Read gen Àvìmènu 11 Bible Online

Àvìmènu 11 - gen bible

Àvìmènu 11

¹Ekèa yomè a, wo sɔ àpla ɖe kè lè sìgbè jijeti nènea do àsi na mù, gblɔ̃ bɔ̀ ɖo e ŋuti be: “Yì jije mawuxɔa ku vɔsakpea, eye wòa hlɛ̃ àmè kèwo le sumɔ Mawu lè mawuxɔa mèa.

²Vɔ̀a, mù gbà jije mawuxɔa be xixeanu, lè èkpa a mè ò, ɖo wo sɔ ɛ̀ na àgbàlèwo, woawo ye la sɔ àfɔ̀ ɖiki èdù kɔ̀kɔ̀ɛa, wètri èkà ci èvè (42) sɔ̃ŋu.

³Mù la na àpe ɖàsèfo èvèawo la tà kòtòku, la gblɔ̃ Mawu be ègbè do àsi be ènyà, ŋùkèkè èkà ègbã vɔ ɖèka takpo (1260).”

⁴Đàsèfo kèawo ye nyi àmìti èvè kudo kãligbɛ̃-ti èvè kèwo ye lè ànyigbã be Tɔhonɔ̀a be ŋùkɔ̀a.

⁵Ne àmè ɖe jro la crɔ̃ woa, èzò la to so ènu mè na wo, la wù woabe kɛ̃tɔwo. Ɛ̃ɛ, ne àmè ɖe jro la wɔ̀ èvuɛ̃ ku woa, nènea ke ye cã la crɔ̃.

⁶Wo ɖo ŋusɛ̃ la le èji, ne èji mu gbà jà ò, wàlɛbɛ kè wo le ɖè gbèfã so Mawu be ègbè do àsia ŋutia. Wo ɖo ŋusɛ̃ ɖo èsìwo ji, ne woa trɔ wo zũ èhũ, eye woa sɔ àyà do na àmè hamèhamèwo dɔ̃ èto na ànyigbã ji tɔwo, àlekè ye wo jro a.

⁷Vɔ̀a, ne wo wu woabe ɖase ɖùɖua nua, èlã kè to lè àvlìmè be èdoa mèa, la wɔ̀ àhùa kudo wo. La ɖù woa ji, eye e la wù wo.

⁸Woabe àmèkpòtiawo la ci èdù gã kè wo yɔna lè ènyàgblɔ̃ɖɛ mè be: Sodɔ̀m ku Ejiptè a be àblɔ mè, lè àfi kè tutu wo ka woabe Tɔhonɔ̀a ɖo àtisòga ŋuti lèa.

⁹Lè ŋùkèkè ètɔ̃ ku èfã mèa, àmèwo la so èdùwo keŋu ku kɔ̀tawo, kudo dùkɔ̃wo keŋu mè, la nɔ do ègbè vòvòvòwo, la va kpɔ woabe àmèkpòtiawo, eye wo mu la ɖè èmɔ be woa ɖì wo ò.

¹⁰Àmè kèwo lè ànyigbã jiawo, la jɔ̀jì ɖo àmè èvè kèawo be èku ŋuti. Wo la nɔ̀ sò àyo, eye wo la nɔ na ènu woa nɔ̀nɔwo, ɖoa, Mawu be gblɔ̃ɖɛtɔ èvè kèawo do nupo na àmè kèwo nɔ̀ ànyigbã jia ŋutɔ.

¹¹Vɔ̀a, lè ŋùkèkè ètɔ̃ ku èfã kèawo yomè a, gbɔ̃gbɔ̃ ɖe kè nana àgbè a, so Mawu gbɔ ɖo woa mè, eye wo fɔ̃ sitè! Vɔ̃vɔ̃ gã ɖe jè àmè kèwo le kpɔ woa ji.

¹²Wo sè ègbè sɛ̃sɛ̃ ɖe ɖì so jiŋùkusi, gblɔ̃ na wo be: “Mì va èji fikèa!” Eye wo nɔ̀ lilikpo mè yì jiŋùkusi, lè woabe kɛ̃tɔwo be ŋùmè.

¹³Wàlɛbɛ ŋua tututua, ànyigbã hũhũ sɛ̃sɛ̃ ɖe, eye èdùa be mamã èwogɔ̃a mù. Àmè hotu ètɔ̃ èkà èwì vɔ àtɔ̃ (7000) ku lè jɔ̀gbèvuɛ̃ kèa mè. Vɔ̃vɔ̃ ɖo àmè kpɔ̀tɛ kèwo ci àgbèa, eye wo na gogo jiŋùkusi be Mawu a.

¹⁴Jɔ̀gbèvuɛ̃ èvègɔ̃a va yì. Kpɔɖa, ètɔ̃gɔ̃a gbãnà, sɔ̀sɔɛ ɖe.

¹⁵Eye, àtikplɔtɔ adrɛ̃gɔ̃ a ku yebe èkpɛ̃a. Ègbè gãwo ɖì so jiŋùkusi gblɔ̃ be: “Xixe kèa be fìɔdua trɔ zũ mia Tɔhonɔ̀ kudo yebe Kristò tɔ̀, eye èfìɔɖùɖu kèa la nɔ̀ ànyi, kaka sɔ yì.”

¹⁶Eye àmègã èwì vɔ ènè (24), kèwo lè woabe èfìɔzìkpe ji lè Mawu be ŋùkɔ̀a, sɔ ŋùmè cɔ̃ ànyi, le sumɔ Mawu,

¹⁷le gblɔ̃ be: “Tɔhonɔ̀ Mawu Ŋusɛ̃kpatatɔ, àmè kè lè, ekè e nɔ̀ ànyi so xoxoa! Mi le do àkpe na wò! Wò ɖè àpo ŋusɛ̃ gãa fiɔ, eye wò ɖo àpo èfìɔɖùɖu ànyi!

¹⁸Dùkɔ̃wo bijì, vɔ̀a, àpo àdɔ̀mèzea ye va. Gàmè sù ne woa ɖo kòjo na àmèkukuwo, ne wòa na àjɔ̀ àpo sumɔ̃vi kèwo ye nyi gblɔ̃ɖɛtɔwo ku àɖèsãwo kudo àmè kèwo vɔ̃na àpo nyikɔa, àmè gbalo kudo àmè jɔ̀ àmèwo, ne wòa crɔ̃ àmè kèwo ye le crɔ̃ ànyigbãa.”

¹⁹Mawuxɔ kè lè jiŋùkusia hũ, eye *zòɖùɖu ɖakà a ze lè mawuxɔa mè. Zè ɖèkaa, èjikèzòwo ze, ègbèwo, èji be ègbèɖèɖewo ɖì, ànyigbãa hũhũ, eye èsìkpe sɛ̃sɛ̃ ɖe jà.