Read gen Àvìmènu 5 Bible Online

Àvìmènu 5 - gen bible

Àvìmènu 5

¹Ekèa yomè a, mù kpɔ xoma ɖe lè Àmè kè lè èfìɔzìkpea jia be ɖùsi-lɔ mè. Wo ŋlɔ̀ ènu ɖo yebe àkpa èvèawo, e mè ku e godo, eye wo tre e nu kudo ènutrenu adrɛ̃.

²Mù kpɔ àtikplɔtɔ ŋusɛ̃tɔ ɖe le do àpa lelele be: “Àmè kɛ ye jè la fo ènutrenuawo jo, eye be la hũ xoma a ò?”

³Wo mu kpɔ àmè ɖekpe lè jiŋùkusi àlo, lè ànyigbã ji, àlo lè ànyigbã be gɔ̃mè, kè jè, la teŋu hũ xoma a, àlo la kpɔ e mè ŋutɔ cã ò.

⁴Mù fã àvi veveɖe ŋutɔ, be wo mu kpɔ àmè ɖe kè jè la hũ xoma a, àlo la kpɔ e mè ò.

⁵Vɔ̀a àmègãawo dòmètɔ ɖèka gblɔ̃ na mù be: “Mù gbà fã àvi ò. Kpɔɖa, Jãŋùta kè so Yudà be kɔ̀ta mè, eye e nyi èfìɔ David be jìjimèvia ɖùji, e ye la ɖè ènutrenu adrɛ̃awo jo, eye be la hũ xoma a.”

⁶Fifìa, mù kpɔ àlɛ̃vi ɖe lètè lè èfìɔzìkpea be dòdòmè, lè ènu àgbè-àgbè ènèawo dòmè, eye àmègãawo trɔ do wo. E ze sìgbè wo wù àlɛ̃via vɔ̀ nène. Àzò adrɛ̃ ku ŋùkuvi adrɛ̃ lè e si. Àzò kèawo lè nyi Mawu be gbɔ̃gbɔ̃ adrɛ̃ kèwo be dɔ̃na ɖoɖa xixea kpata mèa.

⁷Àlɛ̃via zɔ̃ yì xɔ̀ xoma a lè àmè kè lè èfìɔzìkpea jia si.

⁸Ekè be xɔ̀ xoma a, ènu àgbè-àgbè ènèawo ku àmègã wìvɔnèawo cɔ̃ ŋùmè ànyi lè Àlɛ̃via be ŋùkɔ̀. Èhɛwo ku sìka kogòwo lè woa dòmètɔ ɖe sia ɖe si. Àtikè xɔ̃xũɛ kèwo nyi àmè kɔ̀kɔ̀ɛwo be kuefãwoa, ɖɔ sìka kogòawo.

⁹Wo le jì èhà yeye ɖe be: “Èwò ye jè la xɔ̀ xoma a, la fo ènutrenuawo jo! Đo wo wù wò, eye, to àpo vɔsa jia, wò plè àgbètɔwo na Mawu, so kɔ̀ta sia kɔ̀ta, ègbè sia ègbè, èdù sia èdù, dùkɔ̃ sia dùkɔ̃ mè.

¹⁰Èwò ye wɔ̀ wo nyi fìɔdu kudo mawunɔwo na miabe Mawu, eye wo la ɖùfìɔ lè ànyigbãa kpata ji.”

¹¹Ekèa yomè a, mù gbà kpɔ, eye mù sè àtikplɔtɔ fuu, kèwo wu hɛ̃hlɛ̃awo be ègbè pòxla èfìɔzìkpea ku ènu àgbè-àgbèwo ku àmègãawo, eye woabe hɛ̃hlɛ̃mè la nɔ̀ hotu àtɔ̃ tèpe hotu àtɔ̃ kudo èkà èwì vɔ àtɔ̃ tèpe èkà èwì vɔ àtɔ̃.

¹²Wo le jì èhà ku ègbè lelele be: “Àlɛ̃vi kè wo sɔ savɔa, eye jè la xɔ̀ ŋusɛ̃, àdɔ̀kùnu, ènunya, bùbu, gogo ku kafu!”

¹³Eye mù sè Mawu be ènuɖoɖo ɖe sia ɖe, kèwo lè jiŋùkusi ku ànyigbã ji, kèwo lè ànyigbã be gɔ̃mè a ku àpù mè, ènu kèwo keŋu lè woa dòmèawo le gblɔ̃ be: “Àmè kè lè èfìɔzìkpe a ji ku àlɛ̃via tɔ̀ ye nyi kafu, bùbu ku gogo kudo ŋusɛ̃ kaka sɔ yì.”

¹⁴Eye ènu àgbè-àgbè ènèawo ɖo e ŋuti be: * “Àmèn!” Eye àmègãawo sɔ ŋùmè cɔ̃ ànyi, lè sɛ̃ ɛ̀.