Read gen 1Samuɛl 12 Bible Online

1Samuɛl 12 - gen bible

1Samuɛl 12

¹Samuɛl gblɔ̃ na Izràɛl dùkɔ̃a be: “Kpɔɖa, mù ɖo èto mìabe ègbè, lè ènu sia ènu kè mì gblɔ̃ na mù a mè. Mù ɖo èfìɔ ɖo mìa nu.

²Fifìa, èfìɔ kèa ye la nɔ kplɔ̀ mì. Ènyè yaa, mù ku àmègã vɔ̀, eye èta ɣe na mù. Èvi nyèwo cã lè mìa dòmè. So àpe ɖèkajɛ mè, kaka va na fifìa, mù nɔ̀ ŋùkɔ̀ na mì.

³Ekèa ŋuti ye mù va lètè ɖo ŋùkɔ̀ na mì, lè Tɔhonɔ̀ ku èfìɔ kè be cã a be ŋùmè, àleke be, ne mù jè àgɔ̀ ɖe do àmè ɖe a, àmèa ne gblɔ̃ ɛ̀. Àmè kɛ be ènyì-su mù xɔ̀, àlo, àmè kɛ be èsɔ-àkɛtɛ mù xɔ̀ ò? Àmè kɛ ye wɔ̀ èdɔ na mù, àɖùflui tɔ̀ ò, àlo, àmè kɛ ŋuti ye mù sɛ̃ èta mè ɖo ò? Àmè kɛ si ye mù ɖù èzãnu lè, ne ma ŋɛ̃ ŋùkuvi pu yebe ènyà ji ò? Ne ènu kèawo be èɖe va e mèa, mù lè klalò, la tu èfɛ̃ na àmè kè mù jè àgɔ̀ do a.

⁴Dùkɔ̃a ɖo e ŋuti na Samuɛl be: “Wò mu tafu mi ò. Wò mu ɖùblu lè àmè ɖe ji ò. Wò mu xɔ̀ àmè ɖe be ènu ɖe ò, eye wò mu ɖù èzãnu ò.”

⁵Samuɛl yì e ji be: “Tɔhonɔ̀ ku èfìɔa nyi ɖàsèfowo, egbè, be mì mu le sɔ àgɔ̀jèje ɖe na mù ò.” Dùkɔ̃a gbà ɖo e ŋuti be: “E sɔ̀gbè!”

⁶Samuɛl gbà gblɔ̃ na Izràɛlviwo be: “Tɔhonɔ̀ ye cã Mosè ku Arɔ̀n, eye be kplɔ̀ mia tɔgbewo jo lè Ejiptè-nyigbã ji.

⁷Fifìa, mì nɔ̀tè lè Tɔhonɔ̀ be ŋùkɔ̀, ne ma ɖoŋù àdɔ̀mè nyuɛ̃ kèwo keŋu be wɔ̀ na mìa ku mìa tɔgbewoa ji na mì.

⁸Kè Yakɔb ku yebe xòmèa va Ejiptè-nyigbã jia, wàlɛbɛ kè Ejiptètɔwo le tĩ mìa tɔgbewo yomè a, Izràɛlviwo do àpa yɔ Tɔhonɔ̀. Tɔhonɔ̀ dɔ̃ Mosè ku Arɔ̀n, eye wo kplɔ̀ mìa tɔgbewo jo lè Ejiptè, va na wo tèpe ɖo fikèa.

⁹Vɔ̀a, e yomè a, mìa tɔgbewo va ŋlɔ̀be Tɔhonɔ̀, woabe Mawu a. Ekèa ŋuti ye Tɔhonɔ̀ ɖè àsi lè Izràɛlviwo ŋuti na Sisera kè nyi Hasɔ̀r be àhùagaa, na Filistìtɔwo ku Mòab be èfìɔ, wo kpe àhùa ku Izràɛlviwo.

¹⁰Ekèa na be mìa tɔgbewo do àpa yɔ Tɔhonɔ̀ be: “Tɔhonɔ̀, mi jè àgɔ̀, ɖoa, mi gble Tɔhonɔ̀ ɖɛ, va yì le sɛ̃ Baal ku Àstartè be vòduwo. Tɔ̀ wò jɔ̀, fifìa, hlùɛ̃ mi gã so miabe kɛ̃tɔwo si jro, ne mia sumɔ wò!”

¹¹Nène a ye Tɔhonɔ̀ dɔ̃ Yèrubaal, Bedan, Jɛftè ku Samuɛl ɖoɖa mì, eye Tɔhonɔ̀ hlùɛ̃ mì gã so mìabe kɛ̃tɔ kèwo ye pòxla mìawo si, eye mì va nɔ̀ ànyi lè gãgã blibo mè.

¹²Vɔ̀a, kè mì kpɔ Nahas, Amɔ̀nviwo be èfìɔ kè va kpe àhùa ku mìa, mì gblɔ̃ na mù be: “Mi le ji be èfìɔ ne nɔ̀ mia nu!” Sìgbè Tɔhonɔ̀, mìabe Mawu a mu nyi mìabe èfìɔ ò nène.

¹³Fifìa, èfìɔ kè mì cã be yèwoa ɖoa, Tɔhonɔ̀ sɔ ɛ̀ ɖo mìa nu.

¹⁴Ne mì le si Tɔhonɔ̀, eye mì le sumɔ ɛ̀a, ne mì le ɖo èto yebe ègbè, eye mì mu le jè àgla ɖo Tɔhonɔ̀ be èsewo ŋuti òa, eŋuã, mìawo ŋutɔ ku èfìɔ kè lè mìa nua, mì la nɔ̀ Tɔhonɔ̀, mìabe Mawu yomè ku ɖàgbè.

¹⁵Vɔ̀a, ne mì mu le sè ètonu na Tɔhonɔ̀ ò, ne mì jè àgla ɖo Tɔhonɔ̀ be èsewo ŋutia, Tɔhonɔ̀ la ɖè yebe àlɔ̀ sɛ̃sɛ̃a fiɔ mì, sìgbè lekè be ɖè è fiɔ mìa tɔgbewo sãa nène.

¹⁶Eye, mì nɔ̀tè, ne mìa kpɔ nùkunu gã kè Tɔhonɔ̀ la wɔ̀ fifì lè mìabe ŋùku mèa ɖa.

¹⁷Mu nyi èlù yàya hùenu ye mi lè fifì òa? Mù la fãkue na Tɔhonɔ̀, eye be la na èji la ɖè ègbè, eye èji la jà. Nène a, mì la kpɔ àleke àgɔ̀ kè mì jè do Tɔhonɔ̀a lòlò ɖo, wàlɛbɛ kè mì biɔ be wo ne ɖo èfìɔ na mìa.”

¹⁸Samuɛl fãkue na Tɔhonɔ̀, eye, gbè ŋua gbèa, Tɔhonɔ̀ na, èji ɖè ègbè, eye èji jà. Vɔ̃vɔ̃ gã ɖe jè dùkɔ̃ bliboa ji na Tɔhonɔ̀ ku Samuɛl.

¹⁹Dùkɔ̃ bliboa gblɔ̃ na Samuɛl be: “Tɔ̀ wò jɔ̀, ɖè kuku na Tɔhonɔ̀, àpo Mawu a ɖo miawo kèwo nyi sumɔ̃vi wòwoa ta, ne mi mu gbà ku ò. Ɖoa, mi wɔ̀ ènu bàɖà, sɔ pu miabe ènuvuɛ̃ gbogbowo ji, ekè mi biɔ be wo ne ɖo èfìɔ na mia.”

²⁰Samuɛl ɖo e ŋuti na Izràɛlviwo be dùkɔ̃a be: “Mì mu gbà vɔ̃ ò. Nyàwo ye e nyi be mi wɔ̀ èvuɛ̃ gã kèa. Vɔ̀a, mì mu gbà trɔ lè Tɔhonɔ̀ yomè ò. Mì sumɔ ɛ̀ ku mìabe èjì blibo.

²¹Mì mu gbà trɔ lè Tɔhonɔ̀ yomè, ne mìa yì kplɔ̀ ènu gbalo kèwo mè àlè ɖekpe mu lè na mì òa, do ò. Wo mu la teŋu ɖè mì ò, ɖoa, ènu gbalowo ye wo nyi.

²²Nyàwo ye be nyi be Tɔhonɔ̀ mu la gble yebe dùkɔ̃a ɖɛ ò, ekè e nyi be ye ŋutɔ ye cã mì, sɔ wɔ̀ yebe dùkɔ̃a, ɖo yebe nyikɔ gãa ŋuti.

²³Ènyè yaa, nyè mu la wɔ̀ bùsu be nuvuɛ̃ kè nyi be nyè mu gbà ɖè kuku na Tɔhonɔ̀ ɖo mìa ta ò. Mù la gbà nɔ fiɔ mì èmɔ nyuɛ̃ kè lè jɔ̀jɔɛa.

²⁴Mìawo cã a, mì si Tɔhonɔ̀, eye mì sumɔ ɛ̀ lè ànùkuawɔ̀wɔ mè, ku mìabe èjì blibo. Mìawo ŋutɔ, mì kpɔ ènu gã kèwo be wɔ̀ na mìawo ɖa!

²⁵Vɔ̀a, ne mì wɔ̀ èvuɛ̃a, Tɔhonɔ̀ la crɔ̃ mìa ku mìabe èfìɔa.”