Read gen 1Samuɛl 20 Bible Online

1Samuɛl 20 - gen bible

1Samuɛl 20

¹David si jo lè Nayɔt, lè Ramà, eye be va biɔ Yonatàn, David be èvia be: “Nukɛ ye mù wɔ̀ ò? Àgɔ̀ kɛ ye mù jè ò? Èvuɛ̃ kɛ ye mù wɔ̀ do ètɔ wò, eye be le ji la wù mù ò?”

²Yonatàn ɖo e ŋuti na ɛ̀ be: “Ɖè eŋuã ya jo lè èta mè. Wò mu la ku ò. Ètɔ nyè mu wɔ̀nà ènu ɖe kè mu gblɔ̃nà na mù, jè ŋùkɔ̀ ò. Nukɛ ŋuti be la wla ènyà kèa ya do mù ɖo ò? Ekèa mu la teŋu va e mè ò.”

³David tà ènu ɖo e ji na Yonatàn be: “Kè ètɔ wò nya be wò mu lɔ̃nà ènu lè ŋuti nyè òa, e susu be: 'Mu jè be Yonatàn ne nya ò, ne mu nyi nène òa, e la ve è.' Vɔ̀a, sìgbè lekè Tɔhonɔ̀ lè àgbè nènea, mù tà àpo àgbè na wò be, àfɔ̀ɖèɖe ɖèka kpò ye lè ènyè ku èku dòmè egbèa!”

⁴Yonatàn ɖo e ŋuti na David be: “Ènu kè wò jro be ma wɔ̀ na wòa, mù la wɔ̀ ɛ̀.”

⁵David gblɔ̃ na Yonatàn be: “E nyɔ! Èsɔ̀ ye la nyi wètri jè èji be àzãa. Mù ɖo la ɖùnu ku èfìɔa. Vɔ̀a, wò la ɖè èmɔ na mù, ne ma yì bè ɖo ègbe mè, kaka na nyìsɔ̀ wètrɔ mè.

⁶Ne ètɔ wò biɔ èta nyèa, to na ɛ̀ be: 'David va biɔ mù ègbè be yèa pu dù yì Bɛtlɛhɛ̀m, yebe èdù mè, ne bèa yì wɔ̀ èpè mè-kɔ̀nu ku yebe xòmètɔwo kpata.'

⁷Ne èfìɔa gblɔ̃ be: 'E nyɔ̃' a, eŋuã, sumɔ̃vi wò la vò lè fàfa mè. Vɔ̀a, ne èfìɔa do àdɔ̀mèzea, eŋuã, wò la sè e mè be e ɖo è be yèa crɔ̃ mù.

⁸To ekèa mè ye wò la ɖè àpo ànùkua fiɔ mù, ɖo nyè ku wò mi ɖùzò lè Tɔhonɔ̀ be nyikɔ mè. Eye, ne mù jè àgɔ̀ ɖe a, wò ŋutɔ wù mù bòhũ. E nyɔ wu be wòa sɔ mù do àsi na ètɔ wò.”

⁹Yonatàn ɖo e ŋuti be: “Gbèɖe! Ne mù sè be ètɔ nyè jro la crɔ̃ wòa, mù tà ènu na wò be mù la na wò la nya.”

¹⁰David biɔ Yonatàn be: “Eye, ne ètɔ wò sɔ àdã klɛ̃ŋùku do wòa ɖe, àmè kɛ ye la na mù la nya ò?”

¹¹Yonatàn ɖo e ŋuti na David be: “Va, mia to yì àgblè ji vi ɖe.” Eye wo àmè èvèawo to yì àgblè ji.

¹²Yonatàn gbà gblɔ̃ na David be: “Mù tà Tɔhonɔ̀, Izràɛl be Mawu a na wò! Ɛ̃ɛ, èsɔ̀, àlo nyìsɔ̀, wàlɛbɛ kèa lɔ̀gea, mù la biɔ ènyà ètɔ nyè, so susu kè le èta mè na ɛ̀a ŋuti. Ne ètɔ nyè be àdɔ̀mè kɔ̀ ɖo David ŋutia, nyè mu la dɔ̃ àmè ɖoɖa wò ò.

¹³Vɔ̀a, Tɔhonɔ̀ ne dɔ̃ èto na mù veve ɖe, ne mù nya be ètɔ nyè ɖo èvuɛ̃ ɖo ŋuti wò, vɔ̀ nyè mu na wò nya òa. Ɖoa, mù ɖo la na wò la jo, lè ŋuti fàfa mè, vɔ̃vɔ̃ mà ɖo. Tɔhonɔ̀ ne nɔ̀ ku wò, sìgbè lekè be nɔ̀ ku ètɔ nyèa nène.

¹⁴Ne mù ci àgbè, gbè ɖe gbèa, ɖe ye wò cã, wò mu la do mù àlɔ̀ ku ànùkua kè Tɔhonɔ̀ biɔa, la sɔ̀ hlùɛ̃ mù gã òa?

¹⁵Eye ne mù ku ŋutɔ cã a, ànùkua be àdɔ̀mènyuɛ̃ ŋua ke ye kpò wò la sɔ kplɔ̀ jìjimèvi nyèwo, ne Tɔhonɔ̀ ɖè David be kɛ̃tɔwo keŋu-keŋu jo lè ànyigbã ji, ɖèka ɖèkaa.”

¹⁶Ekèa yomè a, Yonatàn ɖùzò ku David be xòmèa be: “Tɔhonɔ̀ ne ɖè David lè yebe kɛ̃tɔwo si!”

¹⁷Yonatàn na David gbà kã àtãŋu, sɔ fìã yebe lɔ̃lɔ̃ be àjɔ̀gbè na Yonatàn kè lɔ̃ David, sìgbè ye ŋutɔ ye ɖokoe nènea.

¹⁸Yonatàn gblɔ̃ be: “Èsɔ̀, lè wètri jè èji be àzãa ɖùpea, e la ze be wò mu lè ò, ɖoa, àzìkpe wòa la nɔ̀ gbalo, lè èfìɔ be ènuɖù-kplɔ̃a ŋuti.

¹⁹Nyìsɔ̀a, wò la ɖì àbù a yì kaka àfi kè wò bè ɖo sãa, eye wò la nɔ̀ èkpe kè wo yɔna be Ezɛ̀la gbɔ.

²⁰Ènyè yaa, mù la dà àŋùti ètɔ̃ ɖoɖa èkpea gbɔ, ɖo ènu ɖe kè nyè ŋutɔ mù la jijea ji.

²¹E yomè a, mù la dɔ̃ sumɔ̃vi nyè, ɖèkajɛvia ɖoɖa, la gblɔ̃ na ɛ̀ be: “Yì ji àŋùtiawo va!” Ne mù do àpa ɖoɖa ɛ̀ be: “Kpɔɖa! Àŋùtiawo mu lè dìdìpe ò! Trɔ va cã wo vaa! “Ye gɔ̃mè ye nyi be 'Tùkaɖa ɖekpe mu lè ò.' Mù tà Tɔhonɔ̀ na wò be wò teŋu trɔ va lè fàfa mè.

²²Vɔ̀a, ne mù do àpa ɖoɖa ɖèkajɛvia be: “Kpɔɖa, àŋùtiawo gbà lè ŋùkɔ̀a!” Eŋuã, wò la jo, ɖo Tɔhonɔ̀ jro be wòa jo.

²³Eye, sɔ kù ɖo èxlɔ̃ be èzò kè ènyè ku wò mi ɖù a ŋutia, Tɔhonɔ̀ la na be mi la le è ɖo àsi tɛ̀gbɛ̀ɛ.”

²⁴E yomè a, David yì bè ɖo ègbea ji. Lè wètri jè èji be àzãa gbèa, èfìɔ Saolò nɔ̀ ànyi lè ènuɖù-kplɔ̃a ŋuti.

²⁵Sìgbè lekè be wɔ̀nà kòkòkòa nènea, èfìɔa nɔ̀ èfìɔzìkpea ji, lè èglì ŋuti. Yonatàn sitè. Abnɛ̀r nɔ̀ ànyi ɖo Saolò be àxàda mè. David be tèpea ci gbalo.

²⁶Gbè ŋua gbèa, Saolò mu gblɔ̃ ènyà ɖe ò. E le susu be: “Èta mu nyɔ òa, ènu ɖe jɔ̀ ɖo David ji, eye, e la nyi be David ŋuti mu kɔ̀ na èkɔ̀nua ò.”

²⁷Vɔ̀a, kè Saolò gbà kpɔ be David be tèpea gbà lè gbalo, wètri jè èji be èŋùkègbèa, Saolò biɔ èvia Yonatàn be: “Nukɛ ŋuti ye David, Jesè be èvia mu va ènuɖùpea, èsɔ̀ ku egbè ò?”

²⁸Yonatàn ɖo e ŋuti na Saolò be: “David biɔ veve ɖe be yèa yì kaka Bɛtlɛhɛ̀m.

²⁹E gblɔ̃ na mù be: 'Tɔ̀ wò jɔ̀, ɖè èmɔ na mù, ne ma yì, ɖoa, xòmè be èkɔ̀nu ɖe lè mia ŋuti, mi la wɔ̀ lè èdùa mè, eye fòfo nyè ɖè ègbè na mù be ma nɔ̀ yè tèpe. Ne mù nyi èxlɔ̃ wò nyàwo a, ɖè èmɔ na mù, ne ma yì kpɔ tɔ̀ nyèwo.' Ekèa ŋuti ye David mu teŋu va èfìɔ bùbùtɔ be ènuɖùpea ò”.

³⁰Ekèa na be Saolò do àdɔ̀mèze gã ɖe ɖo Yonatàn ŋuti. E gblɔ̃ na ɛ̀ be: “Èwò, nyɔ̃nù trãmɔ be èvi kèa! Mù nya nyuɛ̃ ɖe be wò jè èxlɔ̃ Jesè be èvia, eye wò lè e ji! Èŋù ne kpɛ̃ wò, ku ènɔ̀ wò be àmaa!

³¹Ɖoa, kaka na gà kè mè Jesè be èvi ŋua la gbe nɔ̀ àgbè kpòa, gbe nya kpò be kãkã ɖo ji mu lè na wò be wò la teŋu ɖùfìɔ ò. Ne wò ŋutɔ, wò nya ènua, wò ŋutɔ na ne woa le è va na mù, ɖoa, e jè na èku!”

³²Yonatàn biɔ ètɔa Saolò be: “Nukɛ ŋuti ye wò ɖo la wù ì ɖo ò? Nukɛ ye be wɔ̀ ò?”

³³Eye Saolò dà yebe èhuãa, la sɔ trɔ̃ Yonatàn, èvia a. Yonatàn nya fifìa be yè tɔ ɖo è be yèa wù David.

³⁴Yonatàn sitè lè ènuɖùpea ku àdɔ̀mèze, eye, lè wètri yeye be àzã èvègɔ̃a gbèa, mu ɖù ènu ɖekpe ò, ɖoa, e le sè veve ɖo David kè ètɔa, èfìɔ Saolò dovloa nu.

³⁵Kè èŋù kèa, Yonatàn to yì àfi kè ye ku David, wo ɖo ɖɛ lè ègbea jia. E kplɔ̀ ɖèkajɛvi ɖe ɖo àsi.

³⁶E gblɔ̃ na ɖèkajɛvia be: “Pu dù yì fɔ̀ àŋùti kèwo mù la dà a va na mù.” Ɖèkajɛvia yì, eye Yonatàn dà àŋùtia, àleke be ne to ɖèkajɛvia ŋuti.

³⁷Wàlɛbɛ kè ɖèkajɛvia le ɖo àfi kè àŋùtia yì trɔ̃a, Yonatàn do àpa ɖoɖa ɛ̀ be: “Àŋùtia mu lè ŋùkɔ̀ na wòa?

³⁸Yonatàn do àpa lè ɖèkajɛvia be ŋùgbedòmè be: “Ɖèbla kaba! Mù gbà nɔ̀tè ò!” Yonatàn be sumɔ̃via sɔ àŋùtia, eye be trɔ va àpetɔa gbɔ.

³⁹Sumɔvia mu nya ènu ɖekpe so Yonatàn ku David be ègòdodoa ŋuti ò. Yonatàn ku David kpò ye nya ɛ̀.

⁴⁰Yonatàn sɔ yebe àŋùdàtia ku yebe àŋùtiawo do àsi na yebe sumɔ̃via, eye be gblɔ̃ na ɛ̀ be: “Sɔ wo yì èdùa mè na mù.”

⁴¹Ɖèkajɛvia trɔ jo, eye David sitè so èkpea be àpùgo lɔ̀ge, àfi kè be wla ɖoa. E bɔ̀bɔ̀, cɔ̃ ŋùmè ànyi zè ètɔ̃, lè Yonatàn be ŋùkɔ̀. Ekèa yomè a, wo kpla àsi èkɔ̀ na woa nɔ̀nɔwo, eye wo fã àvi kaka be tì wo.

⁴²Ekèa yomè a, Yonatàn gblɔ̃ na David be: “Fifìa, jo lè ŋuti fàfa mè, eye ɖo ŋùku èxlɔ̃ be èzò kè nyè ku wò, mi ɖù, lè Tɔhonɔ̀ be nyikɔ mèa ji be: “Tɔhonɔ̀ ne na nyè ku wò, mia wɔ̀ ànùkua lè zòɖùɖu kèa mè, eye miabe jìjimèwo, woa le è ɖo àsi kaka sɔ yì.”