Read gen 1Samuɛl 21 Bible Online

1Samuɛl 21 - gen bible

1Samuɛl 21

¹Ekèa yomè a, David jè èmɔ, eye be jo. Yonatàn ya trɔ yì èdùa mè.

²David yì ɖo Nɔb be èdùa mè, lè hũbonɔ Ahimèlɛk gbɔ. Ahimèlɛk sɔ vɔ̃vɔ̃ va dogò David, eye be biɔ David be: “Nukɛ ye jɔ̀, eye wò ɖèka, wò va, kè àmè ɖekpe mu kplò wò do ò?”

³David ɖo e ŋuti na hũbonɔ Ahimèlɛk be: “Èfìɔa dɔ̃ mù, eye be gblɔ̃ be: 'Àmè ɖekpe mu ɖo la nya ènyà ɖe so èdɔ kè mù do àsi na wòa ŋuti ò.' Ènu kèa ŋuti ye mù ɖo tèpe ɖe kè ŋutime nyèwo la va dogò mù lè.

⁴Vɔ̀a, ènu ɖùɖu kɛ ye lè àsi wò ò? Na mù kpɔ̃nɔ àtɔ̃, àlo, ènu ɖùɖu ɖekpekpe kè wò la kpɔa.”

⁵Hũbonɔa ɖo e ŋuti na David be: “Kpɔ̃nɔ gbalo mu lè àsi nyè ò, vɔ̀a kpɔ̃nɔ kè ŋuti wo kɔ̀ vɔ̀a ye lè. Nyè mu la teŋu na wò, ne ŋutime wòawo do àsi nyɔ̃nù ŋuti ŋùkèkè kèawo mè ò.”

⁶David ɖo e ŋuti na hũbonɔa be: “Nyàwo be nyi be wo dona èkɔ̀ kèa na mi, ne mi la gbe jè èmɔ, yì àhùagbe ji kpòa. Eye wo kɔ̀nà ŋutime nyèwo be ŋutinuwo ŋuti, gbɔ̀xue, mi jènà èmɔ. Ne egbè be èmɔzɔ̃zɔ̃ nyi ŋutilã mè tɔ̀ ŋutɔ cã a, ekè wo kɔ̀ miabe àhùawɔ̀nuawo ŋutia, àhùawɔ̀nu kèawo le kɔ̀ èmɔzɔ̃zɔ̃a ŋuti.”

⁷Ekèa yomè a, hũbonɔa sɔ kpɔ̃nɔ kè ŋuti wo kɔ̀a do àsi na David, ɖoa, kpɔ̃nɔ bu mu gbà lè hũbonɔa si, tovò na eŋuãwo ò. Kpɔ̃nɔ kèawo ye wo fɔ̀ lè Tɔhonɔ̀ be èkplɔ̃a ji, ne woa sɔ ekèwo jèzòa, ɖo woa tèpe.

⁸Gbè ŋua gbèa, wo zĩ Saolò be sumɔ̃vi ɖèka ɖo Tɔhonɔ̀ be ŋùkɔ̀, ne bèa wɔ̀ èkɔ̀nu ɖewo. Yebe nyikɔ ye nyi Doɛg. E nyi Edɔ̀mvi, eye be nyi Saolò be àlɛ̃kplɔ̀tɔwo be àmègã.

⁹David biɔ Ahimèlɛk be: “Èhuã àlo èwui ɖe lè àsi wò, lè fikèa? Èfìɔ be èdɔ kè gbe be dɔ̃ mù ɖoɖaa lè veveɖe, àleke be, ekè mù nɔ̀ kplàkplà ji gbɔ̀xue joa, nyè mu sɔ èwui, àlo àhùawɔ̀nu nyèwo ò.”

¹⁰Hũbonɔa ɖo e ŋuti be: “Gòliat, Filistì ŋusù kè wò wù lè logòti be bàlìa mèa be èwuia ye lè. Wo bla ɛ̀ ɖo àwùgã ɖe mè, lè àwù kɔ̀kɔawo godo. Ne wò jro be yèa sɔ ɛ̀a, wò teŋu sɔ ɛ̀ fàa, ɖoa, èbu mu lè fikèa ò”. David gblɔ̃ be: “Yebe èvè mu lè ò. Sɔ ɛ̀ na mù.”

¹¹Gbè ŋua gbèa, David jè èmɔ, le si lè Saolò nu. E yì ɖo Gat lè Àkis be èfìɔa gbɔ.

¹²Àkis be ŋutimewo biɔ èfìɔa be: “Mu nyi David, ànyigbã kèa be èfìɔ ye nyi ekèa òa? Mu nyi e ye nyɔ̃nùwo jìhà na, eye wo le ɖuwè, gblɔ̃ be: 'Saolò wù gbãdãgbã èkà wìvɔ àtɔ̃, eye David ya wù gbãdãgbã èkà wìvɔ àtɔ̃ èwo-èwowoa?'”

¹³Ènyà kèa wɔ̀dɔ ɖo David ji, eye be vɔ̃ Àkis, Gat be èfìɔa ŋutɔ.

¹⁴Ekèa na be David wɔ̀ sìgbè èta gbɔ le gble na ɛ̀ nène, lè Filistìtɔwo be ŋùmè. E tɔ fùflù lè woa si mè, le tè èflìwo ɖo hɔ̃tru ku àgbowo ŋuti, eye be le kɔ̀ àde ɖo ègɛ̃ mè.

¹⁵Àkis gblɔ̃ na yebe ŋutimewo be: “Mìawo ŋutɔwo mì kpɔ be àmèa le jè àɖàhùa! Nukɛ ŋuti mì kplɔ̀ ɛ̀ va na mù ɖo ò?

¹⁶Àɖàhùatɔ ye le hiã mù, ŋuti ye mì kplɔ̀ àmè kèa va be, ne va wɔ̀ àɖàhùa-nu lè ŋùkɔ̀ na mù a? Àmè kèa la ɖo àxue nyè mèa?”