Read gen 1Samuɛl 3 Bible Online

1Samuɛl 3 - gen bible

1Samuɛl 3

¹Samuɛl gbà nyi ɖèvi, wàlɛbɛ kè be le sumɔ Tɔhonɔ̀ lè Èlìa gbɔa. Wàlɛbɛ ŋua, Tɔhonɔ̀ mu pònà nupo kpàtà-kpàtà ò, eye ŋùtègã-nukpɔkpɔ mu bɔ ò.

²Gbè ɖèkaa, Èlìa mlɔ̃ yebe mlɔ̃pea. Yebe ŋùkuviwo le gbɔjɔ, eye mu gbà teŋu le kpɔ ènu ò.

³Wo mu kpɔ ci Tɔhonɔ̀ be kãligbɛ̃awo hàɖe ò, eye Samuɛl mlɔ̃ Tɔhonɔ̀ be èxɔ̀a mè, lè àfi kè Tɔhonɔ̀ be zòɖùɖu ɖakà a lèa.

⁴Tɔhonɔ̀ yɔ Samuɛl. Samuɛl ɖo e ŋuti be: “Ènyè ye nyi ekèa!”

⁵E pu dù yì Èlìa gbɔ, gblɔ̃ na ɛ̀ be: “Ekè wò yɔ mù a, ènyè ye nyi ekèa.” Èlìa ɖo e ŋuti na ɛ̀ be: “Oò, nyè mu yɔ wò ò ɖe! Trɔ yì mlɔ̃ ànyi. “Samuɛl trɔ yì mlɔ̃ ànyi.

⁶Tɔhonɔ̀ gbà yɔ Samuɛl ke. Samuɛl sitè, yì Èlìa gbɔ, eye be gblɔ̃ na ɛ̀ be: “Ekè wò yɔ mù a, ènyè ye nyi ekèa.” Èlìa gbà ɖo e ŋuti na ɛ̀ be: “Èvi nyè, nyè mu yɔ wò ò. Trɔ yì mlɔ̃ ànyi.”

⁷Samuɛl mu kpɔ jèsi Tɔhonɔ̀ hàɖe ò, eye Tɔhonɔ̀ mu kpɔ ɖè yebe ènyà fiɔ ɛ̀ hàɖe ò.

⁸Tɔhonɔ̀ gbà yɔ Samuɛl, zè ètɔ̃gɔ̃a. E gbà sitè, yì Èlìa gbɔ. E gbà gblɔ̃ na Èlìa be: “Ekè wò yɔ mù a, ènyè ye nyi ekèa.” Èlìa sè e mè be Tɔhonɔ̀ ye le yɔ ɖèvia.

⁹Èlìa gblɔ̃ na Samuɛl be: “Trɔ yì mlɔ̃ ànyi, eye, ne e gbà yɔ wò kea, ɖo e ŋuti be: 'Pò nupo, Tɔhonɔ̀! Sumɔvi wòa le ɖo èto!'” Eye Samuɛl trɔ yì mlɔ̃ ànyi ɖo ye tèpea.

¹⁰Ekè Tɔhonɔ̀ gbà vaa, e gbà yɔ ɛ̀, sìgbè sãa nène be: “Samuɛl! Samuɛl!” Samuɛl ɖo e ŋuti be: “Pò nupo, sumɔ̃vi wòa le ɖo èto!”

¹¹Eye Tɔhonɔ̀ gblɔ̃ na Samuɛl be: “Kpɔɖa, mù la wɔ̀ ènu ɖe lè Izràɛlviwo dòmè, eye be la ku ènu na àmè sia àmè kè la sè èa.

¹²Gbè ŋua gbèa, mù la wɔ̀ èvuɛ̃ kèwo keŋu mù ɖo ɖo Èlìa ku yebe xòmèa ŋutia, so gɔ̃mèjèje, kaka sɔ yì ènuwuwu.

¹³Mù sìa Èlìa be mù la gblehùɛ do yebe xòmèa, kaka sɔ yì, ɖoa, Èlìa nya be yèbe èviwo le wɔ̀ bùsunu ɖo ŋuti nyè, vɔ̀a, mu dɔ̃ èto na wo ò.

¹⁴Ekèa ŋuti mù le kã àtãŋu na Èlìa be xòmèa be: vɔsa ɖekpe, èkɔ̀nu ɖekpe mu la ɖè kunù ɖo yebe èvuɛ̃ ta ò.

¹⁵Samuɛl nɔ̀ ànyi mɔmlɔ̃ kaka èŋù kè. Ekè be fɔ̃a, e hũ mawuxɔa be hɔ̃truwo. E le vɔ̃ be yèa gblɔ̃ ènu kè Tɔhonɔ̀ ɖè fiɔ yèa na Èlìa.

¹⁶Vɔ̀a, Èlìa yɔ ɛ̀ be: “Samuɛl, èvi nyè!” Samuɛl tɔ̀ be: “Àpetɔ, ènyè ye nyi ekèa.”

¹⁷Eye Èlìa biɔ ɛ̀ be: “Ènyà kɛ ye Tɔhonɔ̀ gblɔ̃ na wò ò? Mù gbà wla ènu ɖekpe do mù ò. Ne wò wla ènyà ɖe lè ènu kèwo keŋu Tɔhonɔ̀ gblɔ̃ na wòa mè do mù a, eŋuã, Tɔhonɔ̀ ŋutɔ ne dɔ̃ èto na wò veveɖe.”

¹⁸Eye Samuɛl gblɔ̃ ènu sia ènu na ɛ̀, ekè mu wla ènu ɖekpe do Èlìa òa. Èlìa gblɔ̃ be: “E ye nyi Tɔhonɔ̀. Ne wɔ̀ ènu kè be kpɔ be e nyɔa.”

¹⁹Samuɛl le sĩ, eye Tɔhonɔ̀ lè ku ì, àleke be mu gblɔ̃ ènyà ɖekpe so Tɔhonɔ̀ gbɔ, ekè mu jɔ̀ ɖo ekè be gblɔ̃a ji kpɔ ò.

²⁰Ekèa na be, lè Izràɛl bliboa, so Dàn-nyigbã ji kaka va ɖo Bɛr-Sebà-nyigbã jia, àmè sia àmè nya be Samuɛl nyi Tɔhonɔ̀ be gblɔ̃ɖɛtɔ nyàwo.

²¹Tɔhonɔ̀ gbà le ɖè ye ɖokoe fiɔ lè Silò, ɖoa, Tɔhonɔ̀ ɖènà ye ɖokoe fiɔ Samuɛl lè Silò, to yebe ènyà ji.