Read gen 1Samuɛl 26 Bible Online

1Samuɛl 26 - gen bible

1Samuɛl 26

¹Àmèwo so Zif va kpɔ Saolò lè Gibea. Wo gblɔ̃ na ɛ̀ be: “Wò nya be David bè ɖo Hakilà be ètokɔ̃ɛ̃a ji, jè ŋùkɔ̀ ànyigbã gbàjà kè wo mu dè òa?”

²Saolò jè èmɔ, ɖì àbù a, ɖota Zif be zògbèa ji ku Izràɛl be gbãdãgbã nyuɛ̃tɔ hotu ɖèka èkà èwì vɔ àtɔ̃ (3000), ne woa yì ji David lè Zif be zògbèa ji.

³Saolò do àsàɖa ɖo Hakilà be ètokɔ̃ɛ̃ kè jè ŋùkɔ̀ ànyigbã gbàjà kè wo mu dè òa ji, lè èmɔa to. David ya, lè zògbèa ji, eye, ekè be sè be Saolò va le ji la le yèa,

⁴E dɔ̃ bèkpɔɛwo ɖoɖa, sɔ kã ɖo e ji be Saolò va nyàwo.

⁵David jè èmɔ, eye be va ɖo àfi kè Saolò do àsàɖa ɖoa. E kpɔ àfi kè tutu Saolò ku Ner be èvi, Abnɛ̀r kè nyi Saolò be àhùaŋùkɔ̀nɔ̀tɔa le dɔ̃ àlɔ̃ lèa, jèsi. Saolò mlɔ̃ dòdòmè, eye gbãdãgbãwo do àsàɖa trɔ do è.

⁶David biɔ Hitì ŋusù, Ahimèlɛk ku Abisai, Yoab be nɔ̀vi kè nyi Seruyà be èvia be: “Mìa dòmètɔ kɛ ye la kplɔ̀ mù yì kaka Saolò gbɔ, lè àsàɖaa mè ò?” Abisai ɖo e ŋuti be: “Mù la yì ku wò.”

⁷Ekè èzã do a, David ku Abisai yì ɖo Saolò be àhùakɔ̃a gbɔ, wàlɛbɛ kè Saolò le dɔ̃ àlɔ̃ lè yebe àhùakɔ̃a be dòdòmèa. Saolò sɔ yebe èhuãa trɔ̃ ànyi ɖo ètagbe, eye Abnɛ̀r ku àhùakɔ̃a le dɔ̃ àlɔ̃, trɔ do è.

⁸Abisai gblɔ̃ na David be: “Egbèa, Tɔhonɔ̀ sɔ kɛ̃tɔ wòa do àsi na wò. Ɖè èmɔ na mù, ne ma sɔ ye ŋutɔ be èhuã trɔ̃ ɛ̀ ɖo ànyi. Zè ɖèka pɛ kpò ma trɔ̃ ɛ̀. Nyè mu la trɔ̃ ɛ̀, zè èvè ò.”

⁹David ɖo e ŋuti na Abisai be: “Aò, mù gbà wù ì ò. Wò susu be Tɔhonɔ̀ mu la dɔ̃ èto na àmè kè la wù àmè kè Tɔhonɔ̀ do àmì èta na òa?

¹⁰Mù tà Tɔhonɔ̀ na wò be Tɔhonɔ̀ ŋutɔ ye la ɖè yebe àgbè, ne yebe gàmè sùa, àlo, e la ku lè àhùagbe ji.

¹¹Tɔhonɔ̀ mu gbà na, ne ma tɔ àsi èfìɔ kè Tɔhonɔ̀ ŋutɔ do àmì èta na a ŋuti ò. Gbe sɔ èhuã kè lè ètagbe na ɛ̀a ku èsìgoa kpò, ne mia jo.”

¹²David sɔ èhuã ku èsìgoa, kèwo ye lè Saolò be ètagbea, eye wo jo. Àmè ɖekpe mu kpɔ ènu kè jɔ̀ a ò; àmè ɖekpe mu nya ɛ̀ ò, ɖoa, àmè ɖekpe mu fɔ̃ ò. Gbãdãgbãawo kpata le dɔ̃ àlɔ̃, ɖoa, Tɔhonɔ̀ na wo ɖo àlɔ̃ mè boo.

¹³Ekèa yomè a, David jo yì bàlìa be àkpa ɖetɔa, eye be lia ètoa tamè, lè dìdìpe na Saolò be àsàɖaa.

¹⁴David do àpa ɖoɖa Saolò be àhùakɔ̃a, eye be yɔ Abnɛ̀r, Ner be èvia, gblɔ̃ be: “Abnɛ̀r, wò la tɔ̀ na mùa?” Abnɛ̀r ɖo e ŋuti be: “Èwò ye nyi àmè kɛ, eye wò va le do àpa ɖo èto mè na èfìɔa ò?”

¹⁵David ɖo e ŋuti na Abnɛ̀r be: “Mu nyi ŋusù ye wò nyia? Mù nya be gbãdãgbã ɖekpe mu sɔ̀ ku wò, lè Izràɛl-nyigbã ji ò. Vɔ̀a ɖe, nukɛ ŋuti wò mu teŋu ɖia èfìɔ kè nyi àpetɔ wòa nyuɛ̃ ɖe ò? Àmè ɖe so dùkɔ̃a mè va be yèa wù èfìɔ, àpetɔ wòa.

¹⁶Ènu kè wò wɔ̀ ŋua mu nyɔ ò. Mù tà Tɔhonɔ̀ na wò be mìa, gbãdãgbã kèwo ye mu ɖia mìabe àpetɔ, àmè kè Tɔhonɔ̀ do àmì èta na a nyuɛ̃ ɖe òa, èku ŋutɔ ye mì jè na! Fifìa, kpɔɖa be fikɛ ye èfìɔ be èhuã ku èsìgo kèwo ye nɔ̀ ètagbe na èfìɔa, wo lè màa?”

¹⁷Saolò sè David be ègbè jèsi, eye be gblɔ̃ be: “Èvi nyè David, àpo ègbè mù le sè ŋuaa?” David ɖo e ŋuti be: “Èfìɔ bùbùtɔ, àpetɔ nyè, ègbè nyè ye!”

¹⁸Eye David biɔ èfìɔa be: “Nukɛ ŋuti ye èfìɔ bùbùtɔ le tĩ yebe sumɔ̃via yomè ɖo ò? Àgɔ̀ kɛ ye mù jè ò? Èvuɛ̃ kɛ ye mù wɔ̀ ò?”

¹⁹Mù ɖè kuku na àpetɔ nyè, èfìɔ bùbùtɔ be ne ɖo èto ènyà kè sumɔ̃vi wò la gblɔ̃a. Ne Tɔhonɔ̀ ye ɖo wò ɖo ŋuti nyèa, ne xɔ̀ vɔsa, ne èjì ne fa na ɛ̀. Vɔ̀a, ne àgbètɔ be èviwo ye à, Tɔhonɔ̀ be kpɛ̃sɛ̃ ne ɖì woa ŋuti, ɖoa, wo nyà mù jo, ɖè mù jo lè ànyigbã kè Tɔhonɔ̀ na yebe dùkɔ̃a ji, sìgbè ɖe ye wo le gblɔ̃ be: 'Jo yì sɛ̃ vòduwo[17]!' Nène.

²⁰Vɔ̀a, ènyè ya, nyè mu jro la ku lè àfi bu, tovò na Tɔhonɔ̀ be ŋùkɔ̀ ò. Ɖoa, Izràɛl be èfìɔ bùbùtɔ ɖè àhùa kpe na ènyè kè nyi èyɔ̀ɛvia, eye wo le xa mù, sìgbè lekè wo xana tèkle, lè èto tamèa nène!”

²¹Saolò ɖo e ŋuti be: “Mù wɔ̀ èvuɛ̃. Trɔ va, èvi nyè David! Nyè mu gbà la wɔ̀ èvuɛ̃ ɖekpe ɖo ŋuti wò ò, ɖoa, egbèa, wò do bùbu àgbè nyè ŋuti, eye wò mu wù mù ò. Ɛ̃ɛ, mù wɔ̀ ènu fùflu, eye mù blè ɖokoe nyè.”

²²David ɖo e ŋuti be: “Kpɔɖa, èfìɔ be èhuã ye nyi ekèa. Ɖèkajɛawo dòmètɔ ɖèka ne sò bàlìa va xɔ̀ ɛ̀.

²³Tɔhonɔ̀ ne ɖo ènu jɔ̀jɔɛ ku ànùkua kè àmè sia àmè le wɔ̀a tèpe na ɛ̀. Tɔhonɔ̀ ye sɔ wò do àsi na mù, egbèa, gãkea, mù gbe be nyè mu la wù àmè kè Tɔhonɔ̀ do àmì èta na a ò.

²⁴Ne àpo àgbè xɔ̀ àsì na mù lekea egbèa, àgbè nyè cã ne xɔ̀ àsì, nènea ke, na Tɔhonɔ̀, ne bèa ɖè mù lè àfɔ̀ku ɖekpekpe mè.”

²⁵Saolò gblɔ̃ na David be: “Tɔhonɔ̀ ne tu sì na wò, èvi nyè, David! Ɛ̃ɛ, wò la wɔ̀ ènu jɔ̀ àsuwo, eye àgbè mè la nyɔ na wò.” David jè yebe èmɔ, jo, eye Saolò trɔ yì àxue.