Read gen Àvìmènu 10 Bible Online

Àvìmènu 10 - gen bible

Àvìmènu 10

¹Eye mù kpɔ Mawu be àtikplɔtɔ ŋusɛ̃tɔ bu le ɖì so jiŋùkusi. E sɔ lili do, eye ànyiɖohùɛɖo trɔ do èta na ɛ̀. Yebe ŋùmè lè sìgbè èwè nène, eye yebe àfɔ̀wo lè sìgbè èzò-sɔtiwo nène.

²E le xoma vi ɖe kè lè hũhũa ɖo àsi. E sɔ yebe ɖùsi-fɔ dà ɖo àpù ji, eye e sɔ èmìɔ̃-fɔ dà ɖo ànyigbã ji.

³E do àpa sɛ̃sɛ̃ ɖe sìgbè leke jãŋùta ɖènà ègbèa nène. Ekè be do àpaa, èji be ègbèɖèɖe adrɛ̃awo ɖì sɛ̃sɛ̃ ɖe.

⁴Wàlɛbɛ kè èji be ègbèɖèɖe adrɛ̃awo ɖì, eye mù ji la ŋlɔ̀ ènu kè wo gblɔ̃ na mùa, mù sè ègbè ɖe ɖì so jiŋùkusi, gblɔ̃ be: “Wla àŋɛ̀ kè èji be ègbèɖèɖe adrɛ̃awo do a ɖɛ, eye mù gbà ŋlɔ̀ ɛ̀ ò.”

⁵Zè ɖèkaa, Mawu be àtikplɔtɔ kè mù kpɔ be tɔtè ɖo àpù ku ànyigbã jia, kɔ yebe ɖùsi-lɔa yìji,

⁶e tà Àmè kè lè àgbè kaka sɔ yìa, Àmè kè ɖo jiŋùkusi ku ènu kèwo keŋu lè e mèawo, ànyigbã ku ènu kèwo keŋu lè e jia, àpù ku ènu kèwo lè e mèa be: “Wo mu la gbà na gàmè ɖekpe ke ò.

⁷Vɔ̀a, lè Mawu be àtikplɔtɔ adrɛ̃gɔ̃ a be ègbèɖèɖe be àzãa gbèa, wàlɛbɛ kè be la ku èkpɛ̃a, Mawu be àmlìmànya kèwo be gblɔ̃ na yebe sumɔ̃vi kèwo nyi gblɔ̃ɖɛtɔawo la zɔ̃ sù.”

⁸Eye ègbè kè mù sè so jiŋùkusia, gbà gblɔ̃ na mù ke be: “Yì, ne wòa xɔ̀ xomavi kè lè hũhũ lè àlɔ̀ mè na Mawu be àtikplɔtɔ kè lè ètè lè àpù ku ànyigbã jia.”

⁹Mù yì àtikplɔtɔa gbɔ, eye mù ɖè kuku na ɛ̀ be ne sɔ xomavia na mù. E gblɔ̃ na mù be: “Xɔ̀ ɛ̀ ne wòa ɖù ì. E la ve kpàa lè pòdo mè na wò, vɔ̀a, e la vivi lè ènu mè na wò sìgbè ànyisi nène.”

¹⁰Mù xɔ̀ xomavia, eye mù ɖù ì. E vivi lè ènu mè na mù sìgbè ànyisi nène. Vɔ̀a, ekè mù mì ìa, e ve lè pòdo mè na mù.

¹¹Eye wo gblɔ̃ na mù be: “E jè be wòa gbà pò nupo lè Mawu be nyikɔ mè so dùkɔ̃ sùgbɔ, kɔ̀ta sùgbɔ, ègbè dodo sùgbɔ kudo èfìɔ sùgbɔ ŋuti.”