Read gen Kòjoɖotɔwo 21 Bible Online

Kòjoɖotɔwo 21 - gen bible

Kòjoɖotɔwo 21

¹Lè Mispà wàlɛbɛ kè Izràɛl be ŋusùwo bɔ̀ va yìa, wo kã àtãŋu gblɔ̃ be yèwo dòmètɔ ɖekpe mu la sɔ èvia nyɔ̃nù sɔ na Bɛnyamìn be èvi ŋusù ɖekpe la ɖè ò.

²Fifìa, Izràɛl be dùkɔ̃a va bɔ̀ lè Betɛ̀l. Izràɛlviwo nɔ̀ ànyi lè Mawu be ŋùkɔ̀ kaka va ɖo wètrɔ mè. Wo làmɔɛ̃ gbà fã àvi hèhè.

³Wo le gblɔ̃ be: “Tɔhonɔ̀, Izràɛl be Mawu jɔ̀gbè vuɛ̃ kɛ ye nyi ekèa ò? Nukɛ ŋuti fifìa, Izràɛl dùkɔ̃ wòa be kɔ̀ta ɖèka la gũ ɖo ò?

⁴Kè èŋù kèa, dùkɔ̃a fɔ̃ èzã, tù vɔsakpe ɖèka ɖo funu eye e wɔ̀ ènunana kudo ènumème be vɔsa lè vɔsakpea ji.

⁵Ekèa yomè a, Izràɛlviwo biɔ woa nɔ̀nɔwo sè be: “Lè Izràɛl be kɔ̀tawo kpata dòmèa àmè kɛwo ye mu yì bɔ̀ lè Tɔhonɔ̀ be ŋùkɔ̀ lè Mispà ò?” Nyàwo, woa kpata wo fìã be àmè ɖekpekpe àmè kè mu yì Tɔhonɔ̀ be ŋùkɔ̀ lè Mispà òa, jè na èku.

⁶Ɖo Bɛnyamìn be kɔ̀ta be ènu wɔ̀ ŋuzĩzĩ na Izràɛlviwo eye wo gblɔ̃ be: “So egbèa, Izràɛl be kɔ̀ta ɖe le gũ keŋu-keŋu.

⁷Nukɛ ye mi la wɔ̀ sɔ ji nyɔ̃nùwo na Bɛnyamìn be kɔ̀taa mètɔ kèwo kpɔ̀tɔ̀a ò? Ɖo mia ŋutɔwo, mi tànu lè Tɔhonɔ̀ be ŋùkɔ̀ be mi mu la sɔ miabe tùgbɛ̀jɛviwo na wo la ɖè gbèɖe ò.”

⁸Ènu kèa ŋuti wo biɔ sè be àmè ɖewo lè kɔ̀tawo dòmè kèwo mu yì Tɔhonɔ̀ be ŋùkɔ̀ lè Mispà ò maa? Eye wo kpɔ be àmè ɖekpe mu so Yabɛ̀s lè Gilead nyigbã ji va fikè Izràɛl be kɔ̀tawo bɔ̀ lèa ò.

⁹Nyàwo ye, ɖo wàlɛbɛ kè wo le hlɛ̃ àmèawoa, àmè ɖekpe mu so Gilead nyigbã ji lè Yabɛ̀s va ò.

¹⁰Eye Izràɛlviwo dɔ̃ ŋusùti hotu àdɛ̃ (12000) ɖoɖa Yabɛ̀s kudo ègbè do àsi kèa be: “Mì yì crɔ̃ Yabɛ̀s be dùkɔ̃a lè Gilead. Mì wù nyɔ̃nùwo kudo ɖèviwo cã.

¹¹Mì la wù ŋusùwo kpata kudo nyɔ̃nù kèwo ɖèsrɔ̃ kpɔa.”

¹²Ŋusùtiawo yì kè ɖo tùgbɛ̀jɛvi àlɔ̀ ènè (400) kèwo mu nya ŋusù òa ŋuti lè Yabɛ̀s. Wo kplɔ̀ wo va Silò be àsàɖa mè lè Kanàn.

¹³Izràɛlviwo bɔ̀ dɔ̃ àmè ɖoɖa Bɛnyamìn be kɔ̀ta lè Rimɔ̀n be àkpãa mè eye wo wɔ̀ ŋuti fàfa kudo wo.

¹⁴Eye Bɛnyamìnviwo trɔ gbɔ̀ va woabe èdùwo mè. Izràɛlviwo sɔ tùgbɛ̀jɛvi kèwo wo mu wù lè Yabɛ̀s òa, na wo ɖè. Vɔ̀, mu sù woa kpata nu ò.

¹⁵Bɛnyamìnviwo be ènu wɔ̀ ŋuzĩzĩ na Izràɛl be dùkɔ̃a ɖo Tɔhonɔ̀ ɖè èdo gãaɖe ɖo Izràɛl be kɔ̀taawo mè.

¹⁶Dùmèmègãwo gblɔ̃ be: “Àleke ye mi la wɔ̀ la ji nyɔ̃nù na Bɛnyamìnvi kpɔ̀tɛawo ò? Ɖo nyɔ̃nù mu gbà lè kɔ̀taa mè na wo ò.”

¹⁷Eye wo gbà gblɔ̃ be: “Wo ɖo la do xòmè na Bɛnyamìn be àmè kpɔ̀tɛawo ne kɔ̀ta ɖe mu gbà bu lè Izràɛl be kɔ̀tawo dòmè ò.

¹⁸Vɔ̀, mi mu la teŋu sɔ mia ŋutɔ be tùgbɛ̀jɛviwo na wo ne woa ɖè ò, ɖo mi fìã àjɔ̀gbè na Tɔhonɔ̀ ɖo ji.”

¹⁹Wo ɖo ŋùku be mu la dìdì ò, eye tùgbɛ̀jɛviwo la ɖù èpè sia èpè be àzãa na Tɔhonɔ̀ lè Silò, kè lè Betɛ̀l be èvègo lè èmɔ̃ kè so Betɛ̀l yì Sikɛ̀m be èdùa be èwèzɛ̃pe lè Lebònà be àpùgo.

²⁰Eye wo gblɔ̃ ètopòɖonya kèa na Bɛnyamìn be ŋusù kpɔ̀tɛawo be: “Mì yì wla ɖo vɛ̃-gblewo mè!

²¹Mì do èxa ɖo funu. Ne Silò be tùgbɛ̀jɛviwo to hòo la yì ɖuwèa, mìawo cã mìa to lè vɛ̃-gblèawo mè jè woa ji. Àmè sia àmè la le tùgbɛ̀jɛvi ɖèka lè woa dòmè eye be la kplɔ̀ ɛ̀ yì Bɛnyamìn be kɔ̀taa mè, be la trɔ zũ èsrɔ̃a.

²²Ne vlàvò, woa tɔ àlo woa nɔ̀viwo va biɔ mi ènyà ɖe a, mi la ɖo e ŋuti na wo be: “Mìa tɔ̀ jɔ̀! Vɔ̀ mì sè ènu gɔ̃mè na wo ɖo tùgbɛ̀jɛvi kèwo la nyi mia tɔ̀ lè Yabɛ̀s be àhùa mèa, mi sɔ wo na Bɛnyamìn be ŋusùwo, vɔ̀ mu sù woa nu ò. Kè e tɔ̀ be mu nyi mìawo ye sɔ tùgbɛ̀jɛviawo na òa, eŋuã mì mu kpɔ gble àtãŋu kè mì kãa hàɖe ò.”

²³Nène a ye Bɛnyamìn be ŋusùwo wɔ̀ ɖo àmègãwo be ètopòɖoa ji. Eye lè tùgbɛ̀jɛvi èwèɖutɔwo dòmèa, wo le nyɔ̃nù nenè kèwo hiã woa. Wo kplɔ̀ nyɔ̃nùawo yì woabe ècrɔ̃-nyigbã ji, yì tù èdùawo, sò woabe àxuewo ɖo funu.

²⁴Gà ŋua mèa, Izràɛlvi kpɔ̀tɛawo cã trɔ yì woabe ànyigbã vòvòvòwo ji lè woabe hɛ̃nu kudo kɔ̀tawo mè.

²⁵Lè hùe ŋua nua, èfìɔ mu lè Izràɛl-nyigbã ji ò. Àmè sia àmè wɔ̀nà ènu kè nyɔ ŋùmè na ye ŋutɔa.