Read gen Àvìmènu 3 Bible Online

Àvìmènu 3 - gen bible

Àvìmènu 3

¹“Ŋlɔ̀ ènyà kèa ɖoɖa Sardɛ̀s be èhabɔ̀bɔa be àtikplɔtɔa be: “Àmè kè si Mawu be Gbɔ̃gbɔ̃ adrɛ̃awo kudo wètrivi adrɛ̃awo lèa gblɔ̃ be: Mù nya èdɔ kè wò le wɔ̀a, mù nya be wò xɔ̀ nyikɔ be yè lè àgbè, vɔ̀a wò ku.

²Fɔ̃ ne wòa do ŋusɛ̃ ènu kè kpɔ̀tɔ̀ lè èwò mè a, ne mu gbà va ku ò. Đo nyè mu kpɔ be èdɔ wòwo sù blibo lè Mawu nyè be ŋùmè ò.

³Ye ŋutia, ɖo ŋùkuvi ènu kè wo fiɔ wò, ku ekè wò sè a ji. Le è ɖo àsi, ne wòa ɖɔ̀lì èdɛ̃, ɖoa, wò mu la nya gà kè mè mù la va gbɔ wò ò. Ne wò mu lè ŋùsà òa, mù la va to ɖo ji wò sìgbè fìãfìtɔ nène.

⁴Gãke àmè ɖewo kpɔ̀tɔ̀ lè Sardɛ̀s, kèwo mu pòɖi woabe àwùwo ò. Wo la nɔ̀ àwù ɣewo mè, la zɔ̃ kudo mù, ɖo wo jè.

⁵Àmè kèwo la ɖùjia, la do àwù ɣewo. Eye nyè mu la tutu woabe nyikɔwo lè àgbèxoma a mè ò. Mù la hũ e mè lè Ètɔ nyè, ku yebe àtikplɔtɔwo be ŋùkɔ̀ be wo nyi tɔ̀ nyè.”

⁶“Àmè kè si èto lèa, ne sè ènu kè Gbɔ̃gbɔ̃ a le gblɔ̃ na èhabɔ̀bɔawo.”

⁷“Ŋlɔ̀ ènyà kèa ɖoɖa èhabɔ̀bɔ kè lè Filadɛlfìa be àtikplɔtɔa be: “Àmè kè nyi kɔ̀kɔ̀ɛ ku nyàwo, ekè si èfìɔ David be sãfe lè, eye ne e hũ èhɔ̃a, àmè ɖekpe mu la teŋu tu ì ò, ne e tu ìa, àmè ɖekpe mu la teŋu hũ ì òa, e ye le gblɔ̃ be:

⁸Mù nya èdɔ kè wò le wɔ̀a. Kpɔɖa mù sɔ hɔ̃tru kè wo hũ dà ɖɛ, eye àmè ɖekpe mu la teŋu tu òa ɖo ŋùkɔ̀ na wò. Ŋusɛ̃ vi ɖe kpò ye lè àsi wò, vɔ̀a, wò le ènyà nyè ɖo àsi, eye wò mu gbe mù ò.

⁹Kpɔɖa, mù le sɔ àmè kèwo lè Satana be èhabɔ̀bɔ mèawo le do àsi na wò. Àmè kèawo gblɔ̃nà be yèwo nyi Yudàviwo, vɔ̀ wo mu nyi ì ò, ɖoa, wo le ɖà àjè. Kpɔɖa, mù la na wo la va jè èklò ɖo àpo àfɔ̀nu, eye woa kpata, wo la nya be mù lɔ̃ wò.

¹⁰Ekè wò wɔ̀ ɖo ènyà nyè ji, kudo vevedonua, nyè cã mù la ɖè wò to lè dodokpɔ sɛ̃ŋu kè la va xixea kpata jia mè. E la va do àmè kèwo lè ànyigbã jiawo kpɔ.

¹¹Mù gbãnà sɔ̀sɔɛ ɖe. Le ènu kè lè àsi wòa sɛ̃sɛ̃ ɖe, ne àmè ɖe mu gbà xɔ̀ èfìɔkuku wòa lè àsi wò ò.

¹²Àmè kè ɖùjia, mù la sɔ ɛ̀ wɔ̀ sɔti lè Mawu nyè be mawuxɔa mè. E la nɔ̀ funua gbè sia gbè, eye mu la gbà to lè e mè ò. Eye mù la ŋlɔ̀ Mawu nyè be nyikɔ kudo Mawu nyè be èdù kè nyi Yèruzàlɛm yeye, kè ɖì so jiŋùkusi, Mawu nyè gbɔa ɖo e ŋuti. Mù la ŋlɔ̀ nyikɔ yeye nyèa cã ɖo e ŋuti.”

¹³“Àmè kè si èto lèa, ne sè ènu kè Gbɔ̃gbɔ̃ a le gblɔ̃ na èhabɔ̀bɔawo.”

¹⁴“Ŋlɔ̀ ènyà kèa ɖoɖa èhabɔ̀bɔ kè lè Laodikèa be àtikplɔtɔa cã be: “Àmè kè nyi Mawu Ɛ̃ɛ, ɖàsèfo àdodoe a, àmè kè nyi ènu kè Mawu ɖoa be gɔ̃mèjèje a gblɔ̃ be:

¹⁵mù nya èdɔ kè wò le wɔ̀a. Wò mu fa ò; wò mu jèzò cã ò. Mù jro be wòa fa, àlo wòa jèzò.

¹⁶Đo ekè wò lè gbɔ̀gblɔ, eye wò mu fa, àlo jèzò òa, mù la tu wò dãŋùgbe so àpe ènu mè.

¹⁷Wò gblɔ̃nà be: mù nyi àdɔ̀kùnɔ̀, ènu sù àsi nyè eye nyè mu hiã ènu ɖekpe ò. Eye wò mu nya be wɔ̀amènɔ̀, ŋuzĩzĩme, ŋùvìnɔ̀ ku àmè kè lè àmaa ye wò nyi ò.

¹⁸Mù le pò toɖo na wò be wòa plè sìka àdodoe, kè wo kɔ̀ lè èzò mèa lè àsi nyè ne wòa jè àdɔ̀kù. Wòa plè àwù ɣe cã ne wòa do, ne àpo àma be ŋùkpɛ̃ mu gbà ze ò. Wòa plè ŋùkuvi tikè ne wòa do ŋùkuvi ji ne wòa kpɔnu.

¹⁹Àmè kèwo mù lɔ̃a, woawo ye mù gbena ènyà na gbà dɔ̃nà èto na, ye ŋutia ɖɔ̀lì èdɛ̃ wewe[10].

²⁰Kpɔɖa, mù lètè lè àgboa ji le pò èhɔ̃a. Ne àmè ɖe sè àpe ègbè, eye be hũ èhɔ̃a, mù la ɖo àxomè lè e gbɔ. Eye mi la ɖù ènu ɖodu.”

²¹“Àmè kè ɖùjia, mù la na, e la nɔ̀ ànyi lè àpe àxàda mè lè àpe èfìɔzìkpe ji sìgbè àlekè nyè cã mù ɖùji eye mù nɔ̀ Ètɔ nyè be àxàda mè lè yebe èfìɔzìkpea ji nène.”

²²“Àmè kè si èto lèa, ne sè ènu kè Gbɔ̃gbɔ̃ a le gblɔ̃ na èhabɔ̀bɔawo.”