Read gen Kòjoɖotɔwo 3 Bible Online

Kòjoɖotɔwo 3 - gen bible

Kòjoɖotɔwo 3

¹Tɔhonɔ̀ gble dùkɔ̃ ɖewo ɖɛ ne bèa sɔ do Izràɛlviwo kpɔ. Izràɛlvi kèwo mu kpɔ Kanàn xɔ̀xɔ be àhùawɔ̀pe ò, vɔ̀ wo va lè Kanàntɔ kèwo kpɔ̀tɔ̀awo dòmè.

²Ɖè kpò Tɔhonɔ̀ le ji la fiɔ ènu kè nyi àhùawɔ̀wɔ Izràɛl be jìjimè yeye kèwo mu wɔ̀ àhùa kpɔ òa.

³Nène a Tɔhonɔ̀ gble Filistìtɔwo be jiɖùɖu àtɔ̃, Kanàntɔwo kpata, Sidɔ̀ntɔwo kudo Hivìtɔ kèwo lè Libàn be ètoa ji so kaka Bal-Hɛrmɔ̀n be ètoa gbɔ va ɖo Lebò-Hamàt.

⁴Wo nyi dùkɔ̃ kèwo wo la sɔ do Izràɛlviwo kpɔ, sɔ nya ne wo la wɔ̀ ɖo ègbèɖèɖe kèwo Tɔhonɔ̀ do àsi na woa tɔgbewo to Mosè jia.

⁵Ekèa na be Izràɛlviwo nɔ̀ Kanàntɔwo, Hitì-tɔwo, Amɔrì-tɔwo, Perezì-tɔwo, Hivì-tɔwo kudo Yebusì-tɔwo dòmè.

⁶Izràɛlviwo yì ɖè nyɔ̃nùwo lè woa dòmè eye wo sɔ woabe nyɔ̃nùwo cã sɔ na wo eye wo sumɔ woabe vòduwo.

⁷Izràɛlviwo wɔ̀ ènu kè mu jɔ̀nàjì na Tɔhonɔ̀ òa, ɖo wo ŋlɔ̀be Tɔhonɔ̀ woabe Mawu a eye wo yì sumɔ vòdu Baal ku Aserà.

⁸Tɔhonɔ̀ do àdɔ̀mèze ɖo woa ŋuti eye be ɖè wo do àsi na Kucàn-Rìcatayìm kè nyi Mèzòpòtamìa be èfìɔa. E tɛ wo ɖo èto xɔ̀ èpè ènyi.

⁹Izràɛlviwo do àpa yɔ Tɔhonɔ̀ eye e tɔ̀ na wo. E sɔ hlùɛ̃tɔ Ɔtnìɛl kè nyi Kàlɛb be yomètɔ̀ Kenàz be èvi ŋusùa, na wo.

¹⁰Tɔhonɔ̀ be gbɔ̃gbɔ̃a va e ji eye e xɔ̀ ŋùkɔ̀ na Izràɛl dùkɔ̃a. E yì wɔ̀ àhùa kudo Mèzòpòtamìa be èfìɔ Kucàn-Rìcatayìm eye Tɔhonɔ̀ na e ɖù èfìɔa ji.

¹¹Ekèa yomè a, Izràɛlviwo nɔ̀ ŋuti fàfa mè xɔ̀ èpè èkà. Eye Kenàz be vi ŋusù Ɔtnìɛl ku.

¹²Eye Izràɛlviwo gbà le wɔ̀ ènu kè mu jɔ̀nàjì na Tɔhonɔ̀ òa ke. Ɖo ekèa ŋutia, Tɔhonɔ̀ do ŋusɛ̃ Mòab be èfìɔ Eglɔ̀n ɖo Izràɛl ŋuti.

¹³Eglɔ̀n yì ca èha kudo Amɔ̀n ku Àmàlɛk be viwo eye wo yì xa Izràɛlviwo, ɖù woa ji. Wo xɔ̀ Yerikò be èdùa.

¹⁴Izràɛlviwo nɔ̀ Mòab be èfìɔ Eglɔ̀n be ŋusɛ̃ gɔ̃mè xɔ̀ èpè woènyi.

¹⁵Izràɛlviwo do àpa yɔ Tɔhonɔ̀ eye e tɔ̀ na wo. E na wo Bɛnyamìn be kɔ̀ta mè vi Ehùd kè nyi Gerà be vi ŋusùa. Èmìɔnu be wɔ̀nà. Izràɛlviwo sɔ ènunanawo yì na Mòab be èfìɔ Eglɔ̀n. Eye Ehùd ye nɔ̀ ŋùkɔ̀ na ènunanawo.

¹⁶Ehùd wɔ̀ èwui ɖaɖa ènu-èvè. Èwuia dìdì àbɔ mamã mè eye Ehùd sɔ bla ɖo yebe ɖùsi be àta ŋuti lè àwù gɔ̃mè.

¹⁷Ehùd yì la sɔ ènunana sɔ na Mòab be èfìɔ Eglɔ̀n kè nyi àmè lòlo gòɖòa.

¹⁸Wàlɛbɛ kè be sɔ ènunana fiɔ vɔ̀a, Ehùd kplɔ̀ àmè kèwo kpe ɖo e ŋutia eye wo jo.

¹⁹Vɔ̀, kè wo ɖo Gilgàl lè èkpe-vòduwo gbɔa, Ehùd trɔ va, gblɔ̃ na èfìɔa be: “Èfìɔ bùbùtɔ, mù ɖo àŋɛ̀ veveɖe la do na èwò ɖèka pɛɛ.” Eye èfìɔa na ègbè yebe ŋutimewo be woa na yèwo àsà.

²⁰Ehùd tètè gogo èfìɔa wàlɛbɛ kè be nɔ̀ ànyi lè èxɔ̀ fàfa mè lè àsãŋua jia. Ehùd gblɔ̃ na ɛ̀ be: “àŋɛ̀ kèa so Mawu gbɔ na wò.” Eye èfìɔa sitè lè yebe fìɔzìkpea ji.

²¹Ehùd lìɔ yebe èwui kè be bla ɖo ɖùsi be àta ŋutia kudo yebe èmìɔ̃ lɔa eye e sɔ èwuia trɔ̃ èfìɔa be pòdo mè.

²²Èwuia bu ɖo èfìɔa be pòdo mè kaka àtia ŋutɔ mu gbà le ze ò eye èlãa bu ì keŋu-keŋu ɖo Ehùd gble èlãnua ɖo èfìɔa be pòdo mè,

²³kè e yì tu èhɔ̃a, do e mè sãfe lè àdɔ̀mè vɔ̀a, e to ŋùgbe be àlìdoe jo.

²⁴Kè e jo vɔ̀ e yomè a, èfìɔa be ŋutimewo va eye wo kpɔ be hɔ̃truawo lè tutu. Wo susu be èfìɔa yì àfɔ̀ ji ye.

²⁵Wo nɔ̀tè kaka vɔ̃vɔ̃ va le ɖo wo, co èfìɔa mu le hũ hɔ̃truawo ò. Eye woawo ŋutɔ sɔ sãfe do èhɔ̃a mè, hũ ì eye wo kpɔ èfìɔa gbajigbàjì lè ànyigbã, lè kuku.

²⁶Wàlɛbɛ kè wo le làlàa, Ehùd si. E jè àgbàgba to èkpe be vòduawo ŋuti eye e ɖota Seirà.

²⁷Kè e ɖo funua, e ku èzè lè Efràyim be ètoawo ji. Eye Izràɛlviwo ɖì so ètokɔ̃ɛwo ji. Ehùd xɔ̀ ŋùkɔ̀ na wo.

²⁸E gblɔ̃ na wo be: “Mì kplɔ̀ mù do, ɖo Tɔhonɔ̀ ɖè mìabe kɛ̃tɔ Mòab-tɔwo do àsi na mì.” Izràɛlviwo kplɔ̀ Ehùd do eye wo yì xɔ̀ tèpe kèwo wo sònà Yɔrdàn be ètɔ̀a lèawo kpata. Wo mu na èmɔ̃ àmè ɖekpe sò ètɔ̀a ò.

²⁹Lè ŋùkèkè ŋua jia, wo wù Mòab be ŋusùtiwo sìgbè hotu àtɔ̃ (10000) nène eye àmè ɖekpe mu si lè woa nu ò.

³⁰Gbè ŋua gbè Mòab-tɔwo jo èta na Izràɛlviwo eye Izràɛl nɔ̀ ŋuti fàfa mè èpè èkà èvè sɔ̃ŋu.

³¹Lè Ehùd be hùenu yomè a, Anàt be vì ŋusù Camgàr xɔ̀ ŋùkɔ̀ na Izràɛl. E sɔ ènyì-kplɔ̀kpò sɔ wù Filistì-tɔ àlɔ̀ àdɛ̃ (600). Eye e cã hlùɛ̃ Izràɛl.