Read gen Àvìmènu 2 Bible Online

Àvìmènu 2 - gen bible

Àvìmènu 2

¹“Ŋlɔ̀ ènyà kèa ɖoɖa Efesò be èhabɔ̀bɔa be àtikplɔtɔa be: “Àmè kè le wètrivi adrɛ̃awo ɖo ɖùsi-lɔ mè, eye be lè zɔ̃ lè sìka kãligbɛ̃ti adrɛ̃awo be dòdòmèa gblɔ̃ be:

²mù nya èdɔ kè wò le wɔ̀a. Mù nya lekè wò lè do veve ènu ɖo, kudo lekè wò dojì, kpe èfũ ɖoa. Mù nya be wò mu lɔ̃ àmè vuɛ̃wo be ènyà gbɔ ò. Wò do àmè kèwo yɔna woa ɖokoewo be *àmèdɔ̃dɔ̃wo, vɔ̀ wo mu nyi àmèdɔ̃dɔ̃wo òawo kpɔ, eye wò nya be àjèɖàtɔwo ye wo nyi.

³Wò do veve ènu, ɖù àyà ɖo ŋuti nyè eye èjì mu ɖè lè pò na wò ò.

⁴Gãkea, ènyà kè mù ɖo ɖo ŋuti wòa, ye nyi be: wò mu gbà le lɔ̃ mù fifì, sìgbè àlekè wò lɔ̃ mù sãa nène ò.

⁵Ye ŋutia ɖoŋù àfi kè wò gɛ̃ soa, ne wòa ɖɔ̀lì èdɛ̃, àleke be wòa gbà nɔ wɔ̀ sìgbè lekè wò wɔ̀nà sãa nène. Ne mu nyi nène òa, mù la va ɖè kãligbɛ̃ti wòa lè yebe tèpe!

⁶Ènu kè jè ŋùmè na mù lè àpo wɔ̀na mèa, ye nyi be wò crì àmè kèwo jè Nikola be ènufiɔfiɔ ku yebe wɔ̀nawo yomè awo, sìgbè lekè nyè ŋutɔ mù crì woa nène.”

⁷“Àmè kè si èto lèa, ne sè ènu kè Gbɔ̃gbɔ̃ a le gblɔ̃ na èhabɔ̀bɔawo be: “Àmè kè la ɖù jia, mù la na ɛ̀ àti kè nana àgbè a be èkusɛ̃sɛ̃ kè lè Mawu be àbɔ mèa, be la ɖù.”

⁸“Ŋlɔ̀ ènyà kèa ɖoɖa Smirnà be èhabɔ̀bɔa be àtikplɔtɔa be: “Àmè kè nyi Cucugbãa ku Mɛmlɛ̃a; Àmè kè ku, eye be gbà gbɔ̀ àgbè a gblɔ̃ be:

⁹Mù nyã àpo àyà ɖùɖu ku àlekè wò jè èhiã a, sĩ vɔ̀ a, wò jè àdɔ̀kù gbɔ̀xue. Mù nya èvlo kè àmè ɖewo lè do wòa. Wo be yèwo nyi Yudàviwo, vɔ̀ wo mu nyi ì ò, Satana be èhabɔ̀bɔ ye wo nyi.

¹⁰Mù gbà vɔ̃ àyà kè wò la ɖù sɔ̀sɔɛɖea ò. Kpɔɖa, Àbòsam[6] le ji la na woa do-gà mìa dòmètɔ ɖewo, la sɔ do mì kpɔ; mì la ɖù àyà ŋùkèkè èwo. Wɔ̀ ànùkua kaka yì èku mè ŋutɔ cã, eye mù la na wò àgbè jègbà.”

¹¹“Àmè kè si èto lèa, ne sè ènu kè Gbɔ̃gbɔ̃ a le gblɔ̃ na èhabɔ̀bɔawo!” “Àmè kè ɖùjia, èku èvègɔ̃a[7] mu la wɔ̀ èvuɛ̃ ɖe na ɛ̀ ò.”

¹²“Ŋlɔ̀ ekèa ɖoɖa èhabɔ̀bɔ kè lè Pɛrgamɔ̀a be àtikplɔtɔa cã be: “Àmè kè si ye èwui-nuvè ɖaɖa lèa, gblɔ̃ be:

¹³Mù nya àpo nɔ̀pe: àfi kè Satana be èfìɔzìkpe lèa. Wò le ɖo ŋuti nyè sɛ̃sɛ̃ ɖe. Togbɔ be wo wù àpe ɖàsèfo Ãtipà nyàwototɔa lè mìa dòmè, àfi kè Satana sò àxue ɖo ŋutɔ cã a, wò mu gbe ènu lè ŋuti nyè ò.

¹⁴Vɔ̀a mù ɖo ènyà vi ɖe ɖo ŋuti wò. Àmè ɖewo lè gbɔ wò, kèwo le Balam be ènufiɔ-àmè ɖo àsi: Balam kèa ye fiɔ Bàlak be ne sɔ àfɔ̀klɛ̃nu[8] ɖo Izràɛlviwo be ŋùkɔ̀, ne woa ɖù ènu kè wo sɔ savɔ na vòduwo, ne woa trɔ lè Mawu yomè.

¹⁵Nène a ke mìa dòmètɔ ɖewo cã jè Nikola be ènufiɔfiɔa yomè yeŋu.

¹⁶Ye ŋutia, ɖɔ̀lì èdɛ̃, ne mu nyi nène òa, mù la va gbɔ wò sɔ̀sɔɛɖe kèa, eye mù la sɔ èwui kè lè àpe ènu mèa wɔ̀ àhùa ku nène meawo.”

¹⁷“Àmè kè si èto lèa, ne sè ènu kè Gbɔ̃gbɔ̃ a le gblɔ̃ na èhabɔ̀bɔawo be: “Àmè kè ɖùjia, mù la na ɛ̀ manà wawlaa. Bɔ̀ ɖo ekèa ŋutia, mù la na ɛ̀ èkpe ɣe kè ji wo ŋlɔ̀ nyikɔ yeye ɖe ɖo, nyikɔ kè àmè ɖekpe mu nya, tovò na àmè kè xɔ̀ ɛ̀a ò.”

¹⁸“Ŋlɔ̀ ènyà kèa ɖoɖa Tiatirà be èhabɔ̀bɔa be àtikplɔtɔa be: “Mawu be Èvi, kè be ŋùkuviwo lè sìgbè èzò hɛ̀ɛ be àɖe nène, eye yebe àfɔ̀wo lè sìgbè gàjɛ̃[9] xɔ̀ àsì nènea, gblɔ̃ be:

¹⁹Mù nya èdɔ kè wò wɔ̀a. Mù nya àpo lɔ̃lɔ̃, àpo xɔ̀sè, àpo sùmɔ̀-sumɔ ku àlekè wò dojì ɖù àyàa. Èdɔ kè wò le wɔ̀ fifìa sùgbɔ wu ekè wò wɔ̀ va yìa.

²⁰Vɔ̀a ènyà kè mù ɖo ɖo ŋuti wòa, ye nyi be, wò ɖè èmɔ na Jezabɛl, nyɔ̃nù ŋua, kè sɔ ye ɖokoe wɔ̀ Mawu be gblɔ̃ɖɛtɔa, be le fiɔ ènu àpe *àmèdɔ̃dɔ̃wo, sɔ le blè wo, ne woa trɔ lè Mawu yomè, eye woa ɖù ènu kè wo sɔ savɔ na vòduwoa.

²¹Mù na ɛ̀ gàmè ne bèa ɖɔ̀lì èdɛ̃. Vɔ̀a, e gbe be yè mu la tɔtè gbòlò wɔ̀wɔ ò.

²²Kpɔɖa, mù la sɔ ɛ̀ dãŋùgbe ɖo èdɔ̀ba-ji, ye ku àmè kèwo le wɔ̀ gbòlò kudo èa. Ne wo mu trɔ lè èvuɛ̃ wɔ̀wɔ yomè òa, mù la na wo la ɖù àyà ŋɔjitɔ̀.

²³Mù la wù èviawo. Nène a, èhabɔ̀bɔwo kpata la nya be Ènyè ye nyi Àmè kè kùnà èjì mè be susuwo mè kito-kitoa. Mù la ɖo e tèpe na àmè sia àmè lè mìa dòmè, zɔ̃ ɖo àmè sia àmè be wɔ̀nawo ji.”

²⁴“Vɔ̀a, mù le gblɔ̃ ɛ̀ na mì, mì, Tiatirà be àmè kpɔ̀tɛ kèwo mu xɔ̀ ènufiɔfiɔ kèa òa, mì, àmè kèwo mu jrònà ènu kè wo le yɔ be Satana be ènyà wawla wɔ̀gũa mè kpɔ òa, nyè mu la dro àgbã bu na mì ò.

²⁵Gãkea ènu kè mì xɔ̀sèa, mì le è ɖo àsi nyuɛ̃ ɖe, kaka ma va.”

²⁶“Àmè kè le èdɔ nyèwo ɖo àsi, kaka yì vɔ̀vɔnu, eye be ɖùjia, mù la na ɛ̀ ŋusɛ̃ ɖo dùkɔ̃wo ji.

²⁷E la kplɔ̀ wo kudo gàyìbɔ be èkpò, eye be la gbã wo sìgbè ànyikɔ be èzewo nène.

²⁸Ŋusɛ̃ la nɔ̀ e si, sìgbè leke nyè cã mù xɔ̀ ŋusɛ̃ so Ètɔ nyè gbɔa nène, eye mù la na ɛ̀ ŋùdekɛ̃nyɛ be wètrivia.”

²⁹“Àmè kè si èto lèa, ne sè ènu kè Gbɔ̃gbɔ̃ a le gblɔ̃ na èhabɔ̀bɔawo.”