Read gen Kòjoɖotɔwo 4 Bible Online

Kòjoɖotɔwo 4 - gen bible

Kòjoɖotɔwo 4

¹Izràɛlviwo gbà tɔ ènu kè mu jɔ̀nàjì na Tɔhonɔ̀ òa wɔ̀wɔ ji. Ehùd ya ku xoxo vɔ̀.

²Eye Tɔhonɔ̀ ɖè wo do àsi na Yabìn, Kanàntɔwo be èfìɔ kè lè Hasɔ̀r be èdùa mèa. Èfìɔ Yabìn be àhùaga be nyikɔ ye nyi Sìzerà; e nɔ̀nà Harosɛ̀t-Goyìm.

³Izràɛlviwo do àpa yɔ Tɔhonɔ̀, ɖo Yabìn ɖo gàkpo be àhùakèkevivi àlɔ̀ àsiɖèkɛ (900) eye e tɛ Izràɛlviwo ɖo ànyi èpè èwì (20) sɔ̃ŋu.

⁴Lè hùe ŋua nua, Mawu be gblɔ̃ɖɛtɔ Làpidɔ̀t be nyɔ̃nù Dèborà ye ɖona kòjo na Izràɛlviwo.

⁵E nɔ̀nà ànyi ɖo dèti gɔ̃mè lè Ramà kudo Betɛ̀l be dòdòmè, lè Efràyim be ètoa ji. Funu a ye Izràɛlviwo sɔna woabe ènyàwo va kpɔna ɛ̀ lè.

⁶Gbè ɖèkaa, Dèborà dɔ̃ wo yɔ Abinɔ̀am be èvi ŋùsù, Bàrak kè nɔ̀nà Kedɛ̀s, lè Neftalì-nyigbã ji, eye be gblɔ̃ na ɛ̀ be: “Ègbè kè Tɔhonɔ̀, Izràɛl be Mawu a le do àsi na wòa ye kè: “Yì bɔ̀ ŋusùti hotu àtɔ̃ (10000) lè Neftalì kudo Zabulɔ̀n be kɔ̀tawo mè, ne wòa kplɔ̀ wo yì Tabɔ̀r be ètoa ji.

⁷Mù la do àdã èta mè na èfìɔ Yabìn be àhùaga Sìzerà. E la sɔ yebe àhùakèkevivi kudo àhùawɔ̀viwo la va wɔ̀ àhùa kudo wò lè Kicɔ̀n be ètɔ̀a to. Mù la ɖè wo do àsi na wò.”

⁸Baràk ɖo e ŋuti na Dèborà be: “Ne wò la yì kudo mù a, eŋuã ma yì, vɔ̀ ne wò mu la yì òa, nyè cã nyè mu la yì ò.”

⁹Dèborà gblɔ̃ na ɛ̀ be: “Mù la yì kudo wò, vɔ̀ wò mu la kpɔ gogo ɖekpe xɔ̀ lè èdɔ kèa mè ò, ɖo nyɔ̃nù ɖe ye Tɔhonɔ̀ la ɖè Sìzerà do àsi na.” Eye Dèborà yì Kedɛ̀s kudo Baràk.

¹⁰Funua, Baràk bɔ̀ Zabulɔ̀n kudo Neftalì be kɔ̀tawo eye ŋusùti hotu àtɔ̃ lɔ̃ be yèwo la kplɔ̀ ɛ̀ do. Dèborà cã lè kudo è.

¹¹Lè Kedɛ̀s be èdùa gbɔa, Kenì-vi Hebɛ̀r tù yebe gòxɔ ɖo funu lè Sànamìn be àti gã gbɔ. Hebɛ̀r jo lè Kenì-vi kpɔ̀tɛ kèwo nyi Hobàb be jìjimèviwo gbɔ. Hobàb nyi Mosè be èsrɔ̃ be xòmètɔ.

¹²Wo gblɔ̃ na Sìzerà be Abinɔ̀am be vi Baràk lè Tabɔ̀r be ètoa ji.

¹³Eye Sìzerà bɔ̀ yebe àhùakɔ̃ kudo yebe gàkpo be àhùakèkevivi àlɔ̀ àsiɖèkɛawo so Hàrosɛ̀t-Goyìm eye wo yì Kicɔ̀n be ètɔ̀a to.

¹⁴Dèborà gblɔ̃ na Baràk be: “Sitè fifì ɖo ŋùkèkè kèa ji Tɔhonɔ̀ ɖè Sìzerà do àsi na wò. Ɛ̃ɛ, Tɔhonɔ̀ ŋutɔ le wɔ̀ àhùa lè ŋùkɔ̀ na wò.” Eye Baràk ɖì so Tabɔ̀r-toa ji kudo yebe ŋusùti hotu àtɔ̃awo.

¹⁵Tɔhonɔ̀ nyà Sìzerà kudo yebe àhùakɔ̃a kpata ɖo ègbe lè Baràk be ŋùkɔ̀. E glo Sìzerà, e ɖè àsi lè yebe àhùakèkevivia ŋuti eye be si kudo àfɔ̀.

¹⁶Baràk nyà Sìzerà be àhùakɔ̃a ɖo nu kaka yì kɔ̀ ɖo Hàrosɛ̀t-Goyìm. E wù wo keŋu-keŋu kudo èwui eye àmè ɖekpe mu kpɔ̀tɔ̀ ò.

¹⁷Vɔ̀ Sìzerà ya pu dù si kaka yì kɔ̀ ɖo Kenì-vi Hebɛ̀r be èsrɔ̃ Yàɛl be gòxɔ gbɔ. Ɖo ŋuti fàfa lè Hasɔ̀r be èfìɔ Yabìn kudo Hebɛ̀r be àxuedo a dòmè.

¹⁸Yàɛl to yì dogò è gblɔ̃ be: “Àhùaga nɔ̀tè, va wla ɖo gbɔ nyè fàa, mù gbà vɔ̃ ò.” Sìzerà lɔ̃ yì ɖo gòxɔa mè eye Yàɛl wla ɛ̀ ɖo kùŋùtu gɔ̃mè.

¹⁹Sìzerà gblɔ̃ na Yàɛl be: “Mù ɖè kuku, na mù èsì vi ɖe ma nù, ɖo èsìkɔ le tì mù.” E yì sɔ nyìnɔsi be ègòa eye be na ɛ̀ nyìnɔsi be nù. E yomè a e trɔ sɔ kùŋùtua cɔ̃ na ɛ̀.

²⁰E gblɔ̃ na Yàɛl be: “Yì nɔ̀ gòxɔ̀ a mɔ̃nu, eye ne àmè ɖe va biɔ wò sè be: “Àmè ɖe va fikè a mà?” Wò la ɖo e ŋuti be: “Ào.”

²¹Kè ye ènu tìkɔ̀ na Sìzeràa, e dɔ̃ àlɔ̃ kubòbò. Eye Hebɛ̀r be srɔ̃ Yàɛl sɔ àti ènùu piɖoe kudo hãmà. E wɔ̀ kɛɖɛ kɛɖɛ yì fikè Sìzerà mlɔ̃ a eye be pò àtia ɖo èto mè na ɛ̀, ŋɔ ɛ̀ jè e godo kaka ɖo ànyigbã mè. Eye Sìzerà ku.

²²Baràk kè le ji Sìzerà pòhlaa, va kɔ̀ ɖo funu. Eye Yàɛl to yì dogò, e gblɔ̃ be: “Va kpɔ àmè kè wò le jia ɖa!” E yì eye e kpɔ Sìzerà kuku lè ànyigbã. Àtìa to èto mè na ɛ̀ ɖì ɖo ànyigbã mè.

²³Gbè ŋua gbèa Mawu na Izràɛlviwo ɖù Kanàn be èfìɔ Yabìn ji.

²⁴Eye Izràɛlviwo le tĩ Kanàn be èfìɔ Yabìn yomè kaka ye wo va wù ì.