Read gen Rut 3 Bible Online

Rut 3 - gen bible

Rut 3

¹Lè àzã ɖewo yomè a, Nàomì gblɔ̃ na Rut be: “Èvi nyè, mù ɖo la jrà èsɔ̀ godo ɖo ɖɛ na wò sɔ yì èsrɔ̃ɖèɖe be gbàgbla mè, ne ènu sia ènu bèa zɔ̃ sù na wò.

²Wò nyaa! Booz kè na wò èmɔ̃ ye wò cã ènuku lè yebe èdɔwɔ̀tɔwo be ŋùgbedòmèa nyi miabe xòmètɔ. Eye èzã kèa mèa, ye ŋutɔ la kpɔ èlùviawo be fufu tèpe.

³Eŋuã, yì lè èsì, sì àmì hũɛ titi ne wòa do àwù kè nyɔa. Eye wòa ɖo èta yebe èlùfupea, vɔ̀a mù gbà na ne woa kpɔ wò kaka va na gà kè mè be la ɖù ènu gbà nù àhà vɔ̀a ò.

⁴Wàlɛbɛ kè be la yì mlɔ̃ ànyia, le ŋùku ɖo fìkè be la mlɔ̃ a ŋuti. Eye wòa wɔ̀ ɖɔ̀ɖɔ̀ yì kɔ àvɔ kè be cɔ̃a yì ji, lè àfɔ̀ gbɔ ne wòa mlɔ̃ funu sɔ ji yebe xɔ̀namè. Lè ekèa yomè a, e la gblɔ̃ ènu kè wò ɖo la wɔ̀a na wò.”

⁵Rut ɖo e ŋuti be: “Mù la wɔ̀ ènu kèwo keŋu wò gblɔ̃ na mù a.”

⁶Rut yì Booz be èlùfupea eye be wɔ̀ ɖo ènu kè lɔ̃xoa gblɔ̃ na ɛ̀a ji pɛpɛpɛ.

⁷Booz ɖù ènu gbà nù àhà be sù ì nyuɛ̃ ɖe. E yomè a, e yì mlɔ̃ ànyi lè èlùku kè wo bɔ̀a gbɔ. Wàlɛbɛ kè be le dɔ̃ àlɔ̃a, Rut wɔ̀ zaa ɖe va kɔ àvɔa eye be mlɔ̃ Booz be àfɔ̀de.

⁸Èzã dòmèa, Booz dà àvò fɔ̃ eye kè be ɖè èkɔ̀a, ŋùdãtɔ̀a, e kpɔ nyɔ̃nù ɖe mlɔ̃ ànyi lè yebe àfɔ̀de.

⁹E gblɔ̃ na ɛ̀ be: “Èwò àmè kɛ ye ò?” Eye e ɖo e ŋuti be: “Ènyè Rut, àpo sumɔ̃vi ye. Ne jè ŋùmè na wò ne wòa xɔ̀ mù ɖo gbɔ[14] wò, ɖo wò ɖo èdɔ[15] do àsi la wɔ̀ va gbɔnyè sìgbè èsrɔ̃ nyè kè kua be xòmètɔ nène.”

¹⁰Booz gblɔ̃ na ɛ̀ be: “Tɔhonɔ̀ ne tu sì na wò, Rut! Ènu kè wò wɔ̀ fifìa nyi lɔ̃lɔ̃ be ɖase àgbèagbè na lɔ̃xo wòa wu ènu kè wò wɔ̀ sãa. Ɖo wò mu sɔ ɖokoe wò yì na ɖèkajɛ ècitɔ ɖe àlo ɖèkajɛ wɔ̀amènɔ̀ ɖe cã ò.

¹¹E nyɔ! Mù gbà vɔ̃ ò, ɖo dùkɔ̃a kpata nya be nyɔ̃nù ɖɔ̀hũi ye wò nyi. Mù la wɔ̀ ènu sia ènu kè wò biɔa na wò.

¹²Ɛ̃ɛ, nyàwo be nyi be mù ɖo la wɔ̀ xòmètɔ be èdɔ do àsia va gbɔ wò, co àmè bu lè kè do xòmè ku mì wu mù.

¹³Ci fikèa dɔ̃; ne èŋù kèa mi la kpɔ lè àmègãxowo be ŋùkɔ̀ be ŋusù kèa la lɔ̃ wɔ̀ yebe èdɔ do àsia mà a. Ne e lɔ̃a, keŋuã e la wɔ̀ ɛ̀. Vɔ̀ ne e gbea eŋuã mù le tà Tɔhonɔ̀ àgbèagbèa na wò be mù la wɔ̀ ekè kã mù a na wò. Fifìa gbɔ̀xue ekèa bèa va e mèa, ci dɔ̃, èŋù ne kè.”

¹⁴Eye Rut ci Booz be àfɔ̀de dɔ̃, vɔ̀ e fɔ̃ xoxo fɔ̃fɔ̃mè ne àmè ɖe mu gbà kpɔ ɛ̀ jèsi ò. Ɖo Booz ŋutɔ cã mu le ji be woa nya be nyɔ̃nù ɖe va èlùfupea ò.

¹⁵Eye Booz gblɔ̃ na Rut be: “Ɖè àwù kè wò sɔ cɔ̃ èkɔ̀a ne wòa vlũ ì nyuɛ̃ ɖe.” E vlũ àwùa eye Booz sɔ èlùvi jijenu àdɛ̃[16] kɔ̀ ɖo e mè na ɛ̀, gbà dro è. Eye Booz[17] jo yì èdùa mè.

¹⁶Wàlɛbɛ kè Rut trɔ gbɔ̀ va lɔ̃xoa gbɔa, Nàomì biɔ ɛ̀ sè be: “Èvi nyè, leke ènuawo yì ɖo ò?” Rut gblɔ̃ ènu kèwo keŋu Booz wɔ̀ na ɛ̀a na Nàomì.

¹⁷E gbà gblɔ̃ be: “E na mù èlùvi gbogbo kèa ɖo e gblɔ̃ be mu jè be ma trɔ va gbɔ wò àsi gbalo ò.”

¹⁸Nàomì ɖo e ŋuti na ɛ̀ be: “Èvi nyè, nɔ̀ fikèa kpoo ne wòa kpɔ ènu kè la jɔ̀ zãa ɖe kèa. Ɖo Booz la kpɔ èta na ènyà kèa egbè godo godo gbɔ̀xue be la vò.”