Read gen Àvìmènu 20 Bible Online

Àvìmènu 20 - gen bible

Àvìmènu 20

¹Eye, mù kpɔ àtikplɔtɔ ɖe le ɖì so jiŋùkusi. E le àvlìmè be sãfe ku kɔ̀sɔ̀kɔsɔ kpɛ̃kpɛ̃ ɖe ɖo àsi.

²E le èhɔ̃ drìbàa, èdã kè lè xoxo, kè wo yɔna be Àbòsam ku Satanàa, àtikplɔtɔa bla ɛ̀ dà ɖɛ be ne nɔ̀ ànyi èpè èkà èwì vɔ àtɔ̃ (1000).

³E sɔ èhɔ̃ drìbàa dãŋùgbe ɖo àvlìmè, eye be tu ì ɖo e mè, eye be tre e nu, ne mu gbà flù dùkɔ̃wo ke ò, kaka na èpè èkà èwì vɔ àtɔ̃ (1000) be sùsu. E yomè a, wo la ɖè è ègà na hùenu vi ɖe.

⁴E yomè a, mù kpɔ àmè ɖewo nɔ̀ ànyi ɖo èfìɔzìkpewo ji. Wo na wo ŋusɛ̃ be woa ɖo kòjo. Mù gbà kpɔ àmè kèwo wo wù, be wo ɖù ɖase so Yesù ku mawunyaa ŋutia be èklawo. Wo mu sɛ̃ èlãa, àlo yebe tata ò, eye yebe jèsìdo mu lè ŋùgonu àlo àlɔ̀ ŋuti na wo ò. Wo gbɔ̀ àgbè eye wo ɖùfìɔ kudo Kristò èpè èkà èwì vɔ àtɔ̃ (1000).

⁵Àmè kukuwo be fɔ̃fɔ̃ so èku cucugbã ye nyi ekèa. Àmè kuku kèwo kpɔ̀tɔ̀awo mu gbɔ̀ àgbè keŋu gbɔ̀xue èpè èkà èwì vɔ àtɔ̃a nu va yì ò.

⁶Sìtu ɖèɖe kudo kɔ̀kɔ̀ɛ ye be nyi na àmè kèwo ɖo mamã lè fɔ̃fɔ̃ so èku cucugbãa mèa. Èku èvègɔ̃a mu ɖo ŋusɛ̃ ɖe ɖo woa ji ò. Wo la nyi Mawu ku Kristò be mawunɔwo eye wo la ɖùfìɔ kudo è, kaka na èpè èkà èwì vɔ àtɔ̃ (1000).

⁷Ne èpè èkà èwi vɔ àtɔ̃a (1000) nu va yì vɔ̀a, wo la ɖè ègà Satana so yebe ègàkpaa mè.

⁸E la to, la yì blè èdù kèwo lè ànyigbã be koŋù ènèawo kpata ji, ekèwo nyi Gɔg ku Magɔg-a. E la bɔ̀ wo na àhùawɔ̀wɔ. Wo sùgbɔ sìgbè àpùta kɔ nène.

⁹Wo va cɔ̃ ànyigbãa kpata ji, eye wo xa àmè kɔ̀kɔ̀ɛwo be àsàɖa ku èdù ɖève a. Eye èzò gɛ̃ so jiŋùkusi va fiɔ̃ wo keŋu.

¹⁰Wo sɔ Àbòsam, àmèflùtɔa dà ɖo èzò ku èzò be ètãkua mè, lè èlãa ku àjè-gblɔ̃ɖɛtɔa gbɔ. Wo la ɖù àyà èzã kudo kedè so màvɔ yì màvɔ.

¹¹E yomè a, mù kpɔ èfìɔzìkpe ɣe gã ɖe ku àmè kè nɔ̀ ànyi ɖo e jia. Ànyigbã ku jiŋùkusi klo va yì, lè yebe ŋùmè, ŋùgbe mà gble ɖɛ.

¹²Eye, mù kpɔ àmèkukuwo, àmè sĩsĩwo ku ɖèviwo. Wo tɔtè ɖo èfìɔzìkpea be ŋùkɔ̀. Wo hũ xoma ɖewo. Wo gbà hũ xoma bu cã, ekè le nyi àgbè xoma a. Eye wo ɖo kòjo na àmèkukuwo, zɔ̃ ɖo èdɔ kè wo wɔ̀a ji, zɔ̃ ɖo ènu kè wo ŋlɔ̀ ɖo xoma awo mèa ji.

¹³Àpù jo yebe àmèkukuwo, èku kudo èkuwode cã jo àmèkuku kèwo lè woa mèawo. Eye wo ɖo kòjo na àmè sia àmè, zɔ̃ ɖo yebe èdɔwo ji.

¹⁴E yomè a, wo sɔ èku kudo èkuwode dãŋùgbe ɖo èzò be ètãkua mè. Èzò be ètãku kèa ye nyi èku èvègɔ̃a.

¹⁵Wo sɔ àmè ɖekpekpe kè be nyikɔ wo mu ŋlɔ̀ ɖo àgbè xoma a mè òa, dãŋùgbe ɖo èzò be ètãkua mè.