Read gen Àvìmènu 22 Bible Online

Àvìmènu 22 - gen bible

Àvìmènu 22

¹E yomè a, àtikplɔtɔa sɔ ètɔ̀ sàsra ɖe kè be èsì nana àgbè a fiɔ mù. Èsìa mè kɔ̀ ceŋu-ceŋu sìgbè àpùpui nène, eye, e le to so Mawu kudo Àlɛ̃via be èfìɔzìkpea mè.

²Lè èdùgboa ku ètɔ̀ sàsraa be àlɔ̀zɛ̃ èvèawo be dòdò mèa, àgbèti ɖe lè, kè nana ènuku yàya zè woèvè lè èpè mè. Wètri ɖe sia ɖe mèa, e nana yebe èkusɛ̃sɛ̃, eye yebe àmàwo dànà èdɔ̀ na dùkɔ̃wo.

³Kpɛ̃sɛ̃ ɖe mu la gbà nɔ̀ ànyi ò. Mawu kudo Àlɛ̃via be èfìɔzìkpea la nɔ̀ èdùa mè, eye yebe sumɔ̃viwo la nɔ jè *èɖɛ̀ na ɛ̀.

⁴Wo la kpɔ yebe ŋùmè, eye yebe nyikɔ la nɔ̀ woabe ŋùgonu.

⁵Èzã mu la gbà do ke ò, eye wo mu la gbà hiã kãligbɛ̃ àlo èwè be kɛ̃klɛ̃ ò, ɖo Tɔhonɔ̀ Mawu la kɔ̀ yebe kɔ̀kɔ̀ɛ ɖo woa ji, eye wo la ɖùfìɔ kaka sɔ yì.

⁶E yomè a, àtikplɔtɔa gblɔ̃ na mù be: “Ènyà kèawo ɖo kãkã ɖo e ji, eye wo nyi nyàwo. Tɔhonɔ̀ gblɔ̃ɖɛtɔwo be gbɔ̃gbɔ̃ be Mawu a, dɔ̃ yebe àtikplɔtɔ ɖoɖa ne bèa sɔ ènu kè la jɔ̀ sɔ̀sɔɛ ɖe a, fiɔ yebe sumɔ̃viwo.”

⁷“Kpɔɖa, mù gbãnà sɔ̀sɔɛ ɖe kèa! Sìtu ɖèɖe ye e nyi na àmè kè lebè na ègbèdoàsi be nya kèawo!”

⁸Ènyè Yòhanɛ̀s ye nyi àmè kè sè, eye mù kpɔ ènu kèawoa. Eye ekè mù sè, eye mù kpɔ woa, mù jè èklò ɖo Mawu be àtikplɔtɔ kè sɔ ènuawo fiɔ mùa be àfɔ̀wo nu, la sumɔ ɛ̀.

⁹Vɔ̀a e gblɔ̃ na mù be: “Kpɔ, mù gbà wɔ̀ ò! Èhadɔwɔ̀tɔ ye mù nyi na èwò ku nɔ̀vi wò kèwo nyi gblɔ̃ɖɛtɔwo kudo àmè kèwo le xoma kèa be ènyàwo ɖo àsiawo. Mawu kpò ye wò ɖo la sumɔ.”

¹⁰Eye àtikplɔtɔa gblɔ̃ na mù be: “Mù gbà wla ènyàgblɔ̃ɖɛ kèwo wo ŋlɔ̀ ɖo xoma kèa mèa ò, ɖoa ènu kèawo la va e mè, sɔ̀sɔɛ ɖe kèa.

¹¹Àmè kè le wɔ̀ èvuɛ̃a, ne nɔ̀ èvuɛ̃ wɔ̀wɔ ji, àmè kè nyi èɖimea, ne nɔ̀ èɖinu wɔ̀wɔa ji, vɔ̀a àmè kè nyi àmèjɔ̀jɔɛa, ne nɔ̀ jɔ̀jɔɛ wɔ̀wɔa ji, àmè kè nyi àmè kɔ̀kɔ̀ɛa, ne nɔ̀ kɔ̀kɔ̀ɛ nyinyia ji kpò.”

¹²Yesù be: “Kpɔɖa, mù gbãnà sɔ̀sɔɛ ɖe kèa! Eye fɛ̃tu nyèa bɔ̀ ɖo ŋuti nyè, ne ma tu èfɛ̃ na àmè sia àmè, zɔ̃ ɖo yebe èdɔwo ji.

¹³Ènyè ye nyi Alfà ku Òmegà, Cucugbãa ku Mlɛ̃a; Gɔ̃mèjèjea ku Vɔ̀vɔnua.”

¹⁴Sìtu ɖèɖe ye e nyi na àmè kèwo nyà woabe àwùwo, be woa ɖè èmɔ na wo ne woa ɖo mamã lè àgbè be àtia mè ne woa to àgboawo nu ɖo èdùa mè.

¹⁵Vɔ̀a, àmè kèwo ye lè èdùa godoawo ye nyi: àmè jiŋɔwo, majikìwɔ̀tɔwo, gbòlòwɔ̀tɔwo, èhlɔ̃dãtɔwo, vòdu sumɔtɔwo ku àmè kèwo lɔ̃nà àjèɖàɖaawo.

¹⁶“Ènyè Yesù ye dɔ̃ àpe àtikplɔtɔa ɖoɖa ne bèa ɖù ɖase so ènu kèawo ŋuti na mì so Èhabɔ̀bɔwo ŋuti. Ènyè ye nyi David be ènuku, yebe jìjimèvia. Ènyè ye nyi ŋùdekɛ̃nyɛ be wètrivi kè le kɔ̀a.”

¹⁷Gbɔ̃gbɔ̃ a kudo nyɔ̃nù kpekpea gblɔ̃ be: “Va!” Àmè kè le sè èa cã ne gblɔ̃ be: “Va!” Àmè kè èsìkɔ le tìa, ne va. Àmè kè le ji èsì kè nana àgbèa, ne va xɔ̀ ɛ̀ fàa.

¹⁸Ènyè yaa, mù le gblɔ̃ na àmè ɖekpekpe kè le sè xoma kèa mè be gbèdoàsi be ènyàa be: ne àmè ɖe sɔ ènu ɖe sɔ kpe èa, Mawu la sɔ àyà do na àmè kèwo lè xoma a mèawo kpe è na ɛ̀.

¹⁹Nène a ke ye, ne àmè ɖe ɖè ènu ɖe to lè xoma kèa be ègbèdoàsi be ènyàa mèa, Mawu la ɖè to lè yebe mamã mè, lè àgbètia ku èdù kɔ̀kɔ̀ɛ kèwo wo ŋlɔ̀ ɖo xoma kèa mèa mè.

²⁰Àmè kè lè ɖù ènu kèawo be ɖasea gblɔ̃ be: “Ɛ̃ɛ, mù gbãnà sɔ̀sɔɛ ɖe!”

²¹Tɔhonɔ̀ Yesù be màje ne nɔ̀ ku mìa keŋu[13].