Read gen Àvìmènu 21 Bible Online

Àvìmènu 21 - gen bible

Àvìmènu 21

¹Ekèa yomè a, mù kpɔ jiŋùkusi yeye ku ànyigbã yeye. Đo a, jiŋùkusi cucugbã ku ànyigbã cucugbã klo va yì. Àpù cã mu gbà lè ò.

²Eye, mù kpɔ Yèruzàlɛm yeye, èdù kɔ̀kɔ̀ɛa, le ɖì so jiŋùkusi, so Mawu gbɔ gbãnà. Wo ɖo àcɔ na ɛ̀ nyuɛ̃ ɖe sìgbè nyɔ̃nùkpekpe, kè wo jràɖo ɖɛ na èsrɔ̃a nène.

³Mù sè ègbè gã ɖe ɖì so èfìɔzìkpea mè be: “Kpɔɖa, Mawu be nɔ̀pea lè àgbètɔwo dòmè ye nyi ekèa. E la nɔ̀ woa dòmè, eye wo la nyi yebe dùkɔ̃wo. Mawu ŋutɔ la nɔ̀ ku wo, eye be la nyi woabe Mawu.

⁴E la tutu àɖàsìwo keŋu lè woabe ŋùkuwo mè. Èku mu gbà la nɔ̀ ànyi ò. Eye èfũlòlo ku àlenana, àlo veve sèse cã mu gbà la nɔ̀ ànyi ò; ɖo xixe xoxoa klo va yì.”

⁵Eye, àmè kè lè èfìɔzìkpea jia gblɔ̃ be: “Kpɔɖa, mù wɔ̀ ènuwo keŋu yeye.” E gbà gblɔ̃ be: “Ŋlɔ̀ ɛ̀ ɖɛ, ɖo ènyà kèawo ɖo kãkã ɖo e ji, eye wo nyi nyàwo.”

⁶Eye e gblɔ̃ na mù be: “Ènuwo keŋu zɔ̃ sù! Ènyè ye nyi Alfà ku Òmegà, Tɔtɔji ku Vɔ̀vɔ̀nu-a. Àmè kè èsìkɔ le tìa, mù la na ɛ̀ àgbèsìdoa be èsì fàa.

⁷Àmè sia àmè kè ɖùjia, la sɔ ènu kèa ɖù ècrɔ̃. Mù la nyi yebe Mawu, eye ye cã la nyi èvi nyè.

⁸Sĩ vɔ̀a, vɔ̃vɔ̃nɔ̀tɔwo, màxɔ̀sètɔwo, ènunyɔŋuwɔ̀tɔwo, èhlɔ̃dãtɔwo, gbòlòwɔ̀tɔwo, àzetɔwo, vòdusɛ̃tɔwo ku àjèɖàtɔwo kpata, la ɖo woabe mamã lè èzò be ètãku kè le bì kudo èzòkpea mè. Ekèa ye nyi èku èvègɔ̃a.”

⁹Ekèa yomè a, àtikplɔtɔ adrɛ̃ kèwo ye le kogò, kèwo ɖɔ ku àyà do na àmè adrɛ̃ kpɔ̀tɛawo ɖo àsia, dòmètɔ ɖèka pò nupo na mù gblɔ̃ be: “Va, mù la sɔ nyɔ̃nù kpekpe kè nyi Àlɛ̃via be èsrɔ̃a fiɔ wò.”

¹⁰Gbɔ̃gbɔ̃ a ɖo mè nyè, eye àtikplɔtɔa kɔ mù yì èto gã yì ji ɖe ji. E sɔ Yèruzàlɛm, èdù kɔ̀kɔ̀ɛ, kè le ɖì so jiŋùkusi so Mawu gbɔa fiɔ mù.

¹¹E le kɔ̀ kudo Mawu ŋutɔ be gogo. Yebe kɛ̃klɛ̃a lè sìgbè èkpe xɔ̀asì tɔ̀xɛ ɖe nène. E lè sìgbè jàspò-kpe àmàmu kè mè kɔ̀ sìgbè àpùpui nène.

¹²Èglì yì ji tìtri, ɖe trɔ do è, eye àgbo woèvè lè èglìawo nu. *Àtikplɔtɔ woèvè le ɖia àgboawo. Wo ŋlɔ̀ Izràɛlviwo be kɔ̀ta woèvèawo be nyikɔ ɖo àgboawo nu.

¹³Àgbo ètɔ̃ lè èwèzɛ̃pe, ètɔ̃ le àvego, ètɔ̃ lè àpùgo eye ètɔ̃ lè èwèɖoxɔ̀pe.

¹⁴Èdùa be èglìawo ɖo dodoe woèvè, eye wo ŋlɔ̀ Àlɛ̃via be *àmèdɔ̃dɔ̃ woèvèawo be nyikɔ ɖo woa ŋuti.

¹⁵*Àtikplɔtɔ kè pò nupo na mùa, le sìka jijeti kè be la sɔ jije èdùa, yebe àgboawo ku èglìawoa ɖo àsi.

¹⁶Èdùa be koŋù ènèawo sɔ̀, yebe dìdimè ku kèkemè lè ɖèka. Àtikplɔtɔa jije èdùa kudo jijetia, eye yebe jijemè nyi kpeti hotu àdɛ̃ (12000). Èdùa be dìdimè, kèkemè kudo èjiyìyi nyi ɖèka.

¹⁷Àtikplɔtɔa jije èglìa cã, eye yebe èjiyìyi lè àbɔglìgo èkà ètɔ̃ takpo ci ènè (144), jijènu kè wo zãnaa.

¹⁸Wo sɔ èkpe xɔ̀asì àmàmu kè wo yɔna be jàspò-kpea sɔ ɖo èglìawo, eye wo sɔ sìka kè mè kɔ̀ sìgbè àpùpui nènea sɔ sò èdùa.

¹⁹Wo sɔ èkpe xɔ̀asì hamè-hamèwo sɔ ɖo àcɔ na èdùa be dòdoea. Wo wɔ̀ dodoe cucugbãa ku jàspò-kpe, èvègɔ̃a ku safirò-kpe èblɔ, ètɔ̃gɔ̃a ku kàlkɛdɔ̀n, ènègɔ̃a ku ɛ̀mèrodò,

²⁰àtɔ̃gɔ̃a ku sardonikà, àdɛ̃gɔ̃ a ku sardò, adrɛ̃gɔ̃ a ku krizòlitè, ènyigɔ̃a ku bɛ̀rilò, àsiɖèkɛgɔ̃a ku tòpazò, èwogɔ̃a ku krizòpraz, woeɖèkagɔ̃a ku hìyasɛ̃tò, woèvègɔ̃a ku àmetistò.

²¹Èdùa be àgbo woèvèawo nyi jònu woèvè, eye àgbo ɖe sia ɖe nyi jònu ɖèka kpò. Èdùgboa nu nyi sìka kè kɔ̀ ceŋu-ceŋu sìgbè kristalò nènea ɖèɖe.

²²Nyè mu kpɔ mawuxɔ ɖe lè èdùa mè ò, ɖo Tɔhonɔ̀ Mawu, Ŋusɛ̃kpatatɔ ku Àlɛ̃via ye nyi yebe mawuxɔ.

²³Èwè àlo wètri mu hiã lè èdùa mè ò, ɖo Mawu be gogo le kɔ̀ èdùa, eye Àlɛ̃via le nyi yebe kãligbɛ̃.

²⁴Dùkɔ̃wo la zɔ̃ lè yebe kɔ̀kɔ̀ɛ nu, eye ànyigbã ji be èfìɔwo la va jè *èɖɛ̀ na ɛ̀ ku woabe àdɔ̀kùnuwo.

²⁵Wo mu la tu èdùa be àgbowo lè ŋùkèkè mè ò, ɖo èzã mu la do lè e mè ò.

²⁶Dùkɔ̃wo la hɛ̃ woabe gogo kudo woabe bùbuwo va èdùa mè.

²⁷Ènu pòɖi ɖe mu la ɖo èdùa mè ò. Àjèɖàtɔwo ku àmè kèwo wɔ̀nà ènu kèwo pònàɖi àmèawo dòmètɔ ɖekpe mu la ɖo èdùa mè, tovò na àmè kèwo be nyikɔ wo ŋlɔ̀ ɖo Àlɛ̃via be àgbè xoma a mèa ò.