Read gen Àvìmènu 13 Bible Online

Àvìmènu 13 - gen bible

Àvìmènu 13

¹Ekèa yomè a, mù kpɔ èlã ɖe le to lè àpùa mè. E ɖo àzò èwo ku èta adrɛ̃, eye jègbà lè yebe àzò ɖe sia ɖe ji. Bùsu-nyikɔ lè yebe ètawo ŋuti.

²Èlã kè mù kpɔa, lè sìgbè blèkpɔ̃ɛ nène. Yebe àfɔ̀wo lè sìgbè sisiblìsi tɔ̀ nène. Yebe ènu lè sìgbè jãŋùta tɔ̀ nène. Èhɔ̃ drìbà jiŋɔa sɔ ye ŋutɔ be ŋusɛ̃, yebe èfìɔzìkpe ku yebe jiɖùɖu be ŋusɛ̃ gãa na èlã kèa.

³Ètaawo dòmètɔ ɖèka lè sìgbè wo do èkubi e ŋuti nène, vɔ̀ àbì kèa ku na ɛ̀. Ànyigbã ji tɔwo kpata kã yàa, eye wo kplɔ̀ èlãa do.

⁴Eye àmèwo sɛ̃ èhɔ̃ drìbà jiŋɔa, ɖo e sɔ ŋusɛ̃ na èlãa, eye wo sɛ̃ èlãa, lè gblɔ̃ be: “Àmè kɛ ye lè sìgbè èlã kèa nène ò? Àmè kɛ ye la teŋu wɔ̀ àvũ kudo è ò?”

⁵Wo ɖè èmɔ na ɛ̀, be ne nɔ kã àdã, ne bèa nɔ gblɔ̃ bùsunyàwo, wo na ɛ̀ ŋusɛ̃ ne bèa wɔ̀ ekèa wètri èkà ci èvè (42).

⁶E lè pò nupo sɔ sitè ɖo Mawu ŋuti, ɖo Mawu be nyikɔ, ku yebe nɔ̀pe, kudo àmè kèwo kpata lè jiŋùkusiawo ŋuti.

⁷Wo gbà ɖè èmɔ na ɛ̀ be ne wɔ̀ àhùa ku àmè kèwo ŋuti wo kɔ̀a, ne bèa ɖù woa ji. Wo gbà na ɛ̀ ŋusɛ̃ ɖo kɔ̀ta sia kɔ̀ta, èdù sia èdù, ègbè sia ègbè, dùkɔ̃ sia dùkɔ̃ ji.

⁸Àmè kèwo keŋu lè ànyigbã ji, àmè kèwo kpata be nyikɔ wo mu ŋlɔ̀ ɖo Àlɛ̃vi kè wo wùa be àgbè be xoma mè, so kaka xixea be gɔ̃mèjèje òawo, la sɛ̃ ɛ̀.

⁹“Àmè kè si èto sènu lèa, ne sè è!

¹⁰Ne e hiã be wo la kplɔ̀ àmè ɖe àhùalea, wo la kplɔ̀ ɛ̀. Ne e hiã be wo la crɔ̃ àmè ɖe kudo èwuia, wo la crɔ̃ ɛ̀ kudo èwui. Vève dodo ènu kudo àmè kɔ̀kɔ̀ɛwo be xɔ̀sè be gàmè ye nyi ekèa.”

¹¹E yomè a, mù gbà kpɔ èlã bu, ekè to so ànyigbã mè. Àzò èvè lè èta na ɛ̀ sìgbè àlɛ̃vi tɔ̀ nène, vɔ̀a, e le pò nupo sìgbè èhɔ̃ drìbà jiŋɔa nène.

¹²Wo sɔ ŋusɛ̃ kè lè èlã cucugbãa sia na ɛ̀, eye e wɔ̀ yebe èdɔ lè yebe ŋùkumè. E zĩ ànyigbã kudo e ji nɔ̀tɔwo kpata ji, be woa sumɔ èlã cucugbã, kè wo dà èkubia na a.

¹³Èlã èvègɔ̃ kèa wɔ̀ ŋùdãnu gãwo. E na èzò gɛ̃ so èji va jè ànyigbã ji, lè àmèwo kpata be ŋùmè.

¹⁴E flù ànyigbã ji nɔ̀tɔwo to ŋùdãnu kèwo wo ɖè èmɔ na ɛ̀ be ne wɔ̀ lè èlã cucugbã be ŋùmè a ji. E na be àmèawo ne wɔ̀ èlã kè ŋuti wo sɔ èwui do èku-bi, vɔ̀ be gbɔ̀ àgbè a be ŋùfɛ̃.

¹⁵Wo na ŋusɛ̃ èlã èvègɔ̃a be ne na àgbè be gbɔ̃gbɔ̃ èlã cucugbã be tata kè wo wɔ̀a, ne tataa bèa teŋu pò nupo, bèa wù àmè kèwo kpata mu la sumɔ ɛ̀ ò a.

¹⁶Èlã kèa zĩ àmèwo kpata ji, ɖèviwo ku àmègãxowo, àdɔ̀kùnɔ̀wo kudo wɔ̀amènɔ̀wo, kluviwo kudo àblɔ̀ɖèviwo ji be woa do jèsìdo woabe ɖùsi-lɔ, àlo ŋùgonu.

¹⁷Ne àmè ɖe la plè ènu, àlo la sà ènu ɖekpekpea, e ɖo la ɖo èlãa be jèsìdo kè nyi yebe nyikɔ, àlo yebe nyikɔ be hɛ̃hlɛ̃ mèa.

¹⁸Wàlɛbɛ kèa ye ènunya hiã. Àmè kè ŋɔjè ènu mèa, ne bù èlãa be hɛ̃hlɛ̃ mè jèsìdoa kpɔ, ɖoa e nyi jèsìdo kè sɔ̀ ku àgbètɔwo be hɛ̃hlɛ̃ mèa. Hɛ̃hlɛ̃ mèa lè èkà woeàdɛ̃ takpo ci àdɛ̃ (666).