tèpe ɖo àxomèa, e na wo jɔ̀ ènu tata na ɛ̀ eye wo gbà li àxomè-vòduwo na ɛ̀. Eye e sɔ èvia ɖèka sɔ ɖo hũbonɔ ɖo sɛ̃sɛ̃a nu.

⁶Lè hùe ŋua nua, èfìɔ ɖekpe mu lè Izràɛl ò. Eye àmè sia àmè wɔ̀nà ènu kè jro èa.

⁷Levì ɖèkajɛ ɖe so Bɛtlɛhɛ̀m lè Yudà be kɔ̀ta mè, lè àmèjronugbe lè àgo ŋua ji.

⁸Levì kèa jo lè Bɛtlɛhɛ̀m Yudàtɔ̀ a le ji tèpe bu kè be la teŋu nɔ̀a. E va ɖo Efràyim be èto-nyigbã ji eye e yì kɔ̀ ɖo Mikà be àxomè.

⁹Mikà biɔ ɛ̀ sè be: “Fikɛ ye wò so ò?” E ɖo e ŋuti be: “Mù nyi Levì so Bɛtlɛhɛ̀m lè Yudà, mù le ji àfi kè mù la zɛ̃ a.”

¹⁰Mikà gblɔ̃ na ɛ̀ be: “Ci gbɔ nyè ne wòa nyi àpe àxuedo a be hũbonɔ. Mù la nɔ na wò klòsalò-ga èwo èpè sia èpè, gbà nɔ na wò nuɖùɖu kudo àwù kèwo keŋu hiã wòa.” Levìa yì bù e ŋuti kpɔ.

¹¹E yomè a, Levìa lɔ̃ be yèa nɔ̀ Mikà be àxomè, eye Mikà sɔ ɛ̀ sìgbè èvia jìji nène.

¹²Mikà ɖo Levìa hũbonɔ lè sɛ̃sɛ̃ kè be ɖo lè yebe àxomèa nu eye be na ɛ̀ tèpe lè àxuea mè.

¹³Eye Mikà gblɔ̃ lè ye ɖokoe mè be: “Fifìa mù nya be Tɔhonɔ̀ la wɔ̀ nyuɛ̃ na mù ɖo hũbonɔ kè mù ɖoa, nyi Levì.”