Read gen Àvìmènu 8 Bible Online

Àvìmènu 8 - gen bible

Àvìmènu 8

¹Ekè àlɛ̃via fo ènutrenu adrɛ̃gɔ̃ a joa, èɖa ɖo lè jiŋùkusi see, sìgbè gàpòpo èfã nène.

²E yomè a, mù kpɔ Mawu be àtikplɔtɔ adrɛ̃ kèwo tɔtè lè Mawu be ŋùmèawo. Wo sɔ èkpɛ̃ adrɛ̃ do àsi na wo.

³*Àtikplɔtɔ bu, kè sɔ sìka-lififiɔ̃nu ɖo àsia va tɔtè lè vɔsakpea gbɔ. Eye wo sɔ àtikè xɔ̃xũɛ sùgbɔ na ɛ̀ be ne sɔ bɔ̀ ɖo Mawu be àmèwo kpata be kuefãwo ŋuti, sɔ savɔ lè sìka be *vɔsakpe kè lè èfìɔzìkpea be ŋùkɔ̀a ji.

⁴So àtikplɔtɔ kèa be àlɔ̀ mèa, àtikè xɔ̃xũɛ, kè wo tɔzòa be àzìzɔ tù va kpe ɖo Mawu be àmèwo be kuefãwo ŋuti, yìji lè Mawu gbɔ.

⁵E yomè a, Mawu be àtikplɔtɔa ɖè èzò lè vɔsakpea ji do lififiɔ̃nua mè, sɔ dãŋùgbe ɖo ànyigbãa ji. Zè ɖèkaa, èji be ègbèɖèɖe gãwo ɖì; ègbèwo ɖì, èjikèzòwo ze, eye ànyigbã hũhũ.

⁶Eye àtikplɔtɔ adrɛ̃ kèwo si èkpɛ̃ adrɛ̃wo lèawo, jràɖo ne woa ku èkpɛ̃awo.

⁷*Àtikplɔtɔ cucugbãa ku yebe èkpɛ̃a. Zè ɖèkaa, èsìkpejàja kudo èzò caka kudo èhũ jà ɖo ànyigbã ji. Ànyigbãa be mamã ètɔ̃gɔ̃a fiɔ̃. Àti kèwo lè ànyigbã jiawo be mamã ètɔ̃gɔ̃a ku, eye ègbe mumuwo keŋu fiɔ̃.

⁸Mawu be àtikplɔtɔ èvègɔ̃a ku yebe èkpɛ̃a. Zè ɖèkaa, wo sɔ ènu ɖe kè lè sìgbè èto gã ɖe kè le bìzò nènea dà ɖo àpù mè, eye àpù be mamã ètɔ̃gɔ̃a trɔ zũ èhũ.

⁹Ènu àgbèagbè kèwo lè àpù mèawo be mamã ètɔ̃gɔ̃a ku, àpùjihũ kèwo lè e jia be mamã ètɔ̃gɔ̃a gbã.

¹⁰Mawu be àtikplɔtɔ ètɔ̃gɔ̃a ku yebe èkpɛ̃a, eye wètrivi gã ɖe kè le klɛ̃ sìgbè kakati nènea, gɛ̃ so èji va jè ètɔ̀ sàsrawo be mamã ètɔ̃gɔ̃a kudo èsìdowo mè.

¹¹(Wo yɔna wètrivia be Àɖi Veve àlo Ègbe Veve). Eye ètɔ̀wo be mamã ètɔ̃gɔ̃a trɔ zũ èsì veve kpàa. Eye àmè kèwo ye nù èsìawo ku, ɖo, àɖi lè e mè.

¹²Mawu be àtikplɔtɔ ènègɔ̃a ku yebe èkpɛ̃a. Eye wo pò èwè be mamã ètɔ̃gɔ̃a, wètri be mamã ètɔ̃gɔ̃a, wètriviwo be mamã ètɔ̃gɔ̃a. Woabe mamã ètɔ̃gɔ̃a nyrɔ̃ eye be do vìvìti. Ŋùkèkè bu yebe kɛ̃klɛ̃ be mamã ètɔ̃gɔ̃a, eye èzã cã bu yebe kɛ̃klɛ̃a be mamã ètɔ̃gɔ̃a.

¹³Ekèa yomè a, mù kpɔ èhɔ̃ ɖe le zrò lè àyamè, eye mù sè be le gblɔ̃ kudo àpa be: “Hèlu! Hèlu! Hèlu na ànyigbã ji tɔwo! Đo, àtikplɔtɔ ètɔ̃ kpɔ̀tɔ̀, la gbà ku woabe èkpɛ̃wo!”