Read gen 1Samuɛl 1 Bible Online

1Samuɛl 1 - gen bible

1Samuɛl 1

¹Ŋusù ɖe so Ràmataim-Supìm, lè Efràyim be èto a ji. Wo yɔna ɛ̀ be Ɛlkanà, eye be nyi Yerohàm be èvi. Yerohàm nyi Èlìhu be èvi, eye Èlìhu ŋutɔ nyi Tohu be èvi. Tohu ŋutɔ cã nyi Suf kè nyi Efratàtɔa be èvi.

²E ɖè nyɔ̃nù èvè. Ɖèka tɔ̀ Anà, eye èvègɔ̃a tɔ̀ Pèninà. Pèninà jì èviwo, vɔ̀a, Anà ya mu jì èvi ò.

³Èpè sia èpèa, Ɛlkanà sona yebe èdùa mè, liana ètoa, yìnà Silò be kɔ̀kɔ̀ɛpea, yì sɛ̃nà Tɔhonɔ̀ ŋusɛ̃kpatatɔa, eye be sanavɔ na ɛ̀. Eli be ŋusùvi èvè nyi hũbonɔwo lè Silò, funua.

⁴Ne Ɛlkanà savɔa, e kãna vɔsa be èlãa na Pèninà, eye be gbà nana Pèninà be èvi ŋusù ku nyɔ̃nù ɖe sia ɖe.

⁵Vɔ̀a, èlã kè Ɛlkanà kãna na Anàa, nyina nyɔ̃nù èvègɔ̃a tɔ̀a be tèpe èvè, ɖoa, Ɛlkanà lɔ̃nà Anà ŋutɔ, to e gbɔ be Tɔhonɔ̀ mu na ɛ̀ èvi ò.

⁶Gbà wua, Anà be àsusì, Peninàa, viɔ̃na e nu, eye be jina be yèa nɔ do ŋùkpɛ̃ Anà, be Tɔhonɔ̀ mu na ɛ̀ èvi ò.

⁷Ekèa yìnà e ji, èpè sia èpè, ne Anà yì mawuxɔa nua, eye Peninà cã viɔ̃na yebe àsusìa nu. Anà fãnà àvi, eye be gbena ènu ɖùɖu.

⁸Ɛlkanà, èsrɔ̃a va gblɔ̃ na ɛ̀ be: “Anà, nukɛ ŋuti wò le fã àvi ɖo ò? Nukɛ ŋuti àpo èjì le xànu, eye wò gbe be yè mu la ɖù ènu ò? Ènyè kèa, nyè mu wu èvi èwo na wò òa?

⁹Ekè wo ɖùnu eye wo nùnu lè Silò vɔ̀a, Anà sitè. Eli, hũbonɔa, nɔ̀ ànyi ɖo mawuxɔa be èmɔ̃nu.

¹⁰Anà sɔ vevesèse ku àvi hèhè, fãkue yɔ Tɔhonɔ̀.

¹¹E fìã àjɔ̀gbè be: “Tɔhonɔ̀, Ŋusɛ̃kpatatɔ, ne wò trɔ kpɔ sumɔ̃vi wò be ènuxàxa, eye wò mu ŋlɔ̀be mù ò, ne wò ɖoŋù sumɔ̃vi wò, eye wò na mù ŋusùvi ɖèkaa, mù le fìã àjɔ̀gbè be mù la sɔ yebe àgbè ŋùkèkèwo kpata kè Tɔhonɔ̀, eye wo mu la lũ èta na ɛ̀ gbèɖe ò!”

¹²Wàlɛbɛ kè Anà le fãkue dìdiɖe, le yɔ Tɔhonɔ̀a, Eli, hũbonɔa le ŋùkuvi ɖo yebe ènu gbɔ.

¹³Anà le pò nupo lè yebe èjì mè. Yebe ègbè mu le ɖì ò, vɔ̀a yebe ènuyiwo kpò ye le hùã. Eli xɔ̀sè be nyɔ̃nùa nù àhà mu ye.

¹⁴Eli gblɔ̃ na ɛ̀ be: “Kaka na gà kɛ mè ye àhàa la gbà nɔ̀ ŋùmè na wò ò? Dɔ̃ yì àzɔ̀ge ne bèa kɔ̀ na wò!”

¹⁵Anà ɖo e ŋuti na ɛ̀ be: “Nyè mu nù àhà ò, àpetɔ. Nyè mu nù vɛ̃, àlo àhà kè la mu àmèa ò. Nyɔ̃nù ŋuzĩzĩme ye mù nyi; mù va àfi kèa, la ɖè vevesèse nyèwo na Tɔhonɔ̀.

¹⁶Àpetɔ, mù gbà kpɔ sumɔ̃vi wò, sìgbè àmè bàɖà nène ò. Àyàɖùɖu nyèwo ku àkpɔ̃ kè lè èhlò mè na mù a ye na be mù pò nupo dìdiɖe na Tɔhonɔ̀ lekea.”

¹⁷Eli ɖo e ŋuti na ɛ̀ be: “Jo yì lè ŋuti fàfa mè. Izràɛl be Mawu a ŋutɔ la wɔ̀ ènu kè wò biɔ ɛ̀a na wò.”

¹⁸Anà gbìgbɔ̀ ɖo e ŋuti na Eli be: “Gbe ku ŋuzĩzĩ na sumɔ̃vi wòa kpò!” Anà jo. E ɖùnu, eye mu gbà ɖɔ̀ ŋùmè ke ò.

¹⁹Ɛlkanà ku yebe xòmèa fɔ̃ èzã, jè èɖɛ̀ na Tɔhonɔ̀; e yomè a, wo trɔ yì àxue, le Ramà. Ɛlkanà dɔ̃ ku èsrɔ̃a, Anà, eye Tɔhonɔ̀ ɖoŋù kuefã kè Anà wɔ̀a.

²⁰Anà fɔ èfu, eye, ekè àzãa sùa, e jì ŋusùvi. E ɖo nyikɔ na ɛ̀ be: Samuɛl, ɖoa, e gblɔ̃ be: “Tɔhonɔ̀ si ye mù biɔ ɛ̀ so.”

²¹Ekè èpè trɔa, Anà be èsrɔ̃, Ɛlkanà kplɔ̀ yebe xòmè bliboa, ne woa yì, wɔ̀ àkpedo vɔsa, la zɔ̃ ɖo àjɔ̀gbè kè wo fìã na Tɔhonɔ̀a ji.

²²Vɔ̀a, Anà ya mu yì ò. E gblɔ̃ na èsrɔ̃a be: “Mù jro be ɖèvia ne sò ànɔ gbɔ̀xue ma kplɔ̀ ɛ̀ yì ɖo Tɔhonɔ̀ be ŋùmè, ne bèa ci funua, kaka sɔ yì.

²³Èsrɔ̃a Ɛlkanà ɖo e ŋuti na ɛ̀ be: “E nyɔ! Ekè wò kpɔ ɛ̀ nènea, nɔ̀ fikèa ku ì, kaka na wàlɛbɛ kè wò la sò ànɔ na ɛ̀a. Tɔhonɔ̀ ŋutɔ ne wɔ̀ ɖo yebe ègbè ji! Nyɔ̃nùa ci ànyi, le na ànɔ ɖèvia, kaka na hùenu kè ɖèvia sò ànɔ a.

²⁴Ekè be sò ànɔ na ɖèvia vɔ̀a, Anà sɔ ènyì-su ètɔ̃, èwɔ jijenu ɖèka ku vɛ̃ èlãgbàze-go ɖèka, eye be kplɔ̀ ɛ̀ yì Silò, lè Tɔhonɔ̀ be àxomè, wàlɛbɛ ŋua, ɖèvia gbà nyi ŋusùvi zaa ɖe.

²⁵Wo sɔ ènyì-su viawo savɔ, eye wo kplɔ̀ ɖèvia do àsi na Eli.

²⁶Nyɔ̃nùa biɔ Eli be: “Tɔ̀wò jɔ̀, àpetɔ, wò gbà ɖoŋù nyɔ̃nù ɖe kè nɔ̀ àzɔ̀ge na wò, gbè ɖèka, lè àfi kèa, eye be le fãkue na Tɔhonɔ̀a? Mù tà àpo àgbè na wò be ènyè ye!

²⁷Èvi kèa ŋuti mù le fãkue ɖo, eye Tɔhonɔ̀ na mù ènu kè mù biɔ ɛ̀a.

²⁸Fifìa, ènyè cã, mù sɔ ɛ̀ le na Tɔhonɔ̀. E la sɔ yebe àgbè ŋùkèkèwo keŋu nɔ jè èɖɛ̀ na Tɔhonɔ̀. “Ekèa yomè a, Samuɛl cɔ̃ ŋùmè ànyi na Tɔhonɔ̀.