Read gen 1Samuɛl 2 Bible Online

1Samuɛl 2 - gen bible

1Samuɛl 2

¹Ekèa yomè a, Anà fãkue be: “Tɔhonɔ̀ na be èjì nyè ɖɔ ku jìjɔɛ, Tɔhonɔ̀ na be mù teŋu fɔ̃ ŋùmè yì ji, Fifìa, mù teŋu kònu lè èkɛ̃tɔ nyèwo be ŋùkɔ̀, Eye mù gli ku jìjɔɛ, ɖoa, Tɔhonɔ̀, wò ɖè ŋùkpɛ̃ na mù!

²Àmè kɔ̀kɔ̀ɛ ɖekpe mu sɔ̀ ku Tɔhonɔ̀ ò! Mawu bu mu lè to ŋuti wò ò! Àkpã ɖekpe mu lè, sɛ̃ŋu sɔ̀ ku miabe Mawu ò!

³Mì mu gbà nɔ kã àtãŋu gbalo nènea ò! Eye, mì mu gbà nɔ pò àdègbè nène ò! Ɖoa Tɔhonɔ̀ ɖèka ye nyi Mawu kè nya ènuwo keŋu, E ye kpò ye ɖona kòjo na wɔ̀nawo kpata.

⁴Kãlìwɔ̀tɔwo be àŋùdàtiwo ŋɛ̃ keŋu lè woa si, vɔ̀a Tɔhonɔ̀ sɔ ŋusɛ̃ bla àlì ji na àmè kèwo mu ɖo ŋusɛ̃ òa.

⁵Àmè kèwo ye ɖɔpò sãawo le ji èdɔ la wɔ̀, ne woa teŋu ɖùnu. Vɔ̀a, àmè kèwo ye àdɔ̀ le wù sãawo le gbɔ̃jɛ̃. Nyɔ̃nù èkònɔ̀ ŋutɔ cã jì èvi zè adrɛ̃, vɔ̀a, nyɔ̃nù kè jìnà sùgbɔ sãa be àdɔ̀ jo yrɔ̀!

⁶Tɔhonɔ̀ ye nana èku, e ye ke gbà nana àgbè. E ye ke ɖiɖina àmè ɖo èkuwode, e ye ke gbà ɖènà àmè to.

⁷Tɔhonɔ̀ ye wɔ̀nà àmè wɔ̀amènɔ̀, e ye ke gbà nana àmè àdɔ̀kùnu, e ye ɖiɖina àmè ɖo ànyi. Vɔ̀a, e ye ke gbà kɔna àmè yìji.

⁸Tɔhonɔ̀ ye kɔna àmè kè gbɔjɔa sitè, lè ànyigbã, eye be ɖènà àmè kè wo gble ɖo ègbeɖiɖɔɛ mèa to, e nana wo tèpe lè èfìɔwo dòmè, ɖoa, Tɔhonɔ̀ tɔ̀ ye nyi ànyigbã kplògòdòa be sɔtiwo, eye, Tɔhonɔ̀ ye li xixea kpata ɖo woa ji.

⁹E kplɔ̀nà yebe àmè jɔ̀jɔɛwo lè woabe àfɔ̀topewo, vɔ̀a, àmè kèwo crìnà Tɔhonɔ̀a crɔ̃na lè vìvìti mè, ɖoa, àmè ɖekpe mu teŋu ɖùji ku ye ŋutɔ be ŋusɛ̃ ò.

¹⁰Tɔhonɔ̀ be ègbè la ɖì so jiŋùkusi, sìgbè èji ɖègbè nène, la sɔ hũhũ àmè kèwo crì ìa. E la ɖo kòjo na xixea be ènukpòpewo keŋu, e la na àcɛ̀ èfìɔ kè be cã a, eye be la kɔ yebe àmè sì àmì na a ɖoji.

¹¹Ekèa yomè a, Ɛlkanà trɔ yì àxue, lè Ramà, vɔ̀a, Samuɛl, ɖèvia yaa, ci Silò, ne bèa nɔ sɛ̃ Tɔhonɔ̀, lè hũbonɔ Èlìa be kpɔ̀kplɔ nu.

¹²Vɔ̀a, Èlìa, hũbonɔa be èvi-ŋusùwo nyi yàkàme, eye wo mu nya àmè kè nyi Tɔhonɔ̀ ò.

¹³Togbɔ be wo nyi hũbonɔwoa, ènu kè wo wɔ̀nà ɖoɖa dùkɔ̃a gbɔa ye nyi ekèa: Ne àmè ɖe gbe le savɔ kpòa, hũbonɔa be sumɔ̃vi lena gafò àɖu ètɔ̃ ɖo àsi, dɔ̃nà gogo èlã kè le fìɔ, lè èzòa jia.

¹⁴Sumɔvia sɔna gafòa trɔ̃na èlãa lè èzea, èkɔzea, àlo gàzea mè. Èlã ɖekpe kè sumɔ̃via ɖènà to ku gafòa nyina hũbonɔa ŋutɔ tɔ̀. Nène a ye Èlìa be èviwo wɔ̀nà ku Izràɛlvi ɖekpekpe kè vana Silò, ne bèa savɔa.

¹⁵Wu ekèa, keŋu gbɔ̀xue woa tɔzò vɔsa be èlãa be àmìa ŋutɔ cã a, hũbonɔ be sumɔ̃via va gblɔ̃nà be: “Sɔ èlã na mù ne ma sɔ na hũbonɔa, bèa mè. Ɖoa, mu la lɔ̃ be wòa sɔ èlã bibi ɖoɖa yè ò, vɔ̀a, èlã kè lè mumua kpò be la lɔ̃.”

¹⁶Ne àmè kè le wɔ̀ vɔsa-dɔa gblɔ̃ be: “Nɔ̀tè, ne ma tɔzò àmì a[1] gbɔ̀xue, e yomè a, wò teŋu sɔ èlã ɖekpe kè jro wòa”, sumɔ̃via ɖona e ŋuti be: “Gbèɖe! Wò ɖo la sɔ ɛ̀ na mù, fifìjɛ̃! Ne mu nyi nène òa, nyè ŋutɔ mù la sɔ ɛ̀ ku àkpasɛ̃sɛ̃!”

¹⁷Lekea, Èlìa be èviwo le jè àgɔ̀ lè Tɔhonɔ̀ ji ŋutɔ, ɖo, wo le dovlo vɔsa kè wo le wɔ̀ na Tɔhonɔ̀a.

¹⁸Samuɛl ya nyi ɖèkajɛvi ɖe kè dona hũbonɔwo be àlɛ̃ŋudà be àkɔta-dàbla, eye be sumɔna Tɔhonɔ̀.

¹⁹Èpè sia èpèa, ènɔa tɔ̃nà àwùgã kè sɔ̀nà ku Samuɛl ɖèvia, eye be hɛ̃na ɛ̀ va na Samuɛl, lè Silò, wàlɛbɛ kè be va wɔ̀nà èpè sia èpè vɔsa ku èsrɔ̃a.

²⁰Eli tunasì na Ɛlkanà ku èsrɔ̃a. E gblɔ̃nà na Ɛlkanà be: “Tɔhonɔ̀ ne na wò èvi buwo ku nyɔ̃nù kèa, ne wòa sɔ ɖɔ̀lì èvi kè èsrɔ̃ wòa sɔ na Tɔhonɔ̀a!” Ekèa yomè a, Ɛlkanà ku yebe xòmèa trɔ yìnà àxue.

²¹Tɔhonɔ̀ ɖoŋù Anà, eye be gbà fɔ èfu, eye be gbà jì ŋusùvi ètɔ̃ ku nyɔ̃nùvi èvè kpe è. Samuɛl ya le sĩ lè Tɔhonɔ̀ be ŋùmè.

²²Èlìa, hũbonɔa va sĩ ŋutɔ, wàlɛbɛ kè be sè lekè èvia ŋusùawo wɔ̀nà ku Izràɛlviwo, eye wo dɔ̃na ku nyɔ̃nù kèwo wɔ̀nà èdɔ lè mawuxɔa nu ŋutɔ cã ɖoa.

²³E gblɔ̃ na wo be: “Ènyà bàɖà kpò mù le sè, àmè sia àmè le gblɔ̃ so mìa ŋuti. Nukɛ ŋuti mì le ɖo nɔ̀nɔmè kèa ɖo ò?

²⁴Èvi nyèwo, mì nɔ̀tè ènu kèa wɔ̀wɔ, ɖoa, ènyà kè Mawu be dùkɔ̃a le gblɔ̃ so mìa ŋutia, mu nya sèse ò[2]!

²⁵Ne àmè ɖe jè àgɔ̀ do nɔ̀via, àgbètɔa, Mawu teŋu sò ènyàa. Vɔ̀ ne àmè ɖe jè àgɔ̀ do Tɔhonɔ̀a ɖe, àmè kɛ ye la sò è ò?” Vɔ̀a, Èlìa be èviwo mu ɖo èto woa tɔ be ègbè ò. Ɖe ye Tɔhonɔ̀ jro be ye à crɔ̃ wo.

²⁶Gãkea, Samuɛl ya le sĩ, eye be le jè Tɔhonɔ̀ ku àgbètɔwo nu.

²⁷Mawu be gblɔ̃ɖɛtɔ ɖe va kpɔ Samuɛl, eye be gblɔ̃ na ɛ̀ be: “Tɔhonɔ̀ be: 'Wàlɛbɛ kè tɔgbe wòwo ku woabe xòmèwo nyi Faraɔ̀n be kluviwo lè Ejiptè-nyigbã jia, mù ɖè ɖokoe nyè fiɔ wo.

²⁸Lè Izràɛl be hɛ̃nu ku kɔ̀tawo keŋu dòmèa, tɔgbe wòwo be hɛ̃nu ye mù cã, sɔ wɔ̀ hũbonɔ nyèwo be hɛ̃nu; woabe èdɔ ye nyi be woa nɔ yì vɔsakpe nyèa ŋuti, woa nɔ do àwù kɔ̀kɔ̀ɛ, woa nɔ tɔzò lifi, ne woa nɔ savɔ lè ŋùkɔ̀ na mù. Mù sɔ Izràɛlviwo be ènunanawo keŋu sɔ kè tɔgbe wòwo ku woabe jìjimèviwo.

²⁹Nukɛ ŋuti ye mì le dovlo vɔsa-nunana ku vɔsa kèwo mù be mìa nɔ wɔ̀ lè àpe kɔ̀kɔ̀ɛpea ɖo ò? Nukɛ ŋuti ye mì le sɔ dùkɔ̃ nyè be ènunana be àkpa nyuɛ̃tɔa le do àmì mìa ɖokoewo, wàlɛbɛ kè mì le cã e mèa ò? Eye, nukɛ ŋuti ye wò le do bùbu èvi wòwo ŋuti, sɔ wu mù ɖo ò?

³⁰Ekèa ŋutia, Tɔhonɔ̀, Izràɛl be Mawu a le gblɔ̃ be: Ɛ̃ɛ, mù gblɔ̃ sãa be: “Mù la na, àxue wò ku ètɔ wò be àxue la zɔ̃ lè àpe ŋùkɔ̀, kaka sɔ yì.” Vɔ̀, fifìa Tɔhonɔ̀ le gblɔ̃ be: “Hèlu! Ɖoa, mù la do bùbu àmè kèwo bùnà mùawo ŋuti, vɔ̀a mù la dovlo àmè kèwo crì mùawo.

³¹Kpɔɖa, ŋùkèkèwo gbãnà, kè mè mù la ɖè àmè kèwo keŋu nyi xòmè wòwo be sɔtiwo, ku ètɔ wòwo be xòmèwo be sɔtiwo keŋu jo, àleke be wo mu la gbà kpɔ tɔgbe ɖekpe lè xomèa mè ò.

³²Wò la sɔ vevesèse kpɔ àmè bu la nɔ lebè na kɔ̀kɔ̀ɛpe nyèa, ku jɔ̀gbènyuɛ̃ kè Mawu la nɔ na dùkɔ̃ nyèa. Eye tɔgbe mu la gbà nɔ̀ àxue wò mè ò.

³³Gãkea, mù la gble jìjimèvi wò ɖèka ɖo àgbè, lè vɔsakpe nyèa gbɔ, la sɔ ci ŋùkuvi wòwo, la sɔ tùkù àgbè wò, wàlɛbɛ kè àmè kpɔ̀tɛawo keŋu la kua.

³⁴Ènu kè la jɔ̀ ɖo èvi wò Hɔfnì ku Pineas jia la nyi jèsìdo na wò: wo àmè èvèawo la ku gbè ɖèka.

³⁵Ekèa yomè a, mù la cã hũbonɔ bu kè la nyi ànùkuamea. E la nɔ wɔ̀ èdɔ ɖo àpe èjro nu. Mù la na ɛ̀ jìjimèvi kèwo la nyi hũbonɔwo kaka sɔ yì, lè àxàda mè na èfìɔ kè mù la do àmì èta na a.

³⁶Nène a, àmè kè la kpɔ̀tɔ̀ ci àgbè lè jìjimèvi wòwo dòmèa la yì jè èklò ɖo ŋùkɔ̀ na hũbonɔa, ne bèa na ɛ̀ èci, àlo ènu ɖùɖu, eye be la gblɔ̃ na hũbonɔa be: “Mù ɖè kuku; na mù èdɔ ɖekpekpe, lè hũbonɔwo be àxàda mè, ne ma wɔ̀, àleke be ma teŋu kpɔ ènu mà-ɖù.”