Read gen Kòjoɖotɔwo 9 Bible Online

Kòjoɖotɔwo 9 - gen bible

Kòjoɖotɔwo 9

¹Yèrubaal be vi Abimèlɛk, trɔ yì Sikɛ̀m lè nyìneawo gbɔ. E pò nupo na wo kudo ènɔa be xòmèa gblɔ̃ be:

²“Mì yì biɔ dùmè mègãwo sè be wo le ji be àmè ɖèka ne kplɔ̀ yèwo loo, àlo Yèrubaal be vi èkà takpo ci èwoawo mà a? Vɔ̀ mì ɖo ŋùku nyuɛ̃ ɖe be nyè kudo mì, mi nyi xòmè ɖèka.”

³Abimèlɛk be nyìneawo yì ɖo ègbèa tututu na dùmè mègãwo lè Sikɛ̀m nyigbã kpata ji eye wo xɔ̀ ègbè ɖo yebe ènyàa ji, ɖo wo le gblɔ̃ be yèwo nɔ̀vi be nyi.

⁴Wo wɔ̀ klòsalò-ga èkà takpo ci èwo kè wo sɔ lè vòdu Baal-Berì gbɔa sɔ na Abimèlɛk. E sɔ klòsalò-gaa sɔ yì dà yàkàmewo kudo àgbãtèsɔtɔwo bɔ̀ ɖo ye ɖokoe ŋuti.

⁵Eye e yì Ɔfrà lè ètɔa be àxomè yì wù ètɔa Yèrubaal be èviwo keŋu lè funu. Lè àmè èkà takpo ci èwoa mèa, Yotàm, ɖèvi vifɛ̃a kpò ye ci àgbè, ɖo e si yì wla.

⁶Sikɛ̀m be dùmè mègãwo kudo Bɛt-Milò be àmèwo kpata bɔ̀ eye wo yì ɖo Abimèlɛk èfìɔ lè Sikɛ̀m be àti gãa gɔ̃mè.

⁷Wo yì gblɔ̃ ɛ̀ na Yotàm eye be yì lia Gàrizìm be ètoa be ta mè boo. So funua, e do àpa lelele gblɔ̃ be: “Mìa Sikɛ̀m be ŋusùwo, mì ɖoto mù ne Mawu ne sè mìabe ègbè.

⁸Gbè ɖèkaa, àtiwo kpata bɔ̀ be yèwoa ɖo èfìɔ kè la nɔ kplɔ̀ yèwo. Wo gblɔ̃ na àmìti be: “Ɖù èfìɔ na mi!”

⁹Àmìtia ɖo e ŋuti na wo be: “Mì xɔ̀sè be ma gbe àmì nyè kè Mawu ku àgbètɔwo jina nènea wɔ̀wɔ ne ma va nɔ gbã èta be mù le kplɔ̀ àtiwo a?”

¹⁰Eye àtiwo trɔ ɖo vòti ŋuti gblɔ̃ be: “Èwò ya! Va ɖù èfìɔ na mi!”

¹¹Vɔ̀ vòti cã gblɔ̃ na wo be: “Yɔ̀a! Mì xɔ̀sè be mù la gble àtikusɛ̃sɛ̃ vivi ŋɔnɔ nyèa ɖɛ, la va nɔ gbã èta be mù le kplɔ̀ àti kpɔ̀tɛawoa?”

¹²Ekèa na be wo yì vɛ̃ti gbɔ, gblɔ̃ na ɛ̀ be: “Va ɖù èfìɔ na mi!”

¹³Eye vɛ̃ti cã ɖo e ŋuti be: “Mì susu be mù la gbe vɛ̃ kè dona jìjɔɛ na vòduwo kudo àgbètɔwoa nana, la va nɔ gbã èta ɖo àtiwo be kpɔ̀kplɔ ŋutia?”

¹⁴Nène a, àtiawo kpata gblɔ̃ na àŋùjati be: “Va ɖù èfìɔ na mi!”

¹⁵Vɔ̀ àŋùjati gblɔ̃ na àtiawo kpata be: “Ne nyàwo mì ji be ma nyi mìabe èfìɔa, eŋuã, mì va nɔ̀ àpe àwà gɔ̃mè. Vɔ̀ ne mì mu wɔ̀ ɖo ènyà kè mì gblɔ̃a ji òa, èzò gãaɖe ne to so àŋùjati nyèa mè ne bèa fiɔ̃ sedàti kèwo keŋu lè Libàn be ètoa jia!”

¹⁶Yotàm yì e ji gblɔ̃ be: “Fifìa ɖe! Ènu nyuɛ̃ ye mì wɔ̀ kè mì sɔ Abimèlɛk èfìɔa? Ènu kè mì wɔ̀ kudo Yèrubaal be xòmèa sɔ̀gbèa? Fɛ̃tu kè jè na ɛ̀a, ye ŋua?

¹⁷Ètɔ nyè wɔ̀ àhùa ɖo mìa ta, e sɔ yebe àgbèa na fàa sɔ hlùɛ̃ mì lè Madìan-tɔwo si.

¹⁸Eye egbèa, mì sitè ɖo ètɔ nyè be xòmèa ŋuti, mì wù èviawo, àmè sìgbè èkà takpo ci èwo nène zè ɖèka. Eye mì sɔ Abimèlɛk kè yebe sumɔ̃vi nyɔ̃nùa jì na ɛ̀a sɔ ɖo èfìɔ lè Sikɛ̀m, ɖo e nyi mìabe nyìneyɔvi.

¹⁹E nyɔ fifìa, ne kudo èjì mè fàa ku jɔ̀jɔɛ ye mì sɔ wɔ̀ ènu kèa kudo Yèrubaal be xòmèa, eŋuã Abimèlɛk ne na ènuwo ne zɔ̃ sùu na mì eye mìa cã mìa na ènuwo ne zɔ̃ sùu na ɛ̀.

²⁰Vɔ̀a, ne mu nyi nène òa, èzò gãaɖe ne to so Abimèlɛk mè ne bèa fiɔ̃ Sikɛ̀m be dùmè mègãwo kudo Bɛt-Milò keŋu; eye èzò gãaɖe ne to so Sikɛ̀m be dùmè mègãwo kudo Bɛt-Milò mè, ne bèa fiɔ̃ Abimèlɛk.”

²¹Ekèa yomè a, Yotàm si yì wla ɖo Berà, ɖo e le vɔ̃ ètɔa be vi Abimèlɛk.

²²Abimèlɛk kplɔ̀ Izràɛl be èdùa xɔ̀ èpè ètɔ̃,

²³eye Mawu do mamã be gbɔ̃gbɔ̃ Abimèlɛk kudo Sikɛ̀m be àmègãwo dòmè eye wo sitè ɖo Abimèlɛk ŋuti.

²⁴Nène a ye woa kpata wo la tu èhlɔ̃ kè wo dãa be èfɛ̃. Abimèlɛk, ɖo e wù ètɔa be èvi èkà takpo ci èwoawo (70); Sikɛ̀m-tɔwo, ɖo wo dà àsi ɖo èhlɔ̃dãdã kèa ji.

²⁵Ne woa do èkpò àta mè na Abimèlɛk-a, Sikɛ̀m-tɔwo sɔ àmèwo ɖo ètowo tamè ne woa nɔ xɔ̀ ènu lè èmɔ̃zɔ̃tɔ kèwo le zɔ̃ èmɔ̃awo si. Wo yì gblɔ̃ ɛ̀ na Abimèlɛk.

²⁶Wàlɛbɛ ŋua Evɛ̀d be èvi ŋusù Gaal, va zɛ̃ Sikɛ̀m kudo nɔ̀viawo eye dùmè mègãwo do èjì ɖo e ŋuti, sɔ ŋusɛ̃ na ɛ̀.

²⁷Wo yì vɛ̃-gblea mè, gbã vɛ̃kusɛ̃sɛ̃ eye wo fiɔ̃ vɛ̃kusɛ̃sɛ̃awo be èsìa. E yomè a wo ɖù àzã kpɔ jìjɔɛ. Wo yì ɖù gbà nù lè Sikɛ̀m-tɔwo be vòdukpa mè, eye wo sɛ̃kpɛ̃ na Abimèlɛk.

²⁸Evɛ̀d be vi Gaal gblɔ̃ be: “Àmè kɛ ŋùku mè ye nyi Abimèlɛk lè Sikɛ̀m be ŋùkɔ̀ ne mia nyi yebe kluviwo ò? Yèrubaal be èvia kudo yebe àhùaga Zevùl mu nyi kluviwo na Sikɛ̀m be ètɔ Hamɔ̀r va yìa? Nukɛ ŋuti mi la va nyi kluvi na wo fifì ò? Gbèɖe!

²⁹Aà! Ne wo kè sɔ Sikɛ̀m do àsi na mù a, mù kè xɔ̀ èdùa lè Abimèlɛk si.” Eye e gblɔ̃ so Abimèlɛk ŋuti be: “Ne e nyi ŋusù nyàwoa, ne sitè kudo yebe àhùakɔ̃a ne bèa va wɔ̀ àhùa kudo mù.”

³⁰Wàlɛbɛ kè àhùaga Zevùl kè le kpɔ èdùa jia, sè Gaal be ènyà, e do àdɔ̀mèze ŋutɔ.

³¹E dɔ̃ àmè lè bèbe mè ɖoɖa Abimèlɛk gblɔ̃ be: “Nya be Evɛ̀d be vi Gaal va ɖo Sikɛ̀m kudo nɔ̀viawo eye wo le tɔ̀zĩ èdùa ɖo ŋuti wò.

³²E la nyɔ fifìa be wò kudo àhùakɔ̃ wòa, mìa do èxa na ɛ̀ lè ègbegbàji èzã kèa mè.

³³Eye ŋùdekɛ̃nyɛ fùtù, gbɔ̀xue èwè la zɛ̃ a, mìa yì xa Sikɛ̀m-dùa àlekea be ne Gaal kudo yebe ŋutimewo va toa, mìa teŋu dɔ̃to na wo àlekè e jèa.”

³⁴Lè èzã kè kplɔ̀ ɛ̀ do a mèa, Abimèlɛk kudo yebe àhùakɔ̃a mã ɖo àkpa ènè, eye wo yì do èxa ɖo Sikɛ̀m be èdùa gbɔ tututu.

³⁵Wàlɛbɛ kè Gaal to jè èdùa be àgbo nua, Abimèlɛk kudo àmè kèwo lè kudo èa, wo to, zɔ̃ ɖo woa ji.

³⁶Kè Gaal kpɔ woa, e gblɔ̃ na Zevùl be: “Kpɔ àhùakɔ̃ ɖe so ètoa ji gbãnà.” Vɔ̀a Zevùl ɖo e ŋuti be: “Aò, ètowo be vɔ̃vɔ̃lì ye wò le kpɔ be àhùakɔ̃.”

³⁷Vɔ̀a Gaal tɛ ègbè ɖo ènyàa ji gblɔ̃ be: “Aò kpɔɖa! Àhùakɔ̃ ɖe gbãnà so èto dòdòmè tɔ̀a gbɔ eye èbu cã so Mɔ̀re be àti gãa gbɔ lɔ̀ge gbãnà.”

³⁸Eye Zevùl gblɔ̃ na ɛ̀ be: “Àtãŋu kè wò le kã sãa ɖe? Mu nyi èwò ye le gblɔ̃ be: “Àmè kɛ ye nyi Abimèlɛk ne mia nyi yebe kluvi òa? Fifìa yì ne wòa ɖè ènu kè wò nyia fiɔ!”

³⁹Gaal xɔ̀ ŋùkɔ̀ na Sikɛ̀m-tɔwo eye wo yì wɔ̀ àhùa kudo Abimèlɛk.

⁴⁰Abimèlɛk nyà Gaal ɖo nu eye be si lè ŋùkɔ̀ na ɛ̀. Àmè sùgbɔ ku ci àhùaa mè kaka va kɔ̀ ɖo èdùa be àgboa be èmɔ̃nu.

⁴¹E yomè a, Abimèlɛk yì sò ci Àrumà eye Zevùl nyà Gaal kudo nɔ̀viawo lè Sikɛ̀m. Mu na wo èmɔ̃ ne woa gbà trɔ va ò.

⁴²Kè èŋù kèa, Abimèlɛk sè be Sikɛ̀m-tɔwo le wɔ̀ jàjràɖo la yì àgblè.

⁴³E kplɔ̀ yebe àhùakɔ̃a, mã àmèawo ɖo àkpa ètɔ̃, eye e na wo do èxa na Sikɛ̀m-tɔwo lè ègbegbà ji. Ne wo kpɔ àmè ɖe a, wo to na, yì xa na ɛ̀.

⁴⁴Abimèlɛk kudo àmè kèwo bɔ̀ ɖo e ŋutia, wo ɖèbla yì do èxa ɖo Sikɛ̀m be èdùa be àgbonu tututu, wàlɛbɛ kè ye àkpa èvè kpɔ̀tɛawo lè crɔ̃ àmè kèwo keŋu wo kpɔ lè àgblèawo jia.

⁴⁵Eye Abimèlɛk wɔ̀ àvũ lè ŋùkèkè bliboa mè. E xɔ̀ èdùa, wù àmèwo eye be crɔ̃ ènu sia ènu. Eye e wu èjè ɖo Sikɛ̀m nyigbã ji.

⁴⁶Wàlɛbɛ kè Migdàl-Sikɛ̀m-tɔwo sè ènyà kèa, wo si yì wla ɖo àkpãdo kè lè vòdu Baal-Beritò be èkpa mèa mè.

⁴⁷Wo yì sìa Abimèlɛk be àmèawo yì wla ɖo funu.

⁴⁸Lè funua, Abimèlɛk kudo yebe ŋutimewo lia Salmɔ̀n be ètoa ji. E sɔ èfiɔ-vi kè lè àlɔ̀ mè na ɛ̀a, sò àti be àlɔ̀zɛ̃ ɖèka, dà ɖo àbɔ. E gblɔ̃ na yebe ŋutimewo cã be woa wɔ̀ nènea.

⁴⁹Àmè sia àmè kè kplɔ̀ ɛ̀ do a, sò àti be àlɔ̀zɛ̃ ɖo àbɔ eye wo kplɔ̀ Abimèlɛk do. E yomè a, wo yì fɔ̀ àti be àlɔ̀zɛ̃awo tu àkpãdoa nu eye wo ɖè èzò do e mè lè àmè kèwo kpata lè e mèa nu. Nène a ye Migdàl-Sikɛ̀m-tɔwo kpata ku. Wo lè sìgbè àgbètɔ àkpe ɖèka nène, ŋusù kudo nyɔ̃nù.

⁵⁰So funua, Abimèlɛk ɖota Tebɛ̀s be èdùa mè. E yì xa ɛ̀ eye be xɔ̀ ɛ̀.

⁵¹Àgbògbò ɖe lè èdùa be dòdò mè. Funu ye àmèwo kpata ŋusù kudo nyɔ̃nùwo gbàkudo dùmè mègãwo yì wla ɖo. Wo tu hɔ̃truawo eye wo yì lia èxɔ̀a tamè, ɖo funua lè gbàjà.

⁵²Abimèlɛk gbà va funua cã. E va kaka àgbògbòa be àgboa nu ne bèa ɖè èzò do e mè.

⁵³Funua ye nyɔ̃nù ɖe dà ènutùkpe so èjia jè Abimèlɛk be èta ji, gbã èta na ɛ̀.

⁵⁴Zè ɖèka, Abimèlɛk yɔ ɖèkajɛ kè lena yebe àhùawɔ̀nua, gblɔ̃ na ɛ̀ be: “Sɔ èwui wòa ne wòa wù mù zè ɖèka, ne wo mu gbà va gblɔ̃ be nyɔ̃nù kpò ye wù mù ò.” Nène a ye ɖèkajɛa ɖè èwuia eye be wù Abimèlɛk.

⁵⁵Kè Izràɛlviwo kpɔ be Abimèlɛk kua, àmè sia àmè trɔ yì yebe èdù mè.

⁵⁶Nène a ye Mawu na ènuvuɛ̃ kè ye Abimèlɛk wɔ̀, wàlɛbɛ kè be wù ètɔa be èvi èkà takpo ci èwoa, trɔ jè yeŋutɔ ji.

⁵⁷Eye Mawu gbà na ye èvuɛ̃ kè Sikɛ̀m-tɔwo wɔ̀a, cã trɔ jè woa ji. Eye nènea, Yèrubaal be èvi Yotàm be ènyà kèwo be gblɔ̃ ɖo woa ŋutia va e mè tututu.