Read gen Àvìmènu 12 Bible Online

Àvìmènu 12 - gen bible

Àvìmènu 12

¹Jèsìdo gã ɖe ze lè jiŋùkusi: nyɔ̃nù ɖe, kè sɔ èwè do sìgbè àwù nènea, to. Wètri lè yebe àfɔ̀wo gɔ̃mè, eye èfìɔkuku kè ŋuti wètrivi woèvè lèa, lè èta na ɛ̀.

²Èfu lè nyɔ̃nùa si. Èfua le ɖù ì, eye vevesèsea na be le do àpa sɛ̃sɛ̃ ɖe.

³Jèsìdo bu gbà ze lè jiŋùkusi. Ekèa nyi èhɔ̃ drìbà jɛ̃ gãa ɖe. Èta adrɛ̃ lè e si; e to àzò èwo, eye èfìɔkuku lè èta ɖe sia ɖe ji na ɛ̀.

⁴Yebe àsike kè le kplɔ̀ wètrivi kèwo lè jiŋùkusiawo be mamã ètɔ̃gɔ̃a, lɔ wo kɔ̀ ɖo ànyigbã ji. Èhɔ̃ drìbàa va tɔtè ɖo nyɔ̃nù kè le le èkua be ŋùkɔ̀, àleke be, ne e gbe kɔ̀ ɖèvia ɖɛ kpòa, yèa vũvũ ì.

⁵Nyɔ̃nùa jì ŋusùvi. E ye nyi àmè kè la kplɔ̀ dùkɔ̃wo kpata kudo gàyìbɔ be èkpò. Eye, zè ɖèkaa, wo kɔ ɖèvia yì Mawu ku yebe èfìɔzìkpea gbɔ.

⁶Nyɔ̃nùa si yì zògbè ji, àfi kè Mawu jrà tèpe ɖo ɖɛ na ɛ̀ lèa, be woa kpɔ ɛ̀ ji, ŋùkèkè èkà ègbã vɔ ɖèka takpo (1260).

⁷Ekèa yomè a, àhùa jɔ̀ lè jiŋùkusi. Mikàɛl ku yebe àtikplɔtɔwo kpe àhùa ku èhɔ̃ drìbàa. Èhɔ̃ drìbàa cã kplɔ̀ yebe àtikplɔtɔwo ɖo ŋuti.

⁸Wo ɖù èhɔ̃ drìbàa kudo yebe àtikplɔtɔwo ji, eye tèpe ɖekpe mu gbà lè jiŋùkusi wo la gbà nɔ̀ ò.

⁹Wo sɔ èhɔ̃ drìbàa dãŋùgbe ɖo ànyigbã ji. Eye nyi èdã xoxo kè wo yɔna be Àbòsam, Satana, àmè kè flùnà xixea. E ye kudo yebe àtikplɔtɔwo ye wo ɖè to dãŋùgbe ɖo ànyigbã ji.

¹⁰E yomè a, mù sè ègbè ɖe ɖì sɛ̃sɛ̃ ɖe so jiŋùkusi le gblɔ̃ be: “Fifìa, àmèhlùɛ̃gã be hùenua va ɖo vɔ̀! Fifìa, Mawu ɖè yebe èfìɔɖùɖua fìɔ kudo ŋusɛ̃! Fifìa, Mɛsiaa le ɖè yebe àcɛ̀ fiɔ. Đo a, wo sɔ mia nɔ̀viwo be èhùɛdotɔ kè dona èhùɛ do wo lè Mawu be ŋùmè, èzã ku kedèa dãŋùgbe.

¹¹Vɔ̀a, woawo yaa, wo ɖù e ji, lè àlɛ̃via be èhũ mè kudo nyàwo kè wo ɖù ɖase na a. Wo lɔ̃ be yèwoa ku, eye wo mu bù woabe àgbè a be e nyi ènu veve ɖe ò.

¹²Ye ŋutia, èjì ne jɔ̀ mì, mì, jiŋùkusiwo, ku àmè kèwo ɖo nɔ̀pe lè e mèawo. Vɔ̀a, bàbà na mì, ànyigbã kudo àpù! Àbòsam ɖì va mìa gbɔ kudo àdɔ̀mèze gã ɖe. Đo e nya be hùenu kpòe ɖe kpò ye kpɔ̀tɔ̀ na yè!”

¹³Ekè èhɔ̃ drìbà jiŋɔa kpɔ be wo sɔ yè dãŋùgbe ɖo ànyigbã jia, e tĩ nyɔ̃nù kè jì ŋusùvia yomè.

¹⁴Wo sɔ èhɔ̃ gãa be àwàda èvèawo na nyɔ̃nùa, ne bèa zrò, si jo lè èhɔ̃ drìbà jiŋɔa gbɔ, yì zògbè ji, lè tèpe kè wo jràɖo ɖɛ na ɛ̀, àfi kè wo la nyì ì lè, èpè ètɔ̃ ku èfã, ne bèa vò so èdãa si.

¹⁵Eye èdã jiŋɔa, tu èsì kè lè sìgbè ètɔ̀ sàsraa nène ɖoɖa nyɔ̃nùa yomè, ne ètɔ̀ sàsraa ne kplɔ̀ nyɔ̃nùa jo.

¹⁶Vɔ̀a, ànyigbã va xɔ̀ na nyɔ̃nùa. Ànyigbãa kè ènu, nù èsì kè èhɔ̃ drìbà jiŋɔa tua kpata.

¹⁷Èhɔ̃ drìbà jiŋɔa do àdɔ̀mèze ɖo nyɔ̃nùa ŋuti, eye be sɔ àhùa ɖo yebe jìjimè kèwo kpɔ̀tɔ̀awo ŋuti. Woawo ye nyi àmè kèwo kpata wɔ̀nà ɖo Mawu be èsewo jia, eye wo le nyàwo kè wo ɖèfiɔ, lè Yesù mèa ɖo àsi, lè ànùkua mè.

¹⁸Eye èhɔ̃ drìbà jiŋɔa jè ɖo èkɔa ji lè àpùa ta.