Read gen 1Samuɛl 11 Bible Online

1Samuɛl 11 - gen bible

1Samuɛl 11

¹Amɔ̀ntɔwo be èfìɔ, Nahas fɔ̃ àhùa va nɔ̀ Yabɛ̀s be èdùa ji, lè Gilead-nyigbã ji. Yabɛ̀s be èdùa mètɔwo gblɔ̃ na Nahas be: “Wɔ̀ zòɖùɖu ku mi, ne mia bɔ̀bɔ̀ mia ɖokoe na wò.”

²Nahas, Amɔ̀ntɔwo be èfìɔa ɖo e ŋuti na wo be: “Mù lɔ̃ be mà-ɖùzò ku mì, vɔ̀a, mù ɖo la ŋɔ ɖùsi mè be ŋùkuvia na mìa dòmètɔ ɖe sia ɖe, ne ma sɔ ɖìgbɔ Izràɛlviwo be dùkɔ̃a keŋu.”

³Yabɛ̀s be èdùa be àmè sĩsĩwo gblɔ̃ na Nahas be: “Na mi ŋùkèkè adrɛ̃, mia dɔ̃ àmè ɖoɖa Izràɛl be ànyigbãa keŋu ji. Ne àmè ɖekpe mu lè, la va xɔ̀ na mi òa, mi la to va gbɔ wò, la va na èta.”

⁴Àmè dɔ̃dɔ̃awo va yì ɖo Gibea, Saolò be èdùa mè, eye wo ɖè àmània na Gibea be èdùamètɔwo. Gibea be èdùamètɔwo fã àvi ku hèhè dodo.

⁵Wàlɛbɛ ŋua tutua, Saolò lè yebe ènyìwo yomè, gbɔ̀ so àgblè gbãnà. E biɔ be: “Nukɛ ye le jɔ̀ ɖo dùkɔ̃a ji, eye be le fã àvi ò?” Wo ɖè Yabɛstɔwo be ènyàa na Saolò.

⁶Kè Saolò sè ènyà kè Yabɛstɔwo gblɔ̃a, Mawu be gbɔ̃gbɔ̃ jè e ji, eye be do àdɔ̀mèze ŋutɔ.

⁷Zè ɖèkaa, Saolò le ènyì èvè, flì wo, eye be sɔ fìflìawo do àsi na àmèdɔ̃dɔ̃wo ɖoɖa Izràɛl be ànyigbãa keŋu ji ku àŋɛ̀do be: “Lekea ye wo la wɔ̀ ku àmè ɖekpekpe àmè kè mu la to, kplɔ̀ Saolò ku Samuɛl do yì àhùa òa, be ènyìwo!” Tɔhonɔ̀ na vɔ̃vɔ̃ jè dùkɔ̃a ji, eye woa kpata, wo sitè ɖodu.

⁸Saolò hlɛ̃ wo kpɔ lè Bezɛ̀k: Izràɛlviwo lè àgbètɔ hotu àlɔ̀ ɖèka-èkàci èwo (300000). Yudà be ŋusùwo lè àgbètɔ hotu woeàtɔ̃ (30000).

⁹Wo to na àmèdɔ̃dɔ̃awo be: “Mì gblɔ̃ na Yabɛstɔwo lè Gilead-nyigbã ji be: Èsɔ̀, wàlɛbɛ kè xixea mè la xɔ̀zò wua, hlùɛ̃gã la sù mìa si!” Àmèdɔ̃dɔ̃awo trɔ va do àŋɛ̀a na Yabɛstɔwo, eye èjì jɔ̀ Yabɛstɔwo.

¹⁰Yabɛstɔwo ɖo e ŋuti be: “Èsɔ̀a, mi la to va mìa gbɔ, eye mì la wɔ̀ ènu kè mì jro a ku mi.”

¹¹Eye, ekè èŋù kèa, Saolò ma dùkɔ̃a ɖo tèpe ètɔ̃. Saolò be àhùakɔ̃ kèawo zɔ̃ ɖo woabe kɛ̃tɔwo be àsàɖa mè, keŋu gbɔ̀xue èzãa ne vɔ̀. Wo le wù Amɔ̀ntɔwo kaka èŋù kè, eye kaka va na dɔ̃ŋùkusu jàse. Àmè kèwo ci àgbèawo kãhlɛ̃, àleke be àmè èvè mu teŋu nɔ̀ du lè tèpe ɖèka ò.

¹²Dùkɔ̃a biɔ Saolò be: “Fikɛ àmè kèwo gblɔ̃ be: 'Saolò cã la ɖùfìɔ lè mia nua!' Lè ò?” Mì kplɔ̀ wo do àsi na mi, ne mia wù wo!”

¹³Saolò ɖo e ŋuti be “Wo mu la wù àmè ɖekpe lè egbè be ŋùkèkè kèa ji ò, ɖoa, egbèa, Tɔhonɔ̀ na èjiɖùɖu gã ɖe Izràɛl-dùkɔ̃a.”

¹⁴Ekèa yomè a, Samuɛl gblɔ̃ na dùkɔ̃a be: “Mì va, mia yì Gilgàl, ne mia ɖo èkpe Saolò be èfìɔɖùɖua ji.”

¹⁵Dùkɔ̃ bliboa yì Gilgàl, eye wo ɖo Saolò èfìɔ, lè Tɔhonɔ̀ be ŋùmè, lè Gilgàl, eye, wo wɔ̀ àkpedo vɔsa, lè funua, lè Tɔhonɔ̀ be ŋùmè. Saolò ku Izràɛlviwo ɖù àzã eye wo kpɔ jìjɔɛ.