Read gen Àvìmènu 14 Bible Online

Àvìmènu 14 - gen bible

Àvìmènu 14

¹Mù gbà kpɔ àlɛ̃vi-a, E tɔtè ɖo Ziɔ̀n be ètoa ji. Àmè hotu èkà takpo ci woèvè (144000) kèwo be ŋùgonu wo ŋlɔ̀ ye ŋutɔ kudo Ètɔa be nyikɔ ɖoa, bɔ̀ ɖo e ŋuti.

²Eye mù sè ègbè ɖe ɖì so jiŋùkusi, sìgbè ètɔ̀ sùgbɔ be ɖìɖi nène, sìgbè èji be ègbè ɖèɖè gã ɖe nène. Ègbè kè mù sè a lè sìgbè èhɛ kèwo èhɛ pòtɔwo lè pòa be ɖìɖi nène.

³Wo le jì èhà yeye ɖe lè èfìɔzìkpea ku ènu àgbè-àgbè ènèawo kudo àmègãwo be ŋùmè. Àmè ɖekpe mu teŋu kpla èhàa, ne mu nyi àmè hotu èkà takpo ci woèvè (144000) kèwo nyi ànyigbã ji be àmè jojoawo ò.

⁴Wo nyi àmè kèwo mu pòɖi woa ɖokoewo kpɔ ku nyɔ̃nù gbòlòmewo ò, ɖo wo lè ègbè ji. Woawo ye nyi àmè kèwo nɔ̀nà Àlɛ̃via yomè, yìnà àfi ɖekpekpe kè Be le yìa. Woawo ta ye wo tu èfɛ̃ ɖo, lè àgbètɔwo dòmè, sìgbè ènuku cucugbã kèwo wo sɔ na Mawu kudo Àlɛ̃via nène.

⁵Àjèɖàɖa mu to lè ènu mè na wo kpɔ ò; ŋùmè kãkã ɖe mu lè woa ŋuti ò.

⁶E yomè a, mù kpɔ àtikplɔtɔ bu kè le zrò to jiŋùkusi be dòdòmè tututua. Àŋɛ̀nyuɛ̃ màvɔ ɖe lè e si, ne bèa do è na àmè kèwo lè ànyigbã jiawo, dùkɔ̃ sia dùkɔ̃, kɔ̀ta sia kɔ̀ta, ègbè sia ègbè ku èdù sia èdù.

⁷Mawu be àtikplɔtɔa do àpa be: “Mì vɔ̃ Mawu, eye mì na ɛ̀ gogo, ɖo, gàmè sù ne bèa ɖo kòjo na àgbètɔwo. Mì sumɔ Àmè kè ɖo jiŋùkusi ku ànyigbãa, àpù kudo èsìjɔ̀pewo.”

⁸*Àtikplɔtɔ èvègɔ̃a kplɔ̀ cucugbãa do le gblɔ̃ be: “E mù lòo! Babɛ̀l gãa mù lòo! Èdù kè na dùkɔ̃wo keŋu nù yebe gbòlòwɔ̀wɔ be àdɔ̀mèze be vɛ̃a, gbã keŋu-keŋu!”

⁹*Àtikplɔtɔ, bu kè le nyi ètɔ̃gɔ̃a jè woa yomè, le gblɔ̃ ku àpa be: “Ne àmè ɖe sɛ̃ èlãa ku yebe tataa, eye e xɔ̀ yebe jèsìdo ɖo ŋùgonu, àlo ɖo àlɔ̀tinua,

¹⁰e cã la nù Mawu be àdɔ̀mèze kè la sɛ̃ŋu sìgbè vɛ̃ èsì màtɔ nène. Wo la kɔ̀ ɛ̀ ɖo yebe èjìbibi be kogòa mè. Eye wo la do àyà na ɛ̀ lè èzò ku èzòkpewo mè, lè àtikplɔtɔ kɔ̀kɔ̀ɛwo ku Àlɛ̃via be ŋùmè.

¹¹Woabe àyà do na àmè be àzìzɔ la nɔ tù yìji, so màvɔ yì màvɔ mè. Eye àmè kèwo sumɔna èlãa be ŋùfɛ̃ ku àmè ɖekpekpe kè xɔ̀ èlãa be nyikɔ be jèsìdoa, mu la gbɔ̃jɛ̃ èzã ku kedè ò.”

¹²Hùenu kèa ye àɖèsã kèwo le Mawu be èseawo ɖo àsi, eye wo xɔ̀ Yesù ji sèawo, ɖo la do veve ènu.

¹³E yomè a, mù sè ègbè ɖe so jiŋùkusi gblɔ̃ be: “Ŋlɔ̀ ɖɛ be: 'So fifìa, *sìtu ɖèɖe ye be nyi na àmè kèwo lè wɔ̀ Tɔhonɔ̀ be èdɔ gbɔ̀xue kuawo!' 'Ɛ̃, Gbɔ̃gbɔ̃ a gblɔ̃ be wo le gbɔ̃jɛ̃ lè woabe àgbàgba jèjewo yomè! Đo woabe èdɔwo la kplɔ̀ wo do.'”

¹⁴Eye mù kpɔ lili ɣe ɖe, eye àmè ɖe nɔ̀ lilia ji sìgbè àgbètɔ be èvi nène. Sìka be jègbà lè èta na ɛ̀, e hɛ̃ àgɔ̃ ɖaɖa ɖo àsi.

¹⁵Àtikplɔtɔ bu to lè mawuxɔa mè, eye e do àpa ɖoɖa àmè kè nɔ̀ ànyi ɖo lilia jia be: “Ènuku yàya be hùenua ɖo! Dà àgɔ̃ wòa ne wòa yà ènukuawo, ɖo ànyigbã be ènukuwo sĩ vɔ̀!”

¹⁶Eye àmè kè nɔ̀ ànyi ɖo lilia jia dà yebe àgɔ̃a ɖo ànyigbã ji, eye be yà ànyigbã ji be ènukuwo.

¹⁷Mù kpɔ àtikplɔtɔ bu to lè Mawuxɔ kè lè jiŋùkusia mè. Àgɔ̃ ɖaɖa ɖe lè ye cã si.

¹⁸Eye àtikplɔtɔ bu, cã kè ɖo ŋusɛ̃ ɖo èzò jia to lè vɔsakpea mè. E do àpa ɖoɖa àmè kè le àgɔ̃ ɖaɖa ɖo àsia be: “Dà àgɔ̃ ɖaɖa wòa, ne wòa sò vɛ̃-kpòawo lè ànyigbã be vɛ̃bɔwo mè, ɖo yebe vɛ̃kusɛ̃sɛ̃wo ɖì.”

¹⁹Eye àtikplɔtɔa dà yebe àgɔ̃ a ɖo ànyigbã ji, eye e sò vɛ̃-kusɛ̃sɛ̃ be èkpòawo lè ànyigbã ji. E lɔ wo kɔ̀ ɖo Mawu be àdɔ̀mèze be vɛ̃fiɔ̃nu gãa mè.

²⁰Wo nyàmà vɛ̃kusɛ̃sɛ̃awo ku àfɔ̀ lè èdùa godo, eye èhũ to lè vɛ̃fiɔ̃nua mè, ɖɔ kaka va ɖo èsɔwo be ènùmègàwo ŋuti. E srà kaka yì sìgbè kpeti àlɔ̀ ètɔ̃ sɔ̃ŋu nène.