Read gen Rut 4 Bible Online

Rut 4 - gen bible

Rut 4

¹Booz yì èdùgboanu lè àfi kè wo bɔ̀nà lèa, yì nɔ̀ ànyi. Wàlɛbɛ kè xòmètɔ kè be ènyà Booz gblɔ̃ na Rut be yebe èdɔ do àsi ye be nyia va le yìa, Booz yɔ ɛ̀ gblɔ̃ be: “Va nɔ̀ ànyi ɖo fikè.” Eye ŋusùa cã va nɔ̀ ànyi nyàwo.

²E yomè a, Booz biɔ so èdùa be àgbònùgla àmè èwo si be woa va nɔ̀ ànyi. Wàlɛbɛ kè wo va nɔ ànyi vɔ̀a,

³Booz gblɔ̃ na xòmètɔ kè be ènyà be gblɔ̃ na Rut va yìa be: “Nàomì trɔ gbɔ̀ so Mòab nyigbã ji eye e le ji la sà Elimèlɛk kè nyi miabe xòmètɔa be àgblè nyigbãa.

⁴Mù ji kpò be ma sìa wò eye ma biɔ so àsi wò be wòa lɔ̃ lè àgbònùgla kudo àmè kèwo keŋu lè fikèawo be ŋùmè be yè la plè è. Ne wò ji la plè èa, wɔ̀ ɛ̀; vɔ̀ ne wò mu ji òa, gblɔ̃ ɛ̀ na mù; ɖo èwò ye nyi àmè cucugbã kè ɖo la wɔ̀ èdɔ do àsi kèa. Ènyè ya, mù jè yo wò mè kpò e.” Ŋusùa ɖo e ŋuti be: “Mù ji nyuɛ̃ ɖe be ma plè àgblèa.”

⁵Booz yì e ji gblɔ̃ be: “Ne wò lɔ̃ plè àgblèa lè Nàomì sia, eŋuã wò plè lè Mòab be àhòsì Rut cã si. Ekèa na be wò la sɔ ɛ̀ ɖè ne bèa do xòmè na àmè yì nugbea.”

⁶Ŋusùa ɖo e ŋuti be: “Ne e la nɔ̀ nènea, nyè mu la teŋu kpe e ji ò. Mù tàsi ì na wò ɖo àgblè kèa mu la va nyi ècrɔ̃nu na èvi nyèwo ò.”

⁷Lè blèmàa, ne woa sɔ ɖo èkpe ènyà ɖekpekpe ènyà sìgbè èdɔ do àsi jojo na àmè àlo ànyigbã be jojo na àmè jia, Izràɛlviwo ɖènà àfɔ̀kpa sɔ na àmè kè tɔ̀ ènua trɔ zũ a. Wɔ̀na kèa ɖènà ɛ̀ fiɔ be wo ɖo èkpe ènyàa ji.

⁸Ekèa ŋuti, wàlɛbɛ kè ŋusùa le gblɔ̃ na Booz be ye tàsi àgblèa na ɛ̀a, e ɖè yebe àfɔ̀kpaa sɔ na ɛ̀.

⁹Nène a Booz gblɔ̃ na àgbònùgla kudo àmè kèwo keŋu lè funua be: “Mìa kpata mì nyi ɖàsèfo nyèwo egbè be mù le xɔ̀ ènu kè nyi Elimèlɛk kudo èviawo Kiliɔ̀n ku Maclɔ̀n tɔ̀a lè Nàomì si.

¹⁰Sɔ yì e jia, mù la ɖè Maclɔ̀n be àhòsì Rut kè so Mòab nyigbã jia. Nène a ye ècrɔ̃nua la kpɔ̀tɔ̀ nɔ̀ àmè yì nugbea be xòmèa mè eye yebe jìjimè la na be yebe nyikɔ ma gũ lè xòmèa kudo èdùa mè ò. Mìa ŋutɔ mì kpɔ ekèa tèpe egbè.”

¹¹Àgbònùgla kudo àmè kèwo keŋu lè funua, wo gblɔ̃ be: “Ɛ̃ɛ mi nyi ɖàsèfowo. Tɔhonɔ̀ ŋutɔ ne tu sì na nyɔ̃nù yeye kè le ɖo àpo àxomèa; ne nɔ̀ sìgbè Raxɛl kudo Leà kèwo nyi Izràɛl be dùkɔ̃a be dodoewo nène! Àdɔ̀kùnu ne sù àsi wò drì lè Efratà be hɛ̃nua mè ne wòa xɔ̀ nyikɔ lè Bɛtlɛhɛ̀m!

¹²Tɔhonɔ̀ ne na to nyɔ̃nù kèa ji wòa ɖo èvi sùgbɔ eye wòa ɖì Perɛz[18], Yudà kudo Tamàr be vènàviawo dòmètɔ ɖèkaa!”

¹³Nène a ye Booz ɖè Rut kplɔ̀ ɛ̀ yì dà ɖo ye ɖokoe gbɔ. Wàlɛbɛ kè be dɔ̃ kudo èa, Tɔhonɔ̀ na Rut fɔ èfu eye be jì ŋusùvi ɖèka.

¹⁴Bɛtlɛhɛ̀m be nyɔ̃nùwo yì gblɔ̃ na Nàomì be: “Mì na gogo Tɔhonɔ̀! Egbèa e na wo jì àmè kè la va kpɔ ji wòa. Wo la mlã ɖèvi kèa be nyikɔ lè Izràɛl kpata.

¹⁵E la trɔ àgbè wòa eye e la kpɔ ji wò lè sĩsĩmè. Lɔ̃xoyɔvi wòa wɔ̀ ènu fuu wu ŋusù sùgbɔ, ɖo e lɔ̃ wò gbà na wò màmãyɔvi kèa.

¹⁶Eye Nàomì kɔkɔ ɖèvia ɖo àkɔnu. Eye e kpɔ e ji.

¹⁷Nyɔ̃nù kèwo lè woabe àxue kɔ̀awo gblɔ̃nà be: “Wo jì màmãyɔvi na Nàomì.” Eye wo ɖo nyikɔ na ɖèvia be Obɛd. Obɛd ŋua ye va nyi Jesè[19] be ètɔ, Jesè va jì David[20].

¹⁸Ekèa ye nyi David be tɔgbewo so Perɛz ji: Perɛz jì Hɛsrɔ̀n;

¹⁹Hɛsrɔ̀n jì Ram, eye Ram ya jì Aminadàb,

²⁰Aminadàb jì Nahsɔ̀n eye Nahsɔ̀n jì Salmà,

²¹Salmà jì Booz eye Booz jì Obɛd,

²²Obɛd jì Jesè eye Jesè jì David