Read gen 3Yòhanɛ̀s 1 Bible Online

3Yòhanɛ̀s 1 - gen bible

3Yòhanɛ̀s 1

¹Èhamèmègã le ŋlɔ̀ ekèa ɖoɖa àpe àmè ɖève Gayò, àmè kè mù lɔ̃ nyàwo a.

²Èxlɔ̃ nyè ɖève, mù le biɔ be ènuwo keŋu ne zɔ̃ sù na wò nyuɛ̃ ɖe, ne wòa nɔ̀ sɛ̃sɛ̃ ɖe sìgbè àlekè mù nya be wò lè sɛ̃sɛ̃ ɖe lè èkla mèa nène.

³Èjì jɔ̀ mù ŋutɔ ekè nɔ̀vi xɔ̀sètɔ ɖewo va ɖù ɖase so àlekè wò le xɔ̀sèa ɖo àsi veve ɖe a ŋuti, be wò lè nyàwo a mè sìgbè àlekè wò lè àgbè lè e mè sãa nène.

⁴Ènu ɖekpekpe mu dona jìjɔɛ na mù wu be ma sè be èvi nyè le zɔ̃ lè nyàwo a mè ò.

⁵Èxlɔ̃ ɖève, wò wɔ̀ ànùkua lè xɔ̀sèdɔ kè wò wɔ̀nàa mè na nɔ̀viwo, veve ɖe a, wàlɛbɛ kè wo nyi àmèjrowoa.

⁶Wo ɖù ɖase so àpo lɔ̃lɔ̃ ŋuti na èhamè kè lè fikèa. Ne jè ŋùmè na wò, ne wòa do wo àlɔ̀, ne woa yì woabe èmɔ zɔ̃zɔ̃ a ji, sìgbè àlekè e la jè Mawu be ŋùmè a nène.

⁷Yebe nyikɔ mè ye wo tɔ èmɔ zɔ̃zɔ̃ lè, ènu ɖe màxɔ̀ so àmè kèwo mu xɔ̀ Mawu ji sè òawo gbɔ.

⁸Eŋuã, mi, àmè kèwo nyi xɔ̀sètɔwoa, mi ɖo la do àlɔ̀ àmè kèawo, ne mia teŋu ɖè è fiɔ be wo wɔ̀ èdɔ kèawo na nyàwo a.

⁹Mù ŋlɔ̀ xoma kpòe ɖe ɖoɖa èhamèa, vɔ̀a Diotrefò, àmè kè lɔ̃ èhanunɔ̀nɔa mu sɔ èɖe lè e mè na ènu kè mù gblɔ̃a ò.

¹⁰Ne mù va ɖoa, mù la ɖè ènyà vlo kèwo kpata be gblɔ̃awo na mì, èdɔ vuɛ̃ ku àjè kèwo be ɖà ɖo mia siawo na mì. Vɔ̀ ekèawo kpata mu sù ì ò. Ne nɔ̀viwo vaa, mu jrona la xɔ̀ wo ò, eye àmè kèwo jro be yèwoa xɔ̀ woa, e gbena na wo, eye be ɖènà wo to lè èhaa mè.

¹¹Èxlɔ̃ ɖève, mù gbà srɔ̃ ènu bàɖà wɔ̀wɔ ò, vɔ̀ ènu kè nyɔa. Àmè kè wɔ̀nà ènyuɛ̃a, jèsi Mawu; àmè kè wɔ̀nà ènuvuɛ̃a, mu jèsi Mawu ò.

¹²Àmè sia àmè pò nupo nyuɛ̃ ɖe so Demetrìo ŋuti, nènea ke ye nyàwo a ŋutɔ cã lè ɖù ɖase nyuɛ̃ so e ŋuti. Miawo cã, mi le ɖù ɖase nyuɛ̃ so e ŋuti, eye wò nya be miabe ɖasea nyi nyàwo.

¹³Mù ɖo ènu sùgbɔ la ŋlɔ̀ ɖoɖa wò, vɔ̀ nyè mu jro be ma ŋlɔ̀ ɛ̀ kudo ènu ŋlɔ̀ti kudo xomasi ò.

¹⁴Mù le ɖoŋù la kpɔ wò sɔ̀sɔɛ ɖe, eye mi la pò nupo tɔ̀xɛ kudo mia nɔ̀nɔwo.

¹⁵Fàfa ne nɔ̀ kudo wò. Èxlɔ̃ wòwo kpata do ègbè ɖoɖa wò. Do ègbè na èxlɔ̃ ɖe sia ɖe veve ɖe.