Read gen Àvìmènu 4 Bible Online

Àvìmènu 4 - gen bible

Àvìmènu 4

¹Lè ènu kèawo yomè a, mù kpɔ hɔ̃tru ɖe, lè hũhũ lè jiŋùkusi! Ègbè kè ɖì, eye mù sè cucugbã sìgbè èkpɛ̃ be ɖìɖi nènea, gblɔ̃ na mù be: “Va èji fikèa, ne ma ɖè ènu kèwo la va jɔ̀ e yomè a fiɔ wò.”

²Zè ɖèkaa, Gbɔ̃gbɔ̃ a ɖo mè nyè. Troloa, mù kpɔ èfìɔzìkpe ɖe kè ji àmè ɖe nɔ̀ ànyi ɖo.

³Àmè kè nɔ̀ ànyi ɖo èfìɔzìkpea jia be nɔ̀nɔmè le dàzò sìgbè èkpe xɔ̀asì àmàmu kè wo yɔna be jàspòa kudo jɛ̃ kè nyi sardisòa nène, eye ànyiɖohùɛɖo kè do àmàmu sìgbè èmèrod-kpe nènea pòxla do èfìɔzìkpea.

⁴Àzìkpe èwì vɔ ènè trɔdo èfìɔzìkpea eye àmègã èwì vɔ ènè nɔ̀ ànyi ɖo àzìkpeawo ji. Wo do àwù ɣewo eye sìka be jègbàwo lè èta na wo.

⁵Èjikèzòwo[11], èji be ègbèɖèɖewo kudo ègbèɖèɖe buwo le to so èfìɔzìkpea mè. Kãligbɛ̃ti adrɛ̃ be èzò le bì lè èfìɔzìkpea be ŋùkɔ̀. Ekèawo le nyi Mawu be Gbɔ̃gbɔ̃ adrɛ̃awo.

⁶Lè èfìɔzìkpe a be ŋùkɔ̀ a, ènu ɖe mè kɔ̀ ceŋu-ceŋu sìgbè àpùpui be àpù kè le dàzò sìgbè èkpe kè wo yɔna be kristalòa[12] nène. Ènu àgbè-àgbè ènè kèwo be ŋùkɔ̀ kudo ŋùgbe ɖɔ kudo ŋùkuviwoa lè èfìɔzìkpea be dòdòmè, eye wo pòxla do èfìɔzìkpea.

⁷Ènu àgbè-àgbè cucugbãa lè sìgbè jãŋùta nène; èvègɔ̃a lè sìgbè ènyì-su nène; ètɔ̃gɔ̃a be ŋùmè lè sìgbè àgbètɔ tɔ̀ nène, eye ènègɔ̃a lè sìgbè èhɔ̃ kè le zròa nène.

⁸Àwàda àdɛ̃ lè ènu àgbè-àgbè ènèawo dòmètɔ ɖe sia ɖe si, eye woa ŋuti ku woa mè ɖɔ ku ŋùkuviwo. Wo le jì èhà èzã ku kedè, jɛ̃ mà gbɔ̃, le gblɔ̃ be: “Tɔhonɔ̀ Mawu Ŋusɛ̃kpatatɔa lè kɔ̀kɔ̀ɛ, kɔ̀kɔ̀ɛ, kɔ̀kɔ̀ɛ! Àmè kè nɔ̀ ànyi va yì, ekè lè fifì, eye Be gbãnà a.”

⁹Ne ènu àgbè-àgbè ènèawo gbe le na gogo, ku bùbu, kudo, àkpedodo Àmè kè lè àgbè kaka kàkà lè èfìɔzìkpea ji kpòa,

¹⁰àmègã èwìvɔnèawo sɔna ŋùmè cɔ̃na ànyi lè Àmè kè lè èfìɔzìkpea jia be ŋùkɔ̀, eye wo sɛ̃nà Àmè kè lè àgbè kaka sɔ yìa, blìbɔ̀nà lè ŋùkɔ̀ na ɛ̀, gblɔ̃nà be:

¹¹“Mia Tɔhonɔ̀ kudo miabe Mawu, èwò ye jè la xɔ̀ gogo, ku bùbu kudo ŋusɛ̃, ɖo èwò ye ɖo ènuwo kpata! Èwò ye ɖo wo ɖo àpo èjro nu, eye wo le zɔ̃ ɖo lekè e nyɔ na wòa ji.”