Read gen 1Samuɛl 28 Bible Online

1Samuɛl 28 - gen bible

1Samuɛl 28

¹Wàlɛbɛ ŋua, Filistìtɔwo bɔ̀ woabe àhùakɔ̃wo, la jè ègbe, ne woa kpe àhùa ku Izràɛlviwo. Àkis gblɔ̃ na David be: “Mù kã ɖo e ji be wò ku àpo àmèwo, mì la wɔ̀ àhùa lè àxàda mè na mù.”

²David gblɔ̃ be: “Èfìɔ bùbùtɔ ŋutɔ la kpɔ ènu kè sumɔ̃vi wò la wɔ̀a” Àkis gblɔ̃ na David be: “E nyɔ! Mù la sɔ wò ɖo ɖiatɔ nyè, kaka sɔ yì.”

³Ekè Samuɛl kua, Izràɛlviwo keŋu wɔ̀ ècɔ na ɛ̀, eye wo ɖì ì ɖo yebe èdù mè, lè Ramà. Saolò do èse be àmè ɖekpe mu gbà kã àfã, àlo, la yɔ èxɔ̀ lè Izràɛl-nyigbã ji ke ò.

⁴Gbè ɖèkaa, Filistìtɔwo bɔ̀ woabe àhùakɔ̃wo, eye wo va do àsàɖa ɖo Sunèm be èdùa gbɔ. Saolò cã bɔ̀ Izràɛlviwo be àhùakɔ̃awo, eye woawo cã, wo do àsàɖa ɖo Gilbòa.

⁵Ekè Saolò kpɔ Filistìtɔwo be àsàɖaa, àdìka sò è sɛ̃sɛ̃ ɖe, eye be pò tìtìtì.

⁶Saolò kù àhùa kè be la wɔ̀a gɔ̃mè kpɔ lè Tɔhonɔ̀ gbɔ, vɔ̀a, Tɔhonɔ̀ mu ɖo e ŋuti na ɛ̀, lè èdrɔ̃ mè loo, àlo, to Urìm be ènu mè kù-nu kɔ̀kɔ̀ɛa ji loo, àlo to gblɔ̃ɖɛtɔwo ji ò.

⁷Saolò gblɔ̃ na yebe sumɔ̃viwo be: “Mì ji nyɔ̃nù, àfãkãtɔ ɖe na mù, ne ma yì kpɔ ɛ̀.”

⁸Èfìɔ Saolò do àwù bu, sɔ trɔ nɔ̀nɔmè. E kplɔ̀ ŋusù èvè ɖo ŋuti, eye be jè èmɔ, ɖota Ein-Dor. Wo ɖo nyɔ̃nùa gbɔ èzã mè. Saolò gblɔ̃ na nyɔ̃nùa be: “Wò la yɔ èxɔ̀ na mù, eye wò la yɔ àmè kè mù la gblɔ̃ na wòa va.”

⁹Nyɔ̃nùa ɖo e ŋuti na ɛ̀ be: “Wò ŋutɔ wò nya be Saolò do èse be àmè ɖe mu gbà kã àfã ò, eye be wù àmè kèwo ye yɔna èxɔ̀ lè èdùa mèawo. Nukɛ ŋuti wò jro la tre àfɔ̀ku be èmɔ̀ kèa na mù ɖo ò?”

¹⁰Saolò tà Tɔhonɔ̀ na nyɔ̃nùa be: “Mù tà Tɔhonɔ̀ na wò be ènu ɖekpe mu la jɔ̀ ɖo ji wò lè ènyà kèa mè ò.”

¹¹Nyɔ̃nùa biɔ be: “Àmè kɛ ye mù la yɔ na wò ò?” Saolò ɖo e ŋuti be: “Yɔ Samuɛl na mù.”

¹²Nyɔ̃nùa kpɔ Samuɛl, eye nyɔ̃nùa do àpa gã ɖe, eye be gblɔ̃ na Saolò be: “Èfìɔ Saolò ye wò nyi e! Nukɛ ŋuti wò flù mù ɖo ò?”

¹³Èfìɔa ɖo e ŋuti na ɛ̀ be: “Mù gbà vɔ̃ ènu ɖekpe ò. Vɔ̀a, gblɔ̃ ènu kè wò kpɔa na mù.” Nyɔ̃nùa ɖo e ŋuti be: “Mù kpɔ ènu ɖe kè lè sìgbè àŋùãlì nène, eye be le to so ànyigbã be ètù mè.”

¹⁴Èfìɔa gbà biɔ nyɔ̃nùa be: “Leke yebe nɔ̀nɔmè lè ɖo ò?” Nyɔ̃nùa ɖo e ŋuti be: “Tɔgbe sĩsĩ ɖe ye be nyi. Àwù vlàyà ɖe trɔ do è.” Saolò sè e gɔ̃mè be Samuɛl ye be nyi, eye èfìɔa bɔ̀bɔ̀, cɔ̃ ŋùmè ànyi.

¹⁵Samuɛl biɔ Saolò be: “Nukɛ ŋuti wò le do nupo na mù, na be wo ne yɔ mù va ɖo ò?” Saolò ɖo e ŋuti be: “Mù xixa ŋutɔ, eye èhlò mè sãkɔ̃ na mù. Filistìtɔwo ɖè àhùa kpe na mù. Eye Mawu trɔ ŋùgbe do mù. Tɔhonɔ̀ mu gbà le ɖo ènyà ŋuti na mù, to gblɔ̃ɖɛtɔwo ji loo, àlo, to drɔ̃kuku mè ò. Ekèa ŋuti mù na wo yɔ wò, ne wòa gblɔ̃ ènu kè mù la wɔ̀a na mù.

¹⁶Samuɛl ɖo e ŋuti be: “Eye, nukɛ ŋuti wò le biɔ ènyà ènyè ya, fifì kè Tɔhonɔ̀ i trɔ ŋùgbe do wò, le kpɔ wò sìgbè yebe kɛ̃tɔ nènea ò?”

¹⁷Ènu kè Tɔhonɔ̀ na mù gblɔ̃ na wòa kpò ye be le wɔ̀ ŋua. Tɔhonɔ̀ xɔ̀ èfìɔzìkpea lè àsi wò, sɔ na hati wò kè le nyi David.

¹⁸Tɔhonɔ̀ wɔ̀ ekèa ku wò, ɖoa, wò gbe be yè mu la sè Tɔhonɔ̀ be ègbè, ne wòa wɔ̀ ɖo e ji, la crɔ̃ Àmàlɛktɔwo, wàlɛbɛ kè Tɔhonɔ̀ do àdɔ̀mèze do woa ò.

¹⁹Ekèa ŋutia, Tɔhonɔ̀ la sɔ wò ŋutɔ ku Izràɛl dùkɔ̃a do àsi na Filistìtɔwo, àleke be, èsɔ̀a, èwò ku èvi wòwo, mì la nɔ̀ fikèa, lè èkuwode ku mù. Tɔhonɔ̀ la sɔ Izràɛlviwo be àhùakɔ̃a ŋutɔ cã ɖo àsi na Filistìtɔwo.”

²⁰Kè Saolò sè ènyà kèawoa, vɔ̃vɔ̃ gã ɖe jè e ji, eye be jè ànyi jàkà trolo. Ŋusɛ̃ ŋutɔ cã mu gbà lè Saolò ŋuti ò, ɖoa, mu ɖù ènu ɖekpe, ŋùkèkè ku èzã kèwo keŋu jè ŋùkɔ̀ na gbè ŋua gbèa ò.

²¹Ekè nyɔ̃nùa dɔ̃ gogo Saolòa, e kpɔ lekè Saolò titɔ, eye be gbɔjɔ ɖoa. Nyɔ̃nùa gblɔ̃ na Saolò be: “Èfìɔ bùbùtɔ, wò kpɔ be kluvi wò nyɔ̃nùa, ɖo èto wò. Mù sɔ àgbè nyè do àfɔ̀ku mè, wàlɛbɛ kè mù wɔ̀ ènu kè wò biɔ so àsi nyèa.

²²Fifìa, èfìɔ bùbùtɔ cã la ɖo èto kluvi wò nyɔ̃nùa. Tɔ̀ wò jɔ̀, mù la sɔ ènu ɖùɖu vi ɖe va ɖo àkɔ mè na wò, wò la ɖù, ne wòa kpɔ ŋusɛ̃ vi ɖe, gbɔ̀xue la jè èmɔ, la yì.”

²³Saolò gbe, eye be gblɔ̃ be: “Nyè mu la ɖùnu ò.” Gãkea, ekè nyɔ̃nùa ku èfìɔa be ŋutimewo zĩ e jia, e sè woabe ègbè. Saolò sitè lè ànyigbã, eye be nɔ̀ àba ji.

²⁴Nyɔ̃nùa le nyì ènyìvi ɖe, ne bèa do àmì. E ɖèbla wù ì, sɔ èwɔ, wɔ̀ èmã, eye be mè kpɔ̃nɔ àkpiti.

²⁵Nyɔ̃nùa wɔ̀ ènu ɖùɖu na Saolò ku yebe ŋutimewo, wo ɖù. Ekè wo ɖùnu vɔ̀a, wo jè èmɔ, wàlɛbɛ kè èŋù mu kpɔ kè òa.