Read gen Àvìmènu 16 Bible Online

Àvìmènu 16 - gen bible

Àvìmènu 16

¹Mù sè ègbè gã ɖe, ɖì so mawuxɔa mè, gblɔ̃ na àtikplɔtɔ adrɛ̃awo be: “Mì yì ne mìa ɖɔ̀lì Mawu be àdɔ̀mèze be kogò adrɛ̃awo kɔ̀ ɖo ànyigbã ji!”

²*Àtikplɔtɔ cucugbãa yì, ɖɔ̀lì ènu kè lè yebe kogòa mèa kɔ̀ ɖo ànyigbã ji. Àbì vuɛ̃ veve kàɖì xɔ̀ ŋuti na àmè kèwo kpata ŋuti èlãa be jèsìdo lè, ku àmè kèwo sumɔ yebe ŋùfɛ̃awo.

³Àtikplɔtɔ èvègɔ̃a ɖɔ̀lì ènu kè lè yebe kogòa mèa kɔ̀ ɖo àpù mè. Èsìa trɔ sìgbè àmè kuku be èhũ nène. Eye ènu àgbè-àgbè kèwo keŋu lè àpù mèawo kpata ku.

⁴*Àtikplɔtɔ ètɔ̃gɔ̃a ɖɔ̀lì ye tɔ̀a kɔ̀ ɖo ètɔ̀wo ku èsìdowo mè, eye wo trɔ zũ èhũ.

⁵Zè ɖèkaa, mù sè èsìwo be àtikplɔtɔa gblɔ̃ be: “Wò nyi Àmè Jɔ̀jɔɛ, Èwò, Àmè kè nɔ̀ ànyi so xoxo xòxò, eye Wò gbà lè, Àmè Kɔ̀kɔ̀ɛ, ɖo nènea ye Wò sònà jɔ̀jɔɛ lè àpo kòjoɖoɖo mè!

⁶Ekè àmè kèawo kɔ̀ àpo àmè kɔ̀kɔ̀ɛwo kudo gblɔ̃ɖɛtɔwo be èhũ ɖɛa, ye ŋuti èhũ ke ye wò gbà na wo be woa nù. Ekèa jè na wo!”

⁷Eye mù sè vɔsakpea le gblɔ̃ be: “Ɛ̃ɛ, Tɔhonɔ̀ Mawu Ŋusɛ̃kpatatɔ, Wò sònà jɔ̀jɔɛ, eye wò tona nyàwo lè kòjoɖoɖo mè!”

⁸Àtikplɔtɔ ènègɔ̃a ɖɔ̀lì yebe kogòa kɔ̀ ɖo èwè ji, eye wo na ɛ̀ ŋusɛ̃ be ne fiɔ̃ àgbètɔwo kudo yebe èzò.

⁹Zòzo sɛ̃sɛ̃a fiɔ̃ àgbètɔwo veve ɖe, eye wo gblɔ̃ bùsu-nya ɖo Mawu, Àmè kè ɖo ŋusɛ̃ ɖo àyà do na àmè kèawo jia ŋuti. Eye wo gbe be yèwo mu la ɖɔ̀lì èdɛ̃ ne yèwoa na gogo Mawu ò.

¹⁰Àtikplɔtɔ àtɔ̃gɔ̃a ɖɔ̀lì yebe kogòa kɔ̀ ɖo èlãa be èfìɔzìkpea ji. Vìvìti cɔ̃ yebe fìɔdua, zè ɖèka. Vevesèsea na be àgbètɔwo le ɖù àɖe.

¹¹Lè woabe àbìwo be vevesèsewo mèa, wo gblɔ̃ bùsu-nya ɖo Mawu kè lè jiŋùkusia ŋuti, vɔ̀a, wo mu ɖɔ̀lì èdɛ̃ lè woabe ènu wɔ̀nawo mè ò.

¹²Àtikplɔtɔ àdɛ̃gɔ̃ a ɖɔ̀lì ènu kè lè yebe kogòa mèa kɔ̀ ɖo Efratà be ètɔ̀ sàsra gãa mè, eye èsìa pu, ne woa jrà èmɔ ɖo na èfìɔ kèwo la so èwèzɛ̃pe vaa.

¹³Eye mù kpɔ gbɔ̃gbɔ̃ vuɛ̃ ètɔ̃, kèwo lè sìgbè àdĩwo nène, to so èhɔ̃ drìbàa, ku èlãa kudo àjè-gblɔ̃ɖɛtɔawo be ènu mè.

¹⁴Woawo ye nyi Àbòsam be gbɔ̃gbɔ̃ kèwo wɔ̀nà kpajijewo. Gbɔ̃gbɔ̃ kèawo ye yìnà èfìɔ kèwo lè ànyigbã bliboa jiawo gbɔ, ne woa bɔ̀ wo ɖo Mawu Ŋusɛ̃kpatatɔa be àhùawɔ̀wɔ be ŋùkèkè gãa ŋuti.

¹⁵“Kpɔɖa, mù gbãnà sìgbè fìãfìtɔ nène. Sìtu ɖèɖe ye e nyi na àmè kè lè ŋùsà, eye yebe àwùwo lè e ŋuti, ne yebe àma mu gbà ze, ne èŋù bèa kpɛ̃ ɛ̀ ò.”

¹⁶Gbɔ̃gbɔ̃ vuɛ̃awo kplɔ̀ èfìɔawo yì bɔ̀ ɖo tèpe kè wo yɔna lè Hebrùgbe mè be Hàrmagedɔ̀n.

¹⁷Àtikplɔtɔ adrɛ̃gɔ̃ a ɖɔ̀lì ènu kè lè yebe kogòa mèa kɔ̀ ɖo àyamè. Eye, ègbè gã ɖe ɖì so mawuxɔa mè, lè èfìɔzìkpea be ŋùkɔ̀, be: “E vɔ̀ vɔ̀!”

¹⁸Eye èjikèzòwo, ègbèwo, ku èji be ègbè ɖèɖewo, kudo ànyigbã hũhũ gã ɖe kè mu jɔ̀ kpɔ so wàlɛbɛ kè àgbètɔwo lè ànyigbã ji òa, jɔ̀.

¹⁹Èdù ɖìnyia ma ɖo tèpe ètɔ̃, eye dùkɔ̃wo be èdù gãa, gbã. Ekèa yomè a, Mawu ɖoŋù Babɛ̀l, èdù gã ɖìnyia, eye e sɔ yebe àdɔ̀mèze be kogò kè mè yebe èjìbibi be vɛ̃ le fìɔ lèa na ɛ̀.

²⁰Ètɔ̀dòmèkɔ̃ɛwo keŋu si, ètowo bu, eye wo ji wo dokpò.

²¹Èsìkpe gã kèwo kpɛ̃ sìgbè gàkpowo nènea, gɛ̃ so èji va jè àgbètɔwo ji. Lekè èsìkpe kèawo do àyà na àgbètɔwo ɖoa sɛ̃ŋu, àleke be àmèwo gblɔ̃ bùsu-nya ɖo Mawu ŋuti.