Read gen Kòjoɖotɔwo 7 Bible Online

Kòjoɖotɔwo 7 - gen bible

Kòjoɖotɔwo 7

¹Ŋùdekɛ̃nyɛ fùtù ye Gideɔ̀n, kè wo gbà yɔna be Yèrubaal, so jè èmɔ̃ kudo dùkɔ̃ kè kpata xɔ̀ ègbè na ɛ̀a eye wo yì do àsàɖa ɖo Eìn-Hàrod be èsìa gbɔ. Madìan be àsàɖa lè èvègo ɖa, lè Mɔ̀re be èto-via gbɔ lè ègbegbà ji.

²Tɔhonɔ̀ gblɔ̃ na Gideɔ̀n be: “Àhùakɔ̃ wòa sùgbɔ ŋutɔ, ne ma do Madìantɔwo àsi na wò. Izràɛlviwo la va susu be yèwo be ŋusɛ̃ ye na yèwo ɖùji eye wo la sɔ gogo kè nyi tɔ̀ nyèa sɔ wɔ̀ woa tɔ̀.”

³Ɖo ekèa ŋuti a, gblɔ̃ na àhùakɔ̃a be: “àmè kèwo keŋu vɔ̃vɔ̃ le ɖo eye wo le hũhũawo nɔ trɔ to Gilead be ètoa ji ne woa yì woa de.” Àmè hotu woeɖèka (22000) trɔ lè àhùakɔ̃a ŋuti zè ɖèka eye e kpɔ̀tɔ̀ àmè hotu àtɔ̃ (10000).

⁴Co Tɔhonɔ̀ gblɔ̃ na Gideɔ̀n be: “Àhùakɔ̃ wòa gbà sùgbɔ ŋutɔ. Kplɔ̀ wo yì ètɔ̀ to, ne ma cã woa mè na wò. Mù la ɖè àmè kè ɖo la kplɔ̀ wò do a, kudo àmè kè mu ɖo la kplɔ̀ wò do òa, fiɔ wò.”

⁵Gideɔ̀n kplɔ̀ yebe àhùakɔ̃a yì ètɔ̀a to. Eye Tɔhonɔ̀ gblɔ̃ na ɛ̀ be: “Ɖè àmè kèwo la sɔ àlɔ̀ èvèawo kù èsìa, la ɖiɖɔ ɛ̀ ku àɖe sìgbè àlekè àvũ ɖiɖɔna èsì nènea ɖovò. Eye àmè kèwo la jèklò, la do ènu èsìa mè la nù ìawo cã, ɖovò.”

⁶Àmè kèwo sɔ àlɔ̀ èvè kù èsìa, ɖiɖɔ ɛ̀ sìgbè àvũ nènea, be hɛ̃hlɛ̃ mè lè àlɔ̀ ètɔ̃. Àmè kpɔ̀tɛawo kpata jè èklò, nù èsìa.

⁷Tɔhonɔ̀ gblɔ̃ na Gideɔ̀n be: “Ɛ̃ɛ mù la hlùɛ̃ mì to àmè àlɔ̀ ètɔ̃ kèawo ji eye mù la ɖè Madìan-tɔwo do àsi na wò. Na àmè kpɔ̀tɛawo nɔ trɔ yì woabe àxuewo mè.”

⁸Eye kè Gideɔ̀n xɔ̀ nuɖùɖu kudo èzèawo lè àmè kèwo jèklò, nù èsìa si vɔ̀a, e ɖo wo ɖoɖa woa de. Vɔ̀ àmè àlɔ̀ ètɔ̃awo ci ànyi kudo è. Madìan-tɔwo do àsàɖa ɖo Izràɛlviwo be gɔ̃mè ɖaa lè ègbegbà ji.

⁹Lè èzã ŋua mè zè ɖèkaa, Tɔhonɔ̀ gblɔ̃ na Gideɔ̀n be: “Sitè ne wòa yì xa Madìan-tɔwo be àsàɖaa, ɖo mù ɖè è do àsi na wò.

¹⁰Vɔ̀ ne wò le vɔ̃a, kplɔ̀ sumɔ̃vi wò Purà ɖo ŋuti yì jè ŋùkɔ̀.

¹¹Eye ènyà kè wò la yì sèa, la do wò ŋusɛ̃ ne wòa va yì xa wo. Gideɔ̀n kplɔ̀ yebe sumɔ̃vi Purà ɖo ŋuti yì kaka àsàɖa be tɔtɔ ji.

¹²Madìantɔwo, Àmàlɛktɔwo kudo èwèzɛ̃pe be ŋusùwo kpata kãkã ɖo zògbèa ji. Wo sùgbɔ sìgbè hùesuviwo nène eye wo ma teŋu hlɛ̃ woabe èsɔ-kpotɔnɔ̀wo ò, ɖo wo sùgbɔ sìgbè àpùta-kɔ nène.

¹³Kè wo ɖo funua, ŋusù ɖèka le gblɔ̃ èdrɔ̃ɛ kè be kua na èxlɔ̃a be: “Mù kpɔ lè èdrɔ̃ɛ mè be kpɔ̃nɔ kãkã ɖe le mlì lè miabe àsàɖa mè kaka yì lɔ ègòxɔ ɖe ye ègòxɔa mù kãkã keŋu-keŋu.”

¹⁴Èxlɔ̃a ɖo e ŋuti be: “Ekèa mu la teŋu nyi ènu bu wu Izràɛlvi kè nyi Yòas be vi Gideɔ̀n be èwui ò. Ɖo Mawu ɖè mi kudo àsàɖaa kpata do àsi na ɛ̀.”

¹⁵Wàlɛbɛ kè Gideɔ̀n sè èdrɔ̃ɛa be ènyàtiwo kudo gɔ̃mè ɖèɖea, e bɔ̀bɔ̀ do ènugũ na Mawu. E yomèa, e trɔ gbɔ̀ va Izràɛl be àsàɖa mè eye e do àpa gblɔ̃ be: “Mì sitè, ɖo Tɔhonɔ̀ ɖè Medìan-tɔwo do àsi na mì.”

¹⁶Gideɔ̀n mã yebe àhùakɔ̃ àlɔ̀ ètɔ̃a ɖo àkpa ètɔ̃. E na àmè sia àmè èzè ɖèka, tɔ̀mèdèze gbalo ɖèka kudo èzòti-kãligbɛ̃ ɖèka kè wo la sɔ do tɔ̀mèdèzea mèa.

¹⁷E gblɔ̃ na wo be: “Mìa nɔ kpɔ gbɔ nyè ne mìa wɔ̀ ènu kè mù la wɔ̀, ne mù ɖo Medìantɔwo be àsàɖa gbɔ tututua.

¹⁸Ne mù ku èzèa eye àmè kèwo bɔ̀ ɖo ŋuti nyèawo cã ku ìa, mìa cã mìa ku ì trɔ do eye mìa do àpa lelele gblɔ̃ be: “Na Tɔhonɔ̀ ku Gideɔ̀n.”

¹⁹Èzã gà woèvè lɔ̀gea, Gideɔ̀n kudo àmè àlɔ̀ ɖèka kè kplɔ̀ ɛ̀ doawo va ɖo Medìan be àsàɖa be lipòa to. Wo ɖɔ̀lì èmɔ̃jikpɔtɔwo lè àsàɖa mè vɔ̀. Wo ku woabe èzèawo eye wo gbã tɔ̀mèdèze kèwo lè woa sìa.

²⁰Àkpa èvè kpɔ̀tɛawo cã wɔ̀ nènea. Woa kpata, wo le èzòti-kãligbɛ̃awo ɖo èmiɔ-lɔ mè eye ɖùsi-lɔa lè èzèawo. Wo do àpa sɛ̃sɛ̃ɖe gblɔ̃ be: “Na Tɔhonɔ̀ ku Gideɔ̀n.”

²¹Wàlɛbɛ kè Izràɛlviwo kpɔ̀tɔ̀ lè tèpe ɖèka trɔdo Medìan be àsàɖaa, Madìan-tɔwo ŋutɔ tɔ àpa dodo, ku èdù, tɔ sìsi.

²²Eye ekè àmè àlɔ̀ ètɔ̃awo ku woabe èzèawoa, Tɔhonɔ̀ na ye Madìan-tɔwo ɖè èwui ɖo woa nɔ̀nɔwo ji crɔ̃ woa ɖokoe. Àmè kèwo ci àgbèawo si yì kaka Bɛt-Sità lè Sèrerà gbɔ lɔ̀ge, èɖewo yì kaka Abɛ̀l-Mèholà be ètɔ̀a to lè Tabàt gbɔ.

²³Nène a wo biɔ so Izràɛl ŋusù kèwo lè Neftalì, Àsɛr kudo Manasè be kɔ̀tawo mèa be woa nyà Medìantɔwo àfɔsi-àfɔsi.

²⁴Gideɔ̀n dɔ̃ àmè ɖoɖa Efràyim be èto-nyigbã ji gblɔ̃ be: “Mìa kpata mì ɖì yì xɔ̀ èsìdowo kaka kɔ̀ ɖo Bɛt-Barà kudo Yɔrdàn be sòpewo ne mìa xe èmɔ̃ na Medìan-tɔwo.” Wo bɔ̀ Efràyim be ŋusùwo eye wo yì xɔ̀ Yɔrdàn be sòpewo kpata kaka va ɖo Bɛt-Barà.

²⁵Wo le Medìan be àhùaga èvè: Òrɛb kudo Zɛb. Wo wù Òrɛb lè àkpã ɖe kè wo na nyikɔ be Òrɛb be àkpã gbɔ eye wo wù Zɛb lè vɛ̃fiɔ̃nu kè wo na nyikɔ be Zɛb be vɛ̃fiɔ̃nua gbɔ. Wo yì woabe àzɔ̃lìa ji, nyà Madìan-tɔwo. Wo sò Òrɛb kudo Zɛb be ètawo va na Gideɔ̀n lè Yɔrdàn-tɔ̀a godo.