Read gen Àvìmènu 15 Bible Online

Àvìmènu 15 - gen bible

Àvìmènu 15

¹Ekèa yomè a, mù kpɔ jèsìdo gã bu kè wɔ̀ ŋùdã ŋutɔa lè jiŋùkusi. Ekèawo nyi àtikplɔtɔ adrɛ̃ kèwo si àyà do na àmè memlɛ̃awo lèa. Àyà do na àmè kèawo ye lè ɖè Mawu be àdɔ̀mèze memlɛ̃a fiɔ.

²Eye mù kpɔ ènu ɖe kè lè sìgbè àpù kè kɔ̀ sìgbè àpùpui nène, vɔ̀ kè ɖɔ ku èzòa. Àmè kèwo ɖù èlãa, ku yebe ŋùfɛ̃ kudo yebe hɛ̃hlɛ̃mè nyikɔ jiawo, tɔtè ɖo àpù kè kɔ̀ ceŋu-ceŋuã ji, eye wo le Mawu be èhɛwo ɖo àsi.

³Wo le jì Mawu be sumɔ̃vi, Mosè be èhà ku Àlɛ̃via be èhà be: “Oò Tɔhonɔ̀ Mawu, Ŋusɛ̃kpatatɔ, àpo èdɔwɔ̀wɔwo lòlò eye wo wɔ̀ ŋùdã loò! Èwò dùkɔ̃wo be èfìɔ, èmɔ wòwo lè jɔ̀jɔɛ eye wo nyi nyàwo!

⁴Oò Tɔhonɔ̀, àmè kɛ ŋutɔ ye mu la vɔ̃ wò ò? Àmè kɛ ye mu la na wò gogo ò? Đo èwò ɖèka kpò ye lè kɔ̀kɔ̀ɛ! Dùkɔ̃wo kpata la va jè *èɖɛ̀ na wò, ɖo, wò ɖè ènu jɔ̀jɔɛwɔ̀wɔ wòa fiɔ!”

⁵Ekèawo yomè a, mù kpɔ Mawuxɔ kè lè jiŋùkusi ku ɖase be gòxɔ kè mè be nɔ̀nàa, hũ.

⁶*Àtikplɔtɔ adrɛ̃ kèwo si àyà do na àmè adrɛ̃awo lèawo to lè mawuxɔa mè. Wo do àwù ɣe peŋu-peŋu kè le dàzòa, eye wo sɔ sìka gojibla-nu bla ègo ji.

⁷Eye ènu àgbè-àgbè ènèawo dòmètɔ ɖèka sɔ sìka kogò, kèwo ɖɔ kudo Mawu, Àmè kè lè àgbè kaka sɔ yìa be àdɔ̀mèzea, na àtikplɔtɔ adrɛ̃awo.

⁸Àzìzɔ kè to lè Mawu be gogo kudo yebe ŋusɛ̃ mèa, ɖɔ mawuxɔa keŋu. Eye àmè ɖekpe mu teŋu ɖo mawuxɔa mè, kaka va ɖo wàlɛbɛ kè àyà do na àmè adrɛ̃ kèwo Mawu be àtikplɔtɔ adrɛ̃awo hɛ̃ vaawo nu la va yì keŋu-keŋu ò.