Read gen 1Samuɛl 16 Bible Online

1Samuɛl 16 - gen bible

1Samuɛl 16

¹Tɔhonɔ̀ gblɔ̃ na Samuɛl be: “Ŋùkèkè nenè ye wò la sɔ fã Saolò, àmè kè nyè ya mù gbe be mu la gbà nyi èfìɔ ɖo Izràɛlviwo nu ke ò. Kù àmì ɖɔ àpo èlã-zoa, ne wòa jè èmɔ. Mù le dɔ̃ wò ɖoɖa Jesè, Bɛtlɛhɛ̀m ŋusùa gbɔ, ɖo mù kpɔ èfìɔ kè jè na mù a lè èviawo dòmè.”

²Samuɛl gblɔ̃ be: “Leke mù la wɔ̀, la yì ò? Ne Saolò sè èa, e la wù mù.” Tɔhonɔ̀ gblɔ̃ be: “Wò la kplɔ̀ ènyì nɔvi ɖèka ɖo àsi, eye wò la gblɔ̃ be: 'Mù va la savɔ na Tɔhonɔ̀.'

³Wò la yɔ Jesè va èkɔ̀nua tèpe. Eye nyè ŋutɔ mù la fiɔ wò ènu kè wò la wɔ̀a. Wò la do àmì èta na àmè kè mù la ɖèfiɔ wòa, eye be la nyi èfìɔ kè la wɔ̀ èdɔ na mù a.”

⁴Samuɛl zɔ̃ ɖo Tɔhonɔ̀ be ègbèa ji, eye be yì Bɛtlɛhɛ̀m. Èdùa be àmè sĩsĩwo va dogò è ku vɔ̃vɔ̃. Wo biɔ ɛ̀ be: “Ɖàgbè lè àpo vavaa mèa?”

⁵Samuɛl ɖo e ŋuti be: “Ɛ̃ɛ, ɖàgbè lè e mè. Mù va, la savɔ na Tɔhonɔ̀. Mì lè mìa ɖokoewo ɖì, ne mìa kplɔ̀ mù do, mia yì savɔ na Tɔhonɔ̀.” Samuɛl na Jesè ku èviawo lè woa ɖokoewo ɖì, eye be kpe wo be woa kpɔ gomè lè èkɔ̀nua mè.

⁶Ekè wo ɖo tèpea, Samuɛl kpɔ Eliab, eye Samuɛl gblɔ̃ be: “E wɔ̀ na mù be àmè kè Tɔhonɔ̀ cã a ye nyi ekèa.”

⁷Vɔ̀a, Tɔhonɔ̀ gblɔ̃ na Samuɛl be: “Àmè kèa be nɔ̀nɔmè ku yebe àgbà mu gbà wɔ̀ èdɔ ɖo ji wò ò. Ɖoa, mu nyi e ye mù cã ò. Àpe ènu kpɔkpɔ mu nyi àgbètɔ be ènu kpɔkpɔ ò. Àgbètɔwo kpɔna ènu kè ze ɖo ŋùkuvi ji na woa, vɔ̀a, Tɔhonɔ̀ yaa, kaka èjì mè ye be kpɔna.”

⁸Jesè na Abinadab va Samuɛl be ŋùkɔ̀, vɔ̀a, gblɔ̃ be: “Tɔhonɔ̀ mu cã àmè kèa cã ò.”

⁹Jesè na Samà cã va, vɔ̀a Samuɛl gbà gblɔ̃ be: “Tɔhonɔ̀ mu cã àmè kèa cã ò.”

¹⁰Jesè na èvia àmè adrɛ̃ va Samuɛl be ŋùkɔ̀ nènea. Vɔ̀a, Samuɛl gblɔ̃ na Jesè be: “Tɔhonɔ̀ mu cã àmè kèawo dòmètɔ ɖekpe ò.”

¹¹Samuɛl biɔ Jesè be: “Ŋusùvi wòawo keŋu vɔ̀a?” Jesè ɖo e ŋuti be: “E kpɔ̀tɔ̀ vifɛ̃ tɔa. Kpɔɖa, e kplɔ̀ àlɛ̃wo yì ènu ɖùgbe.” Samuɛl gblɔ̃ na Jesè be: “Dɔ̃ àmè ne woa yì kplɔ̀ ɛ̀ va. Ne mu va òa, mi mu la tɔ vɔsaa ji ò.”

¹²Jesè na wo yɔ ɛ̀ va. Ɖèkajɛ a be àgbàze mè bìa; yebe ŋùmè nya kpɔkpɔ, eye be jè ɖèkajɛ. Tɔhonɔ̀ gblɔ̃ be: “Sitè, do àmì èta na ɛ̀, ɖoa, àmè kèa ye.”

¹³Samuɛl sɔ àmì be àzò a, eye be do àmì èta na David lè fòfoawo dòmè. Tɔhonɔ̀ be Gbɔ̃gbɔ̃ ɖì ɖo David ji, so gbè ŋua gbè. Samuɛl jè èmɔ, eye be trɔ yì Ramà.

¹⁴Tɔhonɔ̀ be Gbɔ̃gbɔ̃ jo lè Saolò ji, eye Tɔhonɔ̀ sɔ gbɔ̃gbɔ̃ vuɛ̃ ɖo Saolò ji. Gbɔ̃gbɔ̃ kèa le ɖè èfũ na Saolò.

¹⁵Saolò be sumɔ̃viwo gblɔ̃ na Saolò be: “Kpɔɖa, Tɔhonɔ̀ dɔ̃ gbɔ̃gbɔ̃ vuɛ̃ ɖe, kè le ɖè èfũ na wòa.

¹⁶Miabe àpetɔ ne gbe ɖè ègbè kpò. Sumɔvi wòwo lè èto ji. Wo la ji àmè ɖe kè pònà èkà-sãŋùgua. Eye, ne Mawu dɔ̃ gbɔ̃gbɔ̃ vuɛ̃ ɖe, le ɖè èfũ na wòa, àmèa la pò èkà-sãŋùgua, eye wò la xaya.”

¹⁷Saolò ɖo e ŋuti na yebe sumɔ̃viwo be: “Mì ji èkà-sãŋùgu pò tɔ nyuɛ̃ ɖe, ne mìa kplɔ̀ ɛ̀ va na mù.”

¹⁸Sumɔviawo dòmètɔ ɖèka ɖo e ŋuti be: “Mù jèsi Jesè kè nɔ̀nà Bɛtlɛhɛ̀m a be ŋusùvi ɖèka ŋutɔ cã. E pònà èkà-sãŋùgu nyuɛ̃ ɖe. Àmè nyuɛ̃ ɖe be nyi, eye e nyi kãlìwɔ̀tɔ. Ènunya zena lè yebe nupo pòpo mè. E jè ɖèkajɛ, eye Tɔhonɔ̀ lè ku ì.”

¹⁹Saolò dɔ̃ àmè ɖoɖa Jesè be: “Ɖo èvi wò David, àmè kè kpɔna èlãha jia ɖoɖa mù.”

²⁰Jesè sɔ èsɔ-àkɛtɛ ɖèka, sɔ kpɔ̃nɔ, vɛ̃ ègò ɖèka, ku ègbɔvi ɖèka do àgbã na David, eye be dɔ̃ ɛ̀ be ne sɔ wo yì na Saolò.

²¹Ekè David ɖo Saolò gbɔa, e ɖo Saolò be èdɔ mè zè ɖèka. David be ènu jɔ̀jì na Saolò, àleke be Saolò sɔ David ɖo yebe àdèkplɔ̀vi trolo.

²²E yomè a, Saolò dɔ̃ àmè ɖoɖa Jesè be wo ne to na ɛ̀ be: “Mù jro be David ne ci gbɔ nyè, ne bèa wɔ̀ èdɔ na mù, ɖoa, e jè ŋùmè na mù.”

²³Nène a ye, ne Tɔhonɔ̀ be gbɔ̃gbɔ̃a le ɖè èfũ na Saolòa, David sɔna yebe èkà-sãŋùgua, eye be pònà ɛ̀ na Saolò. Ekèa nana be Saolò kpɔna gbɔ̃jɛ̃, e xayana, eye gbɔ̃gbɔ̃a jona lè Saolò ji.