Read gen Àvìmènu 18 Bible Online

Àvìmènu 18 - gen bible

Àvìmènu 18

¹Ekèa yomè a, mù kpɔ àtikplɔtɔ bu, ɖì so jiŋùkusi va. Ŋusɛ̃ gã ɖe lè e si, eye yebe kɛ̃klɛ̃ kɔ̀ ànyigbã kpata.

²E do àpa ku ègbè sɛ̃sɛ̃ ɖe be: “E mù, Babɛ̀l gãa mù! E trɔ zũ gbɔ̃gbɔ̃ vuɛ̃wo, gbɔ̃gbɔ̃ màkɔ̀màkɔwo, xèvi màkɔ̀ màkɔ ku xèvi jiŋɔwo be nɔ̀pe.

³Đo dùkɔ̃wo kpata nù yebe àdɔ̀mèze be àhà kè yebe gbòlòwɔ̀wɔ hɛ̃ vaa. Ànyigbã ji be èfìɔwo wɔ̀ gbòlò kudo è, eye xixea mè be àjɔdotɔwo zũ àdɔ̀kùnɔ̀wo lè yebe kɛ̀sìnɔ̀nuwo be gbɔsùsu mè.”

⁴Eye mù gbà sè ègbè bu ɖì so jiŋùkusi le gblɔ̃ be: “Dùkɔ̃ nyèwo, mì to lè e mè! Ne mu nyi nène òa, mìawo cã mì la va wɔ̀ ènuvuɛ̃ kèwo ŋuti wo la sɔ àyà do na àmèwo dɔ̃ èto na mì, sìgbè lekè wo la sɔ wo dɔ̃ èto na ɛ̀a nène.

⁵Đo a, yebe ènuvuɛ̃wo sùgbɔ kaka yì tɔ jiŋùkusi, eye Mawu ɖoŋù ènu màjɔ̀ màjɔ kèwo be wɔ̀a.

⁶Mì ɖo ènu kè ye cã wɔ̀a tèpe na ɛ̀. Mì ɖo e tèpe na ɛ̀ zè èvè, sɔ zɔ̃ ɖo yebe èdɔwo ji. Kogò kè mè be caka yebe vɛ̃ lè na àmèwoa, mì caka yebe tèpe èvè na ɛ̀.

⁷Mì do àyà na ɛ̀, ne bèa lòfũ sìgbè àlekè ye be ɖù àgbè, kɔ ye ɖokoe yì ji lè àcɔɖoɖo kudo àgbèɖùɖu mèa nène. Đo, e gblɔ̃ na ye ɖokoe be: 'Èfìɔ nyɔ̃nù ye mù nyi. Nyè mu nyi àsukusi ò. Nyè mu la lòfũ gbèɖe ò!'

⁸Eŋuã ŋutia, èfũ kèwo la va kpe è, gbè ɖèkaa ye nyi èku, èfũlòlo kudo àdɔ̀wùamè. Eye èzò la fiɔ̃ ɛ̀, ɖo ŋusɛ̃tɔ ye nyi Tɔhonɔ̀, Mawu kè ɖo kòjo na ɛ̀a.”

⁹Ne ànyigbã ji be èfìɔ kèwo wɔ̀ gbòlò kudo è, eye wo ɖù àgbè kudo èawo kpɔ èzò kè le fiɔ̃ ɛ̀a be àzìzɔ le tùa, wo la làmɔɛ̃, la fã àvi ɖo e ŋuti.

¹⁰Wo la nɔ̀ àzɔ̀ge boo kudo vɔ̃vɔ̃, ɖo àyà kè be la nɔ ɖùa ŋuti, eye wo la nɔ gblɔ̃ be: “Bàbàa, bàbàa! Èwò, èdù ɖìnyi! Èwò Babɛ̀l ŋusɛ̃tɔ! Gàpòpo ɖèka mè kpò wo ɖo kòjo na wò!”

¹¹Ènusàtɔ gã kèwo ye lè ànyigbã jiawo, fã àvi, eye wo lòfũ ɖo e ta, ɖo àmè ɖekpekpe mu gbà le plè woabe ènusàsawo ò.

¹²Àjɔnu kèwo nyi sìka, klòsalò, èkpe xɔ̀asì ku jònuwo, àvɔ biɖi-biɖi, àvɔ bìabia, sedà ku àvɔ jɛ̃-hɛ̀wo. Èbuwo nyi àti xɔ̀asì hamèhamèwo kpata, ènu kèwo kpata wo sɔ ènyìɖu kpàa, sɔ àti xɔ̀asìwo kpàa, ènu kèwo kpata wo wɔ̀ ku gàjɛ̃, kudo gàyìbɔ, gbàkudo èkpe xɔ̀asìwo.

¹³Ènusàsa buwo cã nyi ègbe xɔ̃xũɛ kè wo yɔna be sinamɔ̀n, àmì xɔ̃xũɛ, àbɛyɛ ku lifi, vɛ̃, àmì, èwɔ mɛmɛ, *èlù, ènyìwo, àlɛ̃wo, èsɔwo ku àhùakèkewo, kluviwo kudo àhùalewo.

¹⁴Àmèwo la gblɔ̃ be: “Èkusɛ̃sɛ̃ kèwo àpo èkla jinaawo, jo lè gbɔ wò boo. Ènu kèwo jɔ̀nàjì na wòa ku àpo àcɔnuwo bu na wò boo, eye wò mu la gbà kpɔ wo gbèɖe ò.”

¹⁵Àmè kèwo do àjɔ sɔ ɖo àdɔ̀kùnu lè èdù kèa mèawo, la nɔ̀tè lè àzɔ̀ge ku vɔ̃vɔ̃, la nɔ kpɔ yebe àyàɖùɖua ɖoɖa. Wo la nɔ fã àvi, la nɔ lòfũ kudo vevesèse,

¹⁶eye wo la gblɔ̃ be: “Bàbàa! Bàbàa! Èdù ɖìnyi! Èdù kè wo ɖo àcɔ na ku àvɔ biɖi-biɖi be àwù, àvɔ jɛ̃ biɖi-biɖi be àwù ku àwù hɛ̃ɛa, èdù kè wo do sìka ku èkpe xɔ̀asì kudo jònu xɔ̀asìwo na a ye nyi ekèa!

¹⁷Àdɔ̀kùnu kèawo kpata trɔ zũ ènu gũgũ lè gàpòpo ɖèka mè kpò!” Ètɔ̀jihũ-mègãwo keŋu ku ètɔ̀jihũ-ɖotɔwo, ètɔ̀jihũ-kùtɔwo ku àmè kèwo kpata wɔ̀nà ètɔ̀dɔawo keŋu tɔtè lè àzɔ̀ge,

¹⁸eye wo do àpa, ekè wo kpɔ èdù kè le bìzòa be àzìzɔa, gblɔ̃ be: “Èdù kɛ ye sɔ̀ kudo èdù gã kèa ò?”

¹⁹Wo le lɔ hũhũ le kɔ̀ ɖo èta mè, le do àvi ku èfũ be àpa gblɔ̃ be: “Bàbàa! Bàbàa na èdù gãa! Ekè na be àmè kèwo si àpùjihũ lèawo jè àdɔ̀kù a! Gàpopo ɖèka mè kpò ye ènu gble do wò.”

²⁰Oò, èjì ne jɔ̀ wò ɖo e ŋuti, jiŋùkusi! Mì àɖèsãmewo, ku mì, *àmèdɔ̃dɔ̃wo, mì, Mawu be gblɔ̃ɖɛtɔwo, mì jɔ̀jì, ɖoa wo dɔ̃ èto na èdù kèa. Mawu ɖo kòjo na ɛ̀, ɖo ènu kè be wɔ̀ ku mìa ŋuti!

²¹Eye, mù kpɔ àtikplɔtɔ ŋusɛ̃tɔ ɖe, e sɔ èkpe kpɛ̃kpɛ̃ ɖe kè lè sìgbè ète gã ɖe nènea, dà ɛ̀ ŋùgbe ɖo àpù mè, le gblɔ̃ be: “Nène a ye wo la sɔ Babɛ̀l, èdù gãa dãŋùgbe sɛ̃sɛ̃ ɖe, eye wo mu la gbà kpɔ ɛ̀ gbèɖe ò.

²²Wo mu la gbà sè èhɛpòtɔwo, èhàjìtɔwo, èzèkutɔwo gbàkudo èkpɛ̃kutɔwo be ègbè gbèɖe lè gbɔ wò ò. Wo mu la gbà kpɔ àɖàŋùdɔwɔ̀tɔ ɖekpe lè gbɔ wò ò. Eye wo mu la gbà sè ète tùtu be ègbè lè gbɔ wò gbèɖe ò.

²³Kãligbɛ̃ be kɛ̃klɛ̃ mu la gbà kɔ̀ lè gbɔ wò gbèɖe ò, eye wo mu la gbà sè nyɔ̃nùkpetɔ kudo nyɔ̃nù kpekpe be gbè lè èwò mè gbèɖe ò, ɖo àjɔdotɔ wòwo nyi ànyigbã ji huɛ̃yiwo, eye wò sɔ àpo kpajije sɔ flù dùkɔ̃wo keŋu.”

²⁴Babɛ̀l be èdùa mè ye wo wù gblɔ̃ɖɛtɔwo ku àɖèsãwo kudo àmè kèwo keŋu wo wù lè ànyigbã jiawo lè.