Read gen 1Samuɛl 29 Bible Online

1Samuɛl 29 - gen bible

1Samuɛl 29

¹Filistìtɔwo bɔ̀ woabe àhùakɔ̃wo keŋu ɖo Àfɛk, eye Izràɛlviwo do àsàɖa ɖo ètɔ̀ sàsra kè lè Yizreɛl[18] gbɔa to.

²Filistìtɔwo be àhùaŋùkɔ̀nɔ̀tɔwo kplɔ̀ woabe àmè èkà èvè takpowo (100) ku èkà èwì vɔ àtɔ̃wo (1000) be àhùakɔ̃wo zɔ̃ ɖo ɖoɖonu. David ku yebe ŋutime kèwo ye kplɔ̀ Àkis èfìɔa, nyi àmè kèwo ye zɔ̃ ŋùgbesia.

³Filistìtɔwo be àhùagawo biɔ be: “Àmè kɛwo ye nyi Hebrùvi kèawo ò?” Àkis ɖo e ŋuti na Filistìtɔwo be àhùagawo be: “David kè nyi Saolò, Izràɛl be èfìɔa be sumɔ̃via ye! Èpè ɖèka àlo èvè ye nyi ekèa kè be lè gbɔ nyèa. Nyè mu kpɔ àgɔ̀jèje ɖekpe lè e ŋuti, so kaka wàlɛbɛ kè be si jo lè àpetɔa gbɔ, va na èta lè gbɔ nyèa ò.”

⁴Filistìtɔwo be àhùagawo bijì do Àkis, eye wo gblɔ̃ na ɛ̀ be: “Nyà ŋusù kèa jo, ne bèa trɔ yì nɔ̀ àfi kè wo na ɛ̀ be ne nɔ̀a. Mu gbà yì àhùa ku mi ò. Ne mu nyi nène òa, e la va trɔ kpã ŋùkɔ̀ mi, lè àhùa-gbea ji. Wò ŋutɔ kpɔ be nukɛ ye be la gbà teŋu wɔ̀, la sɔ jè ŋùmè na àpetɔa, ne mu nyi bèa do mia tɔ̀wo àsi na ɛ̀ ò?

⁵Mu nyi David ŋua ŋuti wo jì èhà so, le ɖuwè, le gblɔ̃ be: 'Saolò wù àmè èkà-wìvɔ àtɔ̃, vɔ̀a, David ya wù àmè èkà-wìvɔ àtɔ̃, èkà-wìvɔ àtɔ̃woa?'”

⁶Àkis yɔ David, eye be gblɔ̃ na ɛ̀ be: “Mù tà Tɔhonɔ̀ na wò be mù kpɔ be àmè jɔ̀jɔɛ ye wò nyi. E jɔ̀nàjì na mù be wò kplɔ̀nà nyè ku àhùakɔ̃a, mi yìnà, mi gbɔ̀nà, ɖoa, so kaka gbè kè gbè wò va gbɔ nyèa, nyè mu kpɔ èvuɛ̃ ɖe so gbɔ wò ò. Vɔ̀a, wò mu jè ŋùmè na àhùagaawo ò.

⁷Ekèa ŋutia, wò la trɔ jo, lè ŋuti fàfa mè. Nène a, wò mu la wɔ̀ ènu ɖekpe kè mu la jè ŋùmè na Filistìtɔ be àhùagawo ò.”

⁸David biɔ Àkis be: “Èfìɔ bùbùtɔ, nukɛ ye mù jo wɔ̀ ò. Àgɔ̀ kɛ ye sumɔ̃vi wòa jè do wò, so gbè kè gbè mù va trɔ zũ àpo sumɔ̃vi, kaka va na egbè, nyè mu la teŋu yì kpã ŋùkɔ̀ kɛ̃tɔ wòwo, lè àhùagbe ji ò?”

⁹Àkis ɖo e ŋuti na David be: “Ɛ̃ɛ, mù nya be wò mu wɔ̀ ènu ɖekpe ò, eye wò jènà ŋùmè na mù sìgbè Mawu be àtikplɔtɔ nène. Vɔ̀a, Filistìtɔwo be àhùagawo gblɔ̃ na mù: 'Mu ɖo la yì àhùa ku mi ò!'

¹⁰Ekèa ŋutia, èsɔ̀ fɔ̃fɔ̃ mèa, èwò ku ŋutime wòwo, mì la fɔ̃ kaba, eye, ne èŋù gbe kè kpòa, mì la jo.”

¹¹Yebe ŋùkègbèa, David ku ŋutimeawo fɔ̃ èzã, ne woa trɔ yì Filistìtɔwo de. Filistìtɔwo be àhùakɔ̃a ya yì Yizreɛl.