Read gen Àvìmènu 19 Bible Online

Àvìmènu 19 - gen bible

Àvìmènu 19

¹Ekèa yomè a, mù sè ègbè ɖe le ɖì sìgbè àmèha gã ɖe be ègbè nène, lè jiŋùkusi be: “Àlèluyà! Hlùɛ̃gã, gogo ku ŋusɛ̃ ye nyi miabe Mawu a tɔ̀!

²Yebe kòjoɖoɖo nyi àdodoe, eye be lè jɔ̀jɔɛ! Đo e gblehùɛ do gbòlòwɔ̀tɔ gãa kè gble ànyigbã ji kudo yebe gbòlòwɔ̀wɔa, eye be biɔ ɛ̀ Mawu be sumɔ̃vi kèwo be wùawo be èhlɔ̃.”

³Wo gbà do àpa be: “Àlèluyà! Yebe àzìzɔa le tù yì ji, so màvɔ mè, yì màvɔ mè.”

⁴Àmègã èwì vɔ ènèawo kudo ènu àgbè-àgbè ènèawo blìbɔ̀ le sumɔ Mawu, àmè kè lè èfìɔzìkpea jia, eye wo gblɔ̃ be: “Àmèn! Àlèluyà!”

⁵Eye, ègbè ɖe ɖì so èfìɔzìkpea mè be: “Mì kafu miabe Mawu a, mì, yebe sumɔ̃viwo kpata, mì, àmè gbalo ku àmè jɔ̀ àmè kèwo kpata vɔ̃na ɛ̀awo.”

⁶E yomè a, ègbè ɖe ɖì sìgbè àmèha gã ɖe be ègbè nène, àlo àpùwo be ɖìɖi, àlo èji be ègbè ɖèɖe sɛ̃ŋu nène, le gblɔ̃ be: “Àlèluyà, ɖo Tɔhonɔ̀ miabe Mawu, Ŋusɛ̃kpatatɔa le ɖùfìɔ!

⁷Mì na mia kpɔ jìjɔɛ, mia haya ne mia na ɛ̀ gogo, ɖo Àlɛ̃via be nyɔ̃nùkpekpe be gàmèa sù, eye èsrɔ̃a jrà ye ɖokoe ɖo vɔ̀.

⁸Wo sɔ àvɔ biɖi-biɖi be àwù kè le dàzòa na ɛ̀ ne bèa do.” (Đo a, àvɔ biɖi-biɖi ye nyi àɖèsãwo be jɔ̀jɔɛwɔ̀wɔ be èdɔwo.)

⁹Eye e gblɔ̃ na mù be: “Ŋlɔ̀ ekèa ɖɛ be: wo la tusì na àmè kèwo wo yɔ be woa va àlɛ̃via be nyɔ̃nùkpepea.” E gbà gblɔ̃ na mù be: “Mawu ŋutɔ be ènumènya ye nyi ekèa.”

¹⁰Eye, mù jè èklò ɖo yebe àfɔ̀nu la jè *èɖɛ̀ na ɛ̀, vɔ̀a, e gblɔ̃ na mù be: “Kpɔ, mù gbà wɔ̀ ò. Èwò ku nɔ̀vi wò kèwo le Kristò be ɖase ɖo àsiawo be èhavi ye mù nyi, Mawu kpò ye wò la sumɔ.” Yesù be ɖasea, ènyàgblɔ̃ɖɛ be gbɔ̃gbɔ̃ ye be nyi.

¹¹Ekèa yomè a, mù kpɔ jiŋùkusi hũ, eye èsɔ ɣe ɖe ze. Àmè kè nɔ̀ e jia be nyikɔ ye nyi Ànùkuamè ku Nyàwototɔ. E ɖona kòjo jɔ̀jɔɛ, eye e wɔ̀nà àhùa kudo jɔ̀jɔɛ nyinyi.

¹²Yebe ŋùkuviwo lè sìgbè èzò be àɖe nène, eye èfìɔkuku sùgbɔ lè èta na ɛ̀. Wo ŋlɔ̀ nyikɔ ɖe kè ye ɖèka kpò nyaa ɖo e ŋuti.

¹³E do àwù ɖe, kè wo nyrɔ̃ ɖo èhũ mèa. Yebe nyikɔ ye nyi “Mawu be ènyà.”

¹⁴Jiŋùkusi be àhùakɔ̃wo do àvɔ biɖi-biɖi be àwù dàzò ɣewo, eye wo lè èsɔ ɣewo ji, kplɔ̀ ɛ̀ do.

¹⁵Èwui ɖaɖa ɖe tona so ènu mè na ɛ̀. Èwui ŋua ye be sɔ dɔ̃nà èto na dùkɔ̃wo. E la sɔ gàyìbɔ be èkpò sɔ kplɔ̀ wo, eye e la tùkù vɛ̃kusɛ̃sɛ̃ lè Mawu Ŋusɛ̃kpatatɔ be àdɔ̀mèze be vɛ̃fiɔ̃nua mè.

¹⁶Nyikɔ kè wo ŋlɔ̀ ɖo yebe àwù gãa kudo yebe àta ŋutia nyi: “èfìɔwo be Èfìɔ ku tɔhonɔ̀wo be Tɔhonɔ̀.”

¹⁷E yomè a, mù kpɔ àtikplɔtɔ ɖe tɔtè lè èwè mè. E do àpa sɛ̃sɛ̃ ɖe, yɔ xèvi kèwo kpata le zrò lè àya mèa, gblɔ̃ be: “Mì va lòo! Mì va bɔ̀ ne mìa ɖù Mawu be ènu ɖùɖu gãa.

¹⁸Mì va ɖù èfìɔwo, àhùagawo, gbãdãgbãwo, ŋusɛ̃tɔwo, èsɔwo ku èsɔdotɔwo be ŋutilã. Mì va ɖù àmèwo keŋu be ŋutilã, àblɔ̀ɖèviwo ku kluviwo, àmè sĩsĩwo ku ɖèviwo keŋu be ŋutilã!”

¹⁹Eye, mù kpɔ èlãa ku ànyigbã ji be èfìɔwo kudo woabe àhùakɔ̃wo, wo bɔ̀ ne woa wɔ̀ àhùa kudo àmè kè lè èsɔa jia kudo yebe àhùakɔ̃a.

²⁰Wo le èlãa àhùale kudo àjè-gblɔ̃ɖɛtɔ kè wɔ̀ kpajijewo lè yebe ŋùmè a. Kpajije kèawo be sɔ flù àmè kèwo ŋuti èlãa be jèsìdo lè, ku àmè kèwo sumɔ yebe ŋùfɛ̃awo. Wo sɔ èlãa kudo àjè-gblɔ̃ɖɛtɔa dãŋùgbe àgbè-àgbè ɖo èzò be ètãku kè mè èzòkpewo le bì lèa mè.

²¹Àmèkpɔ̀tɛawo yaa, wo wù wo kudo èwui kè to so èsɔdotɔa be ènu mè, eye èxèwo kpata ɖù woabe ŋutilã.