Read gen Àvìmènu 6 Bible Online

Àvìmènu 6 - gen bible

Àvìmènu 6

¹Eye mù kpɔ be wàlɛbɛ kè Àlɛ̃via fo ènutrenu cucugbã tɔ̀a jo lè adrɛ̃awo dòmèa, mù sè ènu àgbè-àgbè ènèawo dòmètɔ ɖèka do àpa sɛ̃sɛ̃ ɖe sìgbè èji be ègbèɖèɖe nène gblɔ̃ be: “Va!”

²Kpɔɖa, mù kpɔ èsɔ ɣe ɖe. Eye àmè kè lè e jia le àŋùdàti ɖe ɖo àsi, eye wo sɔ jègbà ɖe na ɛ̀, eye e to sìgbè èjiɖùtɔ nène, ne bèa yì ɖùji.

³E yomè a, Àlɛ̃via fo ènutrenu èvègɔ̃a, eye mù kpɔ ènu àgbè-àgbè èvègɔ̃a gblɔ̃ be: “Va!”

⁴Èsɔ bu to. E lè jɛ̃-hɛ̀ɛ. Wo na ŋusɛ̃ àmè kè lè e jia be ne ɖè fàfa jo lè ànyigbã ji, ne àmèwo woa wù woa nɔ̀nɔwo, eye wo sɔ èwui gã ɖe na ɛ̀.

⁵Àlɛ̃via ɖè ènutrenu ètɔ̃gɔ̃a jo, eye mù sè ènu àgbè-àgbè ètɔ̃gɔ̃a gblɔ̃ be: “Va!” Kpɔɖa, èsɔ yìbɔ ɖe to. Àmè kè lè e jia, le ènudànu ɖe ɖo àsi.

⁶Mù sè ègbè ɖe ɖì sìgbè ènu àgbè-àgbè ènèawo dòmè be ɖì lè nène be: “Èlù jijenu ɖèka ne xɔ̀ klòsalò-ga ɖèka, eye èpò jijenu ètɔ̃ ne xɔ̀ klòsalò-ga ɖèka, vɔ̀a mù gbà gble àmì ku vɛ̃a ŋuti ò!”

⁷Ekèa yomè a, àlɛ̃via ɖè ènutrenu ènègɔ̃a jo, eye mù sè ènu àgbè-àgbè ènègɔ̃a gblɔ̃ be: “Va!”

⁸Kpɔɖa, èsɔ ɖìkù ɖe to. Àmè kè lè e jia be nyikɔ ye nyi Èku, eye Èkuwode kplɔ̀ ɛ̀ do. Eye wo na wo ŋusɛ̃ ɖo ànyigbã be mamã ènègɔ̃a ji be woa sɔ èwui, àdɔ̀wùamè, èdɔ̀vuɛ̃ kudo ègbemèlãwo wù àgbètɔwo.

⁹Ekè àlɛ̃via ɖè ènutrenu àtɔ̃gɔ̃a, mù kpɔ àmè kèwo wo wù ɖo Mawu be ènyàa kudo àlekè wo ɖù ɖase ɖo e ŋuti ɖoa be èklawo lè vɔsakpea gɔ̃mè.

¹⁰Wo do àpa lelele be: “Tɔhonɔ̀ kɔ̀kɔ̀ɛ, Tɔhonɔ̀ àdodoe, kaka va na gà kɛ mè ye wò la ɖo kòjo na àmè kèwo wù mi lè ànyigbã ji, eye wò la biɔ èhlɔ̃ na mi ò?”

¹¹Eye wo na àwù ɣe woa dòmètɔ ɖe sia ɖe, eye wo gblɔ̃ na wo be woa gbà dojì vi ɖe, kaka va na gà kè mè wo la sɔ woabe èhadɔwɔ̀tɔwo ku woa nɔ̀vi kèwo wo la gbà wù sìgbè woawo kè nènea, be hɛ̃hlɛ̃mè kpe wo, ne hɛ̃hlɛ̃ mèa bèa sù.

¹²Fifìa, mù kpɔ àlɛ̃via ɖe ènutrenu àdɛ̃gɔ̃ a jo. Zè ɖèkaa, ànyigbã hũhũ sɛ̃sɛ̃ ɖe. Eye èwè nyrɔ̃ sìgbè èfũlòvɔ yìbɔ nène. Wètri bliboa trɔ sìgbè èhũ nène.

¹³Jiŋùkusi be wètriviwo gɛ̃ jè ànyigbã ji, sìgbè àlekè àtikusɛ̃sɛ̃ hlɛ̃na, ne àyà sɛ̃sɛ̃ pòa nène.

¹⁴Eye wo ŋlɔ̃ jiŋùkusi jo sìgbè xoma nène, eye wo ɖè ètowo ku ètɔ̀dòmèkɔ̃ɛ̃wo jo lè woa tèpewo.

¹⁵Ànyigbã be èfìɔwo, àmè gãwo, àhùagawo, àdɔ̀kùnɔ̀wo, ŋusɛ̃tɔwo, kluviwo ku àblɔ̀ɖèviwo kpata wla ɖo àkpãdowo kudo ètowo be àkpãwo mè.

¹⁶Wo gblɔ̃ na ètowo kudo àkpãwo be: “Mì mù jè mia ji, ne mìa wla mi lè àmè kè nɔ̀ ànyi lè èfìɔzìkpea jia kudo àlɛ̃via be àdɔ̀mèze nu,

¹⁷ɖo woabe àdɔ̀mèze be ŋùkèkè gãa va ɖo. Eye àmè kɛ ye la teŋu nɔ̀tè lè e nu ò?”