Read gen Àvìmènu 17 Bible Online

Àvìmènu 17 - gen bible

Àvìmènu 17

¹E yomè a, àtikplɔtɔ adrɛ̃, kèwo simè kogò adrɛ̃awo lèa dòmètɔ ɖèka va gblɔ̃ na mù be: “Va, mù la sɔ àlekè wo dɔ̃ èto na nyɔ̃nù gbòlòme gã kè lè àpùwo toa fiɔ wò.

²Ànyigbã ji be èfìɔwo wɔ̀ *àhasì kudo è, eye ànyigbã ji nɔ̀tɔwo nù yebe gbòlòwɔ̀wɔ be vɛ̃a.”

³Eye be kplɔ̀ mù yì zògbè ɖe ji, lè gbɔ̃gbɔ̃ mè. Mù kpɔ nyɔ̃nù ɖe kè nɔ̀ ànyi ɖo èlã jɛ̃ ɖe ji. Bùsu-nyikɔwo ɖɔ èlãa ŋuti keŋu, eye be ɖo èta adrɛ̃ kudo àzò èwò.

⁴Nyɔ̃nùa do àwù jɛ̃ hɛ̀ siãsiã ɖe, eye be ɖo àcɔ ku sìkanuwo, èkpe xɔ̀asìwo kudo jònuwo. E le sìka kogò ɖe kè ɖɔ ku ènu gbegble, ènu màkɔ̀ màkɔ kèwo wo kpɔ so yebe gbòlòwɔ̀wɔ mèa, ɖo àsi.

⁵Wo ŋlɔ̀ nyikɔ ɖe kè nyi àmlìmà nyikɔa ɖo yebe ŋùgonu be: “Babɛ̀l gãa, gbòlòwɔ̀tɔwo ku ànyigbã ji be àfɛ̃nuwo be ènɔ̀.”

⁶Mù kpɔ ɛ̀ jèsi be, nyɔ̃nùa nù àmè kèwo ŋuti wo kɔ̀ ku àmè kèwo wo wù ɖo Yesù ji xɔ̀sè ŋutiawo be èhũ kaka mu. Ekè mù kpɔ ɛ̀a, mù titɔ ŋutɔ.

⁷Eye àtikplɔtɔa biɔ mù be: “Nukɛ ŋuti wò titɔ ɖo ò?” E yì e ji be: “Mù la gblɔ̃, nyɔ̃nùa ku èlã kè ɖo èta adrɛ̃ kudo àzò èwò, kè ji be lèa be ènyà wawla na wò.

⁸Èlã kè wò kpɔa nɔ̀ àgbè kpɔ, vɔ̀ fifìa, e ku. Vɔ̀a, e la to so àvlìmè be èdoa mè, yì cɔ̃crɔ̃ mè. Àmè kèwo lè àgbè lè ànyigbã ji, kèwo be nyikɔ mu lè àgbèxoma a mè gbɔ̀xue wo ɖo xixea gɔ̃mè ànyi òa, e la wɔ̀ ŋùdã na wo, ne wo kpɔ èlãa, ɖo e nɔ̀ ànyi va yì, eye mu lè fifì ò, vɔ̀a e la gbà trɔ va.”

⁹“Fikèa ye e hiã be ènunya ne klɛ̃ ɖo àyè mè lèa ye nyi ekèa. Èta adrɛ̃awo nyi èto adrɛ̃, kèwo ji nyɔ̃nùa nɔ̀nàa.

¹⁰Wo gbà le nyi èfìɔ adrɛ̃. Èfìɔ àtɔ̃ lè woa dòmè, jè ànyi xoxo. Àdɛ̃gɔ̃a le ɖùfìɔ fifì. Adrɛ̃gɔ̃ a mu kpɔ va hàɖe ò. Ne e va cã a, gàmè vi ɖe kpò ye be la nɔ̀ ànyi.

¹¹Èlã kè nɔ̀ ànyi va yì, eye mu gbà lè egbè òa, nyi èfìɔ ènyigɔ̃a, e nɔ̀ adrɛ̃awo dòmè va le yì cɔ̃crɔ̃ mè.”

¹²“Àzò èwo, kèwo wò kpɔawo nyi èfìɔ èwo, kèwo mu kpɔ xɔ̀ jiɖùɖu be ŋusɛ̃ ò, vɔ̀a, wo la xɔ̀ èfìɔɖùɖu be ŋusɛ̃ na gàpòpo ɖèka kudo èlãa.

¹³Ènuwɔ̀na ɖèka be susu kpò ye lè woa si: e ye nyi be woa sɔ woabe hɔ̃hlɔ̃ kudo ŋusɛ̃ na èlãa.

¹⁴Wo la wɔ̀ àhùa kudo Àlɛ̃via, eye Àlɛ̃via la ɖù woa ji, ɖo e ye nyi tɔhonɔ̀wo be Tɔhonɔ̀, kudo èfìɔwo be Èfìɔ. Àmè kèwo wo yɔ bɔ̀ do e ŋuti, àmè kèwo wo cãawo, àmè kèwo nyi ànùkuameawo cã la ɖùji kudo è.”

¹⁵Àtikplɔtɔa gbà gblɔ̃ na mù be: “Èsì kèwo wò kpɔ lè àfi kè gbòlòwɔ̀tɔa lèa nyi èdùwo, àmèhawo, dùkɔ̃wo, kudo ègbè hamè-hamè ɖotɔwo.”

¹⁶Àzò èwo kèwo wò kpɔa, kudo èlãa la crì gbòlòwɔtɔa, e la ci àkòŋùgò, eye wo la ɖè è ɖo àma. Wo la ɖù yebe ŋutilã, eye wo la tɔ ɛ̀ èzò, be la fiɔ̃.

¹⁷Đo Mawu ɖo è ɖo woabe èjì mè, be woa wɔ̀ ɖo yèbe ɖoɖo ji, ne woa sɔ woabe jiɖùɖu be ŋusɛ̃ na èlãa, kaka na wàlɛbɛ kè Mawu be ènyàwo la zɔ̃ sùa.

¹⁸“Eye, nyɔ̃nù kè wò kpɔa, ye nyi èdù gã ɖìnyi kè ɖù ànyigbã be èfìɔwo jia.”